You Cannot Download this book untill you login but you can read it .

---

Login Register

ba zata iya hana kanta kuka ba, gwara ta yi iya yinta. Idan ya so bayan gama abin da suka so se ta yi tunanin abin da ya dace ta yi. Dan a yanzu dai kam kanta a kulle yake kamar da mukulli. Sanar da zuwan en ɗaukar amarya daga gidansu Gwani ne ya sanya Mami da wata cousin sister ɗin Ammi shiga ɗakin dan ɗakko amaren. Kafin ma su kai ga fitowa dasu se ga waɗanda Daddy ya aiko dan ɗaukar Didi. Waɗanda en uwansa ne kawai, dan kuwa har lokacin Mom ta ƙi yadda da batun auren, dama kuma jira kawai take yau ɗin ta yi, idan da gasken ne se ta san matakin da za ta ɗauka.

Cikin mota ɗaya aka ɗauki Lulu da Didi, yayar Mamansu Ammi ta shiga cikin motar, Mami ma haka. Se wata cousin ɗin Ammin itama ta shiga. Didi babu abin da take se kukan da yanzu sautinsa ya dena fita. Yayin da Lulu gaba ɗaya ma ta dena kukan, ta yi shiru ne kawai tana samawa kanta mafita, tunda dai ta fahimci dole auren an ɗaura, kuma gidan Gwanin ake ƙoƙarin kaita. Kukan nata ba shi da wani amfani, face zurfafa tunani da samarwa kanta mafita cikin kwanciyar hankali. Motar en uwan Bad Man na baya kasancewar Lulu za a fara kaiwa ya sanya motar en uwansu Gwani na gaba. A haka suka fice daga cikin gidan, duk iya ƙoƙarin Ammi ta kasa riƙe kanta se da ta yi kuka saboda kewar 'ya'yan nata da ta soma ji tun yanzun. Tafiyar mintuna marasa yawa aka yi, motar en uwan Gwani ta fara sauka daga kan titi. Duka suka bi bayanta, tunda babu wanda ya san gidan. Cikin wani ƙaramin layi suka shiga, suka soma tafiya a ciki, tafiyar sakanni kaɗan se motar ta dakata a ƙofar gidansu Gwani. Mami ta ɗauka kawai sun yi shortcut ne, se kuma ta ga sun tsaya, kamar basu da niyyar fita daga cikin layin.

"Wai me ye haka ne? Me ya tsayar damu anan ɗin ? Dama tun farko ma me ya biyo damu ta wannan n ƙaramin layin, kamar ma fa ba ya ɓillewa.." Mami ta faɗa tana leƙa waje. Ganin dai babu me bata amsa ya sanyata kallan driver tace

"Fita ka tambayi dalilinsu na tsayawa. Wannan ai ba yi bane.." Babu musu ya fita daga cikin motar zuwa inda motar da en uwan Gwani suke. Wajen second 30 se ga shi ya dawo ya buɗe motar yace yana kallan Mami

"Wai anzo gidan.."

"What..?" Mami ta faɗa tana buɗe idanunta kuma cikin ɗaga murya. Se ya jinjina kai yace

"Haka suka ce.." Da sauri Mami ta saka hannu ta buɗe side ɗin da take ta fita jikinta har wani rawa yake yi. Idanunta kamar zasu faɗo take bin gidajen layin da kallo. Duka ƙananun gidaje ne, babu wani gida da za a iya kallansa a kira shi da fitacce, kowanne yafi kama da na yaku bayi a idanun Mamin.

"Ina ne gidan..?" Ta tambaya kamar a ɗan tsorace. Nuna gidan da suka nuna masa ya yi lokaci ɗaya yana faɗin

"Gashi nan.." Da wani wulaƙantaccen kallo ta bi gidan da shi, tun daga sama har ƙasa, se kuma ta koma daga ƙasa zuwa sama kamar wadda ta ga bushashshen tutu.

"Ƙarya ne wallahi.. Wannan akurkin ne gidan amarya? Amaryar ma kuma Lulu? Ka san me kake faɗa kuwa? Ko kana hauka ne?.." Mami ta faɗa a fusace kuma zafafe kamar za ta kaiwa duk drivern duka..


✨MHIZ INNOCENT✨
*AJTICHAPTERTWO26*



___"Haka dai suka ce.." ya faɗa cikin girmamawa. A zafafe Mami ta yi gaba zuwa inda en uwansu Gwani suka fara fitowa daga cikin motar.

"Me ya faru kuka tsaya anan? Ko motar ce ta samu matsala?" Kallanta wata mata dake sanye da atamfa me kyau da mayafi ta yi tace

"Ai mun zo gidan.."

"Wai da gaske?" Ta tambaya har lokacin tsoro be gama fita daga kanta ba.

"Ƙwarai.. Ina amaryar tamu?" Ta amsa mata da hakan tana yin gaba zuwa wajen motar da Lulu ke ciki. Daidai lokacin da Cousin ɗin Ammi me suna Aunty Maryam, da kuma Baba uwani suka soma fito da Lulu daga cikin motar. Tuni wajen ya ɗauki guɗa cike da ƙwarewa. Ba dukansu ne suka shiga gidan ba, wasu se suka zauna cikin mota saboda Didi. Binsu da kallo Mami ta yi kamar wata doluwa, mamaki ya kasa barinta, ta yaya ma hakan ta faru? Anya kuwa Abba ya san wanda ya aurawa Lulu kuwa? Anya kuwa Lulu ta san waye ta aura da har ta yi biyayya ta yarda aka fito da ita daga gida?

"Tirƙashi..!" Ta faɗa a fili tana jinjina kai. Se kawai ta bi ayarin en shigar da amaryar gidanta dan ta ƙarasa kashe kwarkwatar idanunta. Har cikin gidan suka shigar da Lulu, ana cigaba da guɗa. Riƙe kanta Lulu kawai take yi, kada ta yi abin da ze janyo magana, ta sake zubarwa dasu Abba mutunci, a gaban dangi da wasu jama'ar da bata san ko su waye ba. Hakan ne yasa ta cigaba da tausar kanta har zuwa sanda ta ji ana ƙoƙarin zaunar da ita a ƙasa. Tarba ta musamman suka samu daga wajen Ummeey. Cikin mutunci da sanin ya kamata ta karɓesu. Matuƙa sun ji daɗin yanda ta karɓesun, hakan ne ya sanya suka ɗan saki jiki aka ɗan taɓa hira. Mami kam na gefe, bin gidan da kallo kawai take yi, zuciyarta a zafafe, tana ji kamar ta tashi ta yiwa duk wanda ke cikin ɗakin duka. Musamman ma Ummeey da farin cikinta ya kasa ɓoyuwa. Ji take kamar ta tashi ta shaƙeta, wato ai dole ta yi farin ciki, tunda an ɗakko er babban gida an kawo musu gida, ko banza za su dinga samun na sakawa a bakin salati daga mahaifin yarinyar.

"Ya dai kamata ku tashi a kai amarya gidanta. Ko dan sanin da kuka yi muna da aiki a gabanmu.." Mami ta faɗa cike da basarwa. Murmushi Ummeey kawai ta yi. Se wata ƙanwarta tace

"Ai babu damuwa ma. Muje a rakaku ɗakin amaryar.." ta faɗa tana miƙewa. Zuwa lokacin Mami ta gama tabbatar da da gasken dai nan ɗin shi ne gidan Lulu. Se kawai ta bi bayan su kamar wadda ba ta da laka. A haka har suka ƙarasa bakin ƙofar ɗakin Gwani da ya sha sabon fenti daidai da ƙarfinsu. Se sheƙi kuwa yake yi. Mukulli ɗayar ta saka ta buɗe sannan tace

"Bismillah.." ta faɗa sanda ta yi gaba. Babu ɓata lokaci suka soma shigewa cikin ɗakin. Madaidaicin ɗaki ne da shima ya sha fenti kamar daga waje. Duk da kasancewarsa a buɗe, hakan be hana zagaye wajen da labule masu kyau daidai gwargwado ba, hakan ne ya sa ba a iya ganin abin da ke cikin ɗakin, se dai idan an buɗe. Gefe guda kuma ɗakin da aka shigo da shi ne daga waje, ɗan ƙarami ne ba can ba. Shi ma an yi ƙoƙari wajen saka masa labule kamar irin na ɗakin, wankakku masu kyau, ƙall ƙall dasu. Se banɗaki dake cikin ɗakin da ake fara tararwa, shi ma madaidaici ne, a wanke fess kamar wanda aka gina shi yau, saboda mamallakinsa me tsafta ne, kamar yanda jikinsa yake haka ɗakinsa da komai nasa yake ƙall ƙall. Shi yasa duk da ɗakin nasa ba wani kyau ne da shi ba, amma da yake kullum cikin ƙalƙale shi yake yi, da kuma gyara shi tsaff yasa ko da be maka kyau ba, toh ze burgeka. Dukansu bin ɗakin suke yi da kallo, kamar dai yanda aka saba duk lokacin da aka je kai amarya gidanta. Kai tsaye yaye laluben da ya ƙawata ɗakin suka yi, inda gadon Gwani dake gyare tsaff kamar wanda mace ta gyara yake. Nan suka nufa. Anan suka ajje Lulu. Baba uwani ta ɗan yi mata faɗa a gaggauce sannan sukawa Ummeey sallama bayan sun shiga ɗayan ɗakin sun kalla sannan suka fice ba tare da sunwa Lulun sallama ba dan kar su kunnota. Se a lokacin Mami ta iya ƙarasawa kan gadon ta zauna, kai tsaye ta janyo Lulun tana fashewa da kuka. Da sauri Lulu ta ɗaga kai ta kalli Mamin dake cigaba da kuka kamar ƙaramar yarinya. Hankalin Lulu ya sake tashi, se dai bata iya cewa komai ba, har zuwa lokacin da Mamin tace

"Kar ki tambayeni dalilin yin kukana Lulu. Kalli irin gidan da aka kawoki a matsayin gidan mijinki.. Idan dai har da gaske ina kallanki a matsayin ɗiyata toh ya zama dole na yi kuka.. Lulu wannan wane irin gida ne? Me yasa Yaya ze miki haka? Ko dai be san wanda ya aura miki ba?" Ta yi maganar duka a lokaci ɗaya. Idan da Mami ta san yanda maganganunta ke sake baƙanta zuciyarta, suna sake tuna mata da Gwani da ta dena mata. Ita a yanzu wani gida da aka kawota, ko gidan da zata zauna duk ba damuwarta bane. Ita damuwarta ɗaya wanda aka aura mata, yaya za a yi ta rabu da shi? Dan duk wannan gidan ba zama za ta yi a cikinsa ba ballantana ta damu, gwara ta yi tunanin yanda za su rabu da Gwani tunda dai ta riga da ta faru ta ƙare.

"Na san suna can suna jirana.. Zan dawo gobe.." Se a lokacin Lulu ta iya buɗe baki da ƙyar tace cikin dashashshiyar muryarta

"Tafiya za ki yi Mami?"

"Ya zama dole Lulu. Amma abin da nake so dake kada ki sake ki bawa ɗan talakawa fuska ballantana har ya samu damar taɓaki.. Na faɗa miki wannan, na kuma san ba son shi kike ba. Toh idan ma kina tunanin tursasawa kanki zama cikin gidan nan ki dena, ni da kaina zan nema miki mafita. Za ki bar gidan nan cikin kwanciyar hankali ki koma gida."

"Da gaske Mami?"

"Ƙwarai kuwa.. Ke dai kawai ki kwantar da hankalinki.." Girgiza kai Lulu ta yi sanda idanunta dake a kumbure suka cika fall da ƙwalla. Maganar kwantar da hankali kam ai bata taso ba.

"Bari na je.. ki jira zuwana a safiyar gobe.." Lulu bata iya bata amsa ba, se binta kawai da ta yi da kallo har ta fice daga ɗakin. Se ta runtse idanunta har lokacin zafin da zuciyarta ke yi be ragu ba. Se dai maganar Mamin ta yi maganin wata daga cikin damuwarta. Ta kuma sanya ta bar ƙwaƙwalwarta ta huta a kan bulayin neman mafita.


... "Mom ki bar ni.. Tunda ya faɗa ya aikata ne.." Bad ya faɗa yana kallan Mom ɗin. Girgiza kai Mom ta yi tace

"A'ah Boy, ka bari tukunna mu gani mana.. Zuwa anjima zamu tabbatar da abin da ya faɗa ai.."

"Ya riga ya faɗa min wace yarinyar ce. So ki bar ni na je har gidansu, na saketa. Na san ze yi musu rashin daɗi.."

"Noo my son.. Ka san abin da yafi komai ciwo? A kawo yarinya gidan miji a saketa a ranar, ta koma gida.. Ya fi komai takaici. Dan haka ka yi haƙuri don Allah mu jira zuwan su.." Be ce komai ba illa kan gado da ya koma ya zauna fuskarsa a ɗinke tsaff.

"Ka dena fushin haka nan pls.." Mami ta faɗa tana dafa kafaɗarsa cikin rarrashi. Nan ma dai be tankata ba, se lumshe idanunsa da ya yi alamar ya ji abin da tace ɗin.

.. Tunda Mami ta fito jikinta ke a matuƙar sanyaye. Har zuwa lokacin da aka soma tafiya zuwa gidan Alhaji Matawalle. Tun daga bakin layin, Mami ta kasa haƙuri, se ta soma leƙe, ganin irin tamfatsetse kuma hamshaƙin layin da suka shigo. Haka suka cigaba da tafiya, basu suka tsaya ba, se da suka isa ƙofar wani ƙato, haɗaɗɗe kuma tamfatsetsen gida da a kallo ɗaya idan ka yiwa gidan za ka fahimci ya take duk wani gida dake cikin layin. Cikin ƙanƙanin lokaci aka wangale musu gate ɗin, wanda ke zagaye da mutane da dama, masu tsaron iya ƙofar wajen kenan. Babu ɓata lokaci suka danna kan motarsu zuwa cikin gidan. Ai Mami se ta kasa ko da ƙwaƙwƙwaran motsi ne. Ta cigaba da bin ko ina da kallo kamar wata er ƙauye. A bakin part ɗin Mommah suka tsaya, se en uwan Daddy suka soma fita daga cikin motar su. Duk da yanda kowannensu jikinsu ya yi sanyi da ganin irin hamshaƙin gidan da aka kawo er tahalika Didi, hakan be hana su soma ƙoƙarin fitowa da Didi ba. Se da suka ida fiddata sannan Mami ta yi iya ƙoƙarinta wajen fitowa daga cikin motar, duk da yanda zuciyarta ke bugawa. Se kawai ta cigaba da bin gidan da kallo, tana sake jefa idanunta lungu da saƙo na ko ina dan gama ganewa idanunta abin da ta soma gani. Cikin ƙanƙanin lokaci part ɗin Mommahn ya cika da guɗa ta ko ina. Baba uwani riƙe da Didi suka ƙarasa suka ajjeta. Cikin fara'a Mommah ta karɓesu cike da farin cikin ganinsu, dan ita dai tunda Daddyn ya faɗa mata zancen auren Areef ɗin ta ji hankalinta ya kwanta da hakan. Nan ma babu laifi se da suka ɗan taɓa hira se dai ba kamar yadda suka yi da Ummeey ba. Mami na gefe idanu sun yi tsilli tsilli tana cigaba da bin ɗakin da ya gama tafiya da imaninta da kallo.


"A bar min ita anan idan babu damuwa. Ga mukullin sashenta nan se ku shiga ku duba.." Mommah ta faɗa da murmushin dai. Karɓa Aunty Maryam ta yi, suka fito daga sashen Mommahn zuwa na kusa da nata. Wanda aka ce musu shi ne na Didi. Tun kafin a shiga parlour ma kaɗai abin kallo ne, ballantana kuma bayan an shiga. Komai na ciki abin kallo ne, dan kuwa ya ƙayatu matuƙa gaya. Komai a kintse, a gyare, a kuma nutse, babu hayaniya, se zallar kyau me tafiya da zuciya. Suka kuwa kashe kwarkwatar idanunsa sannan suka fito cike da santin gidan. Zuwa lokacin Mami kawai bin kowa take da idanu, dan kuwa mamaki ya kusa kasheta. A ina Abba ya samo wannan ɗin? Ashe dama Abban yafi son Didi bata taɓa sani ba se yau? Ya aka yi Didin ta samu wannan shahararren me kuɗin? A ina kuma Lulu ta samu faƙiri haka, talaka mara arziƙi?. Ɗakin Mommah suka koma inda babu ɓata lokaci suka yi sallama da ita, sannan suka yi da Didi. Kukan da sautinsa ya dena fita ta fashe da shi sanda zasu tafi ɗin. Haka tana komai suka tafi suka barta ba dan suma sun so ba. A yanzun ma bayan sun fito Mami kasa dena bin gidan ta yi da kallo, ko tamfatsetsen ƙatuwar harabar gidan ma kaɗai abar kallo ce ballantana kuma a kai ga ɗakin Didi, daga nan kuma aje ga ɗakin Mommah. Komai na gidan ya haɗu, komai na gidan haɗaɗɗe ne cikin tsari.

Tashi Mommah ta yi ta koma kusa da Didi a hankali ta saka hannunta ta riƙota tace

"Ki dena kukan haka nan kin ji? Ka da kanki ya yi ciwo.." Mommahn ta faɗa a nutse. Didi ba ta iya cewa komai ba, se maida kukan da ta fara ƙoƙarin yi duk da bata tunanin yiwuwar hakan. Ganin haka ne ya sanya Mommah kai hannu ta ɗan yaye mayafin da aka rufe fuskar Didi da shi, wanda hakan ya bawa kyakkyawar farar fuskarta damar fitowa, wadda ta yi jajir, kamar yanda idanunta ma suka yi.

"Tabarakallah Masha Allah.." Shi ne abin da Mommah ta faɗa tana sakin murmushi sanda idanunta suka sauka a kan fuskar Didi. Jin ta dena kukan se sheshsheƙa da take yi ya sanyata miƙewa tana faɗin

"Bari na samo miki ruwa.." ta faɗa tana wucewa. Ita dai Didi ba tace komai ba se cigaba da zama da ta yi a wajen.



.."A kira Yaya.. Na ji yana zancen ze siyo kayan ɗaki, da sauran abubuwan da ake buƙata a gidan amarya.. Toh wallahi ya bar shi ba se ya siyo ba. A ina za a saka kayan? Shin anya kuwa ma Yaya ya san wanda ya aurawa Lulu kuwa? Ta yaya ma za a ɗauki yarinya kamar Lulu a kaita wannan gidan da yafi kama da gidan marasa galihu?"

"Ke Sadiya ki kiyayi abin da bakinki ze furta. Dan tsabar sanin da na yiwa wanda na aurawa Afaaf, ni da kaina na yi masa tayin aurenta.. Kin ga me ya rage kenan?" Abba ya faɗa ransa a ɓace da halin Mamin da yafi kama da na Lulu kamar ita ta haifeta. Dama ƙarfin hali ne kawai take yi, dan tun fitowarsu daga gidan Alhaji Matawalle ta kasa cewa uffan, se da suka dawo gida sannan ta tuna inda suka baro Lulu kana ta samu ɗan ƙwarin gwuiwar yin magana.


.. Da sallama ya shigo cikin gidan, cike da fatan ze samu babu kowa a gidan. Addu'ar tasa kuwa ta karɓu dan kuwa Ummeey kaɗai ya samu zaune cikin ɗakin kan dadduma da carbi a hannunta. Sallamar tasa ta amsa fuskarta ɗauke da murmushi. Se ya ƙaraso ya zauna yana faɗin

"Barka da wannan lokaci Ummeey.."

"Yawwah barka dai.."

"Ka kuwa ci abinci?" Ummeey ta tambaya cike da kulawa. Jinjina kai ya yi fuskarsa ɗauke da ƙayataccen murmushi, dan ba kaɗan ba yana jin daɗin kulawar Ummeeyn a gare shi.

"Ehh na ci Ummeey.."

"Toh hidima duk ta hana ni sanin halin da kake ciki.. Ko da yake, yanzu ma wannan aikin yana ƙoƙarin tashi daga kaina zuwa kan ɗiyata.."

"Ɗiyarki?" Ya tambaya dan shi har ga Allah be fahimci abin da take nufi ba.

"Ka ji min yaro.. Aou toh ko se na fito ɓalo_ɓalo nace matarka?" Ta ƙare tana murmushi. Yaƙe kawai ya yi, tunawa da ya yi yanzu haka fa se a iya cewa an kawo yarinyar cikin gidan nan. Yarinyar da be san ma ta ina ze fara gabatar da rayuwarsa da ita ba.

"Maza je ka ku taho tare, ina so na haɗa ku ku duka na muku faɗa. Idan Allah ya yi Malam ya shigo ma se shi ma ya tofa albarkacin bakinsa.." Kallan Ummeeyn ya yi se kace wanda ya ji ta yi saɓo. Itama se ta kalle shi cike da mamaki. Ganin tana masa kallan tuhuma ne ya sanya shi faɗin

"Tom.." yana miƙewa ya soma takawa zuwa inda ɗakinsa yake, daidai kuma lokacin da annurin da ya rage a kan fuskarsa ya ɗauke gaba ɗaya. A nutse ya cigaba da takawa har ya isa bakin ƙofar, har lokacin be dena tunanin yanda wannan al'amari ya kasance ba. Ban da ikon Allah, da kuma umarnin Abeey ta yaya ma ze auri wata Afaaf? A hankali ya saka hannunsa ya ɗora a kan ƙofar ɗakin..


✨MHIZ INNOCENT✨
*AJTICHAPTERTWO27*


___Cikin nutsuwa ya turata. Dakatawa ya yi saboda halittar da ya gani a bakin ƙofar, dan be yi tsammanin ganinta a wajen ba. Tana tsugunne a bakin ƙofar kanta kife a kan gwuiwarta. Jin an turo ƙofar ne ya sanyata ɗaga idanunta daidai lokacin da ya kalleta, se kuwa suka yi ido biyu. Ƙirjinta ya wani irin bugawa, lokaci ɗaya ɓacin ranta ya sake tasowa, se kawai ta sake maida kanta kan gwuiwarta. Ɗauke kai ya yi yana ƙarasawa cikin ɗakin yana mamakin abin da ya zaunar da ita a bakin ƙofar ɗakin. Se dai daga yanayin yanda ta kalle shi ya san bakinta cike yake fall da rashin kunya, da tsiwa. Wanda be shiryawa karɓarsu a yanzu haka ba, tunda dai shi kam ba shi ya nemi aurenta ba ballantana yace ze daurewa duk wani abu da za ta masa. Neman waje ya yi ya zauna a ɗan gefen gadon, yana tuna cewar Ummeey ce fa ta aiko shi. Shi kam Ummeey ta haɗa shi da aiki, dan kuwa ba ma ya san wata magana ta shiga tsakaninsa da yarinyar a yau ballantana ma wani rainin ya shiga tsakaninsu. Ɗan lumshe ido ya yi lokaci ɗaya yana miƙewa, kyakykyawar fuskarsa a ɓace ya soma takawa kamar ze fice daga ɗakin. A kausashe sanda ya kusa ƙarasawa inda take yace

"Ki tashi zamu je wajen Ummeey.." Idan labulen ɗakin da suke ciki ya kalle shi, toh Lulu ma ta kalle shi. Se da ya ɗan jinjina kansa sannan ya sake maimaita maganar a karo na biyu. Sarai tana jinsa amma a yanda ta nuna ba ma za ka gane ta san da tsayuwar wata halitta a gefenta ba. Takaici, baƙin ciki gami da haushi su ne suka cikata. Kuma tabbas idan be rabu da ita ba a yanzun nan za ta juye masa kwandon rashin mutuncin da zuciya ke ta angizata da ta yi masa a farkon shigowarsa ɗakin. Se dai koma mene ne gwara ta fara ji ta bakin Mami, idan ta bata shawarar se ta haɗata da wadda ta yanke sannan ta aiwatar da komai. Ta gefenta ya raɓa ya fice daga ɗakin, duk da yanda ransa ya ɓaci hakan be saka shi ya sake ce mata komai ba. Yau ɗin ita ce ranarta ta farko a gidan, saboda haka koma mene ne ze mata uzuri ko dan mutuncin mahaifinta, amma daga lokacin da ta nuna rashin kirkin nata za ta cigaba da yi ya zama dole ya taka mata burki. Shi dama abin da yake tunani kenan, ta yadda zamansu ze kasance ba komai ba. Idan shi ya haƙura ya karɓeta a matsayin mata ita kuma fa? Idan shi ya haƙura ze girmamata matsayin matarsa, ita zata girmamashi a matsayinsa na mijinta?. Taune lips ɗinsa ya yi yana lumshe idanunsa dan tabbas ya ji raɗaɗin ƙin tanka masa ɗin da ta yi.

"A'ah.. Ya kuma kai kaɗai..?" Ummeey ta faɗa tana kallan Gwani. Yaƙe kawai ya yi, dan baya so tun a yanzu Ummeeyn ta soma fuskantar banzayen hali irin na Lulu, duk da dai an ce me hali ba ya fasa halinsa. Ba wani cikakken hankali gareta ba, za ta iya nunawa Ummeeyn ma halinta.

"Ina tunanin ko ta yi bacci ne. Dan na yi magana ba ta amsa ba.." ya ƙare yana neman waje ya zauna.

"Allah sarki baiwar Allah.. Ai gwara ta huta ko ta ji daɗin jikinta.."

"Uhmm.." Kawai ya faɗa dan ko maganar ma ba ya son yinta. Shi kam wannan aure ze iya kiransa da takura. Abu mafi muni kuma halin Lulun, da wata yarinya ce ma me tarbiyya da sanin ya kamata da se ya yi tunanin zamansu ze yiwu cikin kwanciyar hankali. Se dai Lulun ba kamar haka ba ce, ita bauɗaɗɗen hali gareta, me wuyar tanƙwaruwa. Cigaba da zama ya yi a wajen Ummeeyn suka cigaba da hira. Zuwa can dai da Ummeey ta lura ba shi da niyyar tashi se ta kalle shi tace

"Ka bar er mutane ita ɗaya fa.." ɗan lumshe idanunsa ya yi har lokacin ya kasa dena tunanin yanda komai ya kasance.

"Zan tafi Ummeey.."

"A'ah ba da ni ba Affan. Tashi maza ka tafi.. Allah ya bamu alkhairi.." Babu yanda ya iya haka ya miƙe sannan ya amsa da

"Ameen.." ya zura takalminsa yana wucewa ɗakin nasa. Ga mamakinsa yana buɗe ƙofar se ya sake ganinta tsugunne dai a wajen, ya bita da kallo yana mamakin abin da ya zaunar da ita a wajen haka. Se kuma be bi ta kanta ba kawai ya wuce zuwa cikin ɗakin. Kai tsaye toilet ya wuce, ya watsa ruwa me ɗumi kamar ko yaushe idan ze kwanta bacci. Sannan ya fito shirye cikin wata jallabiya daidai jikinsa wadda ta yi masa kyau duk da ba wata me tsada ba ce, sumar kansa da ba kasafai ya fiya barinta a buɗe ba se sheƙi take yi ya kwanta luff luff. Dadduma ya shimfiɗa ya shiga karatu kamar kowane dare. Ya shafe mintuna masu yawa yana yi sannan ya ajje Qur'an ɗin. Ya miƙe ya ninke daddumar kana ya hau kan gadon. Se a lokacin ya tuna da halittar dake zaune a bakin ƙofa, ya ɗaga kai ya kalleta, har lokacin dai tana zaunen kanta a kan gwuiwarta. Kamar ka da ya tankata, se dai ya san ko babu komai yanzu duk wata kulawarta na ƙarƙashinsa ne, hakan ne ya sanya shi ƙarasawa wajen, a hankali kuma cikin kaushin murya yace

"Tashi ki je ki kwanta.." Shiru ta yi kamar ɗazun dai duk da ta ji abin da ya faɗa ɗin. Se dai ita ko fuskarsa ma ba ta san gani ballantana maganarsa. Tsayuwarsa ya gyara kafin yace

"Kar ki bari na maimaita.." Ya yi maganar sanda ya ɗan ƙara matsowa kusa da ita. Jin maganar tasa a