You Cannot Download this book untill you login but you can read it .

---

Login Register

ƙafarta se ta yi baya kamar za ta faɗi, ta yi saurin dafe Little tana ƙoƙarin miƙewa a kan ƙafarta Ladi ta riƙota. Kuka Little ya sake fashewa da shi saboda yanda ya tsorata, ga wannan matar da ta gama tsorata shi. Se kuwa ya shiga rera kukan shi. Abin da ya sake ƙular da Lulu kenan, ta saka hannunta bayan tattaro duk wani ƙarfinta ta tunkuɗa Ladi gefe. Se kuwa ta yi baya ta zube a wajen. Da sauri Lulu ta yi amfani da wannan damar ta tura ƙofar ɗakin ta fice da wani irin saurin da ba ta san tana da shi ba, a ranta tana karanto duk addu'ar da ta zo bakinta. Yunƙuri Abida ta yi dan bin bayan Lulu, Ladi da ke zaune a ƙasa zaman daɓaro ta yi saurin dakatar da ita ta hanyar faɗin

"Ka da ki bi ta. Batta na san yanda zan yi da ita.. Na ganta koh? Kuma ta min. An kawo min ita ta gudu.. Za ki ga abinda zan mata.." Ta ƙare maganar tana sakin wani murmushin takaici, musamman idan ta tuna wannan samu da rashin. Ga Lulun har gida amma ta tafi ba tare da ta aiwatar da abin da ta ke da niyyar aikatawa ba. Sosai ƙirjin Abida ke bugawa, ita ba rashin samun damar da Ladi ba ta yi bane yafi tsaya mata a rai ba. Gaba ɗaya tunanin ta ya tafi ne ka da Lulu ta je ta faɗi abin da ya faru, ta kuma tona mata asiri a cikin unguwa bayan babu wanda ya santa da wannan hali. Lura da yadda Abidar ta shiga damuwa ne ya sanya Ladi faɗin

"Ka da fa ki sakawa kanki damuwa. Ni ce fa Jakadiya Ladi.." ta ƙare tana tuna surar Lulu da ta iya gani daga cikin hijab, uwa uba kyau da kuma yarintar da ke tattare da ita, suna cikin abubuwan da suka ɗauki hankalinta na son kasancewa da ita.

... A hankali ya saka hannunsa ya tura ƙofar ɗakin da Abeeyn ke kwance da sallama a bakinsa. Duka suka amsa masa sallamar. Ya ƙaraso ciki, se dai da mamaki kan fuskarsa ya ke kallan Abba. Cike da mamakin dai ya furta

"A'ah Yallaɓae...!"

"Uhmm Malam Affan sannu da dawowa." Ɗan lumshe kyawawan idanunsa ya yi kaɗan kamin ya nemi waje ya zauna saboda gajiyar da ya yi kana yace a nutse

"Yawwah.. Ashe ba ka tafi ba. An gode Allah ya bar zumunci.."

"Aou ka san abin da ya yi kenan?" Ummeey da shigowarta kenan ta faɗa tana murmushi. Se ya kalli Ummeeyn da ɗan mamaki a kan fuskarsa, dan be fahimci a kan abin da take magana ba, ya girgiza kai yana faɗin

"Ummeey.." Daga inda Abeey ke kwance yace shi ma yana murmushin

"Ka godewa Allah ka godewa wannan bawan Allahn Affan. Ya hutasheka wahala dan kuwa ya biya kuɗin wankin ƙodar.." Da sauri Gwani ya kalli Abba cikin mamakin jin abin da ke fitowa daga bakin Abeeyn. "Ya biya kuɗin?" Ya tambayi kansa. Ya riga ya san Abban ba ze masa wasa a irin wannan abin ba. Hakan ne ya sanya shi sake kallan Abban yace

"Yallaɓae..?" Murmushi Abba ya saki kafin ya miƙe yana faɗin

"Dama jiranka na ke yi Malam Affan.. tunda ka dawo bari na tashi na tafi.. Allah ya ƙara afuwa ya sa kaffara.."

"Ameen_Ameen." Abeey da Ummeey suka amsa addu'ar, se dai shi Gwani ya kasa cewa komai saboda mamakin Abban na biyan kuɗin bayan a haka dai za a iya cewa ba su da wani haɗi. Se da ya ga da gasken Abban fita ze yi sannan ya soma takawa cikin nutsuwa, kyakkyawar fuskarsa na ƙawatuwa da murmushin da ya matuƙar karɓar fuskarsa yace

"Muna godiya sosai. Allah ya bar zumunci, ya saka da alkhairinsa.." ya faɗa dan tabbas ya ji daɗin yadda Abban ya nuna kulawarsa a kan Abban tun da farko. Ya riga ya san babu kyau maida hannun kyauta baya, ba dan haka ba da se ya faɗawa Abban ya bar kuɗin tunda ga su ya samesu. Se dai ko babu komai idan har ya bar shi Abban ze ji daɗi, ya kuma san yana yin wasu abubuwan ne duk dan ya sake wanke kansa a kan laifin da ba shi ya aikata ba.

"Allah ya ƙara afuwa." Abba ya sake faɗa yana ficewa daga ɗakin. Ɗan sake lumshe idanunsa Gwani ya yi bayan fitar Abban, a nutse ya taka ya nemi waje kusa da Ummeey ya zauna yana sauke ajiyar zuciya.

"Affan a ina ka samo wannan mutumin?" Abeey da har lokacin be koma bacci ba ya faɗa. Se a lokacin ya ɗan buɗe idanunsa. Se ya jefa idanunsa gefe a ransa yana tunanin abin da ya kamata ma yace. Ƙarya ba halinsa ba ce dan haka buɗar bakinsa se cewa ya yi

"Mahaifin ɗalibaina ne!"

"Ɗalibai kuma?" Ummeey ta faɗa cike da mamaki. Se ya jinjina kai dan tabbatar da abin da ya faɗa sannan ya ɗora da

"Ehh Ummeey.."

"Ikon Allah.. Allah ya saka masa da alkhairi.." Abeey ya faɗa yana sake jinjina kirki irin na Abba.


.. Tafiya ta ke yi cike da sassarfa, fararen idanunta sun cika taff da ƙwalla wadda ƙiris ta ke jira ta zubo. Jefa ƙafarta kawai ta ke yi ba tare da sanin inda za ta saka ƙafarta ta ba. Babu abin da ta ke hangowa ta ke kuma sake tunawa se maganganun Ladi da Abida masu muni marasa kuma daɗin ji.

"Ba za su biyomu ba koh?" Little da ya gama firgecewa tun ɗazun ya faɗa a tsorace. Ba ta iya amsa masa ba, se cigaba da tafiya da ta yi har lokacin jikinta be dena rawa ba. Daidai sanda suka kusa isa gida ta sake jiyo muryar Little na faɗin

"Lulu ba za su biyomu ba koh?" Se a lokacin ta tuna daga ina suke, ina suke shirin zuwa yanzu, waye kuma a hannunta. Take ƙirjinta ya wani irin buga. Se ta sanya hannu ta sauke shi daga kafaɗarta zuwa kan wani dandamalin ƙofar wani gida. Da sauri ya sake riƙota yana faɗin

"A'ah kar ki tafi ki barni kin ji?" Ya faɗa yana kallan gefe da gefensa. A take ta ji duk wani tunanin gidan nan ya soma yin nasa wajen. Tsoro da fargabar tunkarar gida ya mamayeta. Ta manta sam ba ita kaɗai ba ce, ballantana idan ta koma gida ta haɗa ƙarya ta faɗa. Ita da Little ne, a yadda kuma ya tsoratan nan babu abin da ze hana shi bayar da labarin abin da ya faru. A tambayeta ina ta je tace mene ne? Wane gida ne? Me ta je yi gidan? Tuna abubuwan nan da ta yi ne ya sanya ta riƙo Little ɗin, daidai lokacin da wata sabuwar ƙwalla ta taru a cikin idanunta. Se kawai ta koma ta zauna a kan dandamalin cikin rashin sanin abin yi...


A yi manage da wannan pls. Gobe idan Allah ya kai mu za mu haɗe.


https://chat.whatsapp.com/BClMNPwWybg2n3oRvtemv8

*♡☆A JINI TAKE☆♡*
*(IZZATA)*


By
_*ZARAH MAITAMA (Mhiz Innocent)*_


*CHAPTER ONE*

Page_14


___Ta shafe fiye da minti 10 zaune a wajen ba tare da ta sake niyyar ko da miƙewa ba ne. Se da ta jiyo muryar Little na taɓata yana faɗin

"Wai anan za mu zauna?" Se a lokacin ta sauke ajiyar zuciya lokaci ɗaya tana ɗan lumshe idanunta sannan ta miƙe a hankali ta kamo hannun Little ɗin. Karon farko tun fitowarsu daga gidan nan ta buɗe baki tace

"Gida za mu tafi.. ka da ka faɗawa kowa inda muka je ka ji?" Ta faɗa tana kallansa.

"Kaiii!!" Ya yi maganar kamar wani babba yana jinjina kai gami da waro idanunsa masu kama da na Twins sakk. Se da ta ja doguwar ajiyar zuciya sannan cikin rarrashi ta soma faɗin

"Zan siya maka sweet idan ba ka faɗawa kowa ba. Ai babu inda muka je daga makaranta koh.?"

"Ehh" ya faɗa yana ɓata fuska, se kuma ya ɗora da

"Amma babba.." murmushin da ya tsaya a iya bakinta ta yi, saboda har lokacin ba ta gama komawa daidai ba.

"Yeap.. babba sosai ma."

"Yes!" Ya faɗa kamar wani babba yana murmushi. Se ta saka hannunta ta sauko da shi ta kama shi suka soma tafiya zuwa gida, har lokacin tafiyarta ta dai babu wani kuzari. Suna zuwa ƙofar gida ta kalli Little tace

"Ina ma muka je?"

"Makaranta." Ya amsa mata da sauri yana murmushi. Kamar wata mara laka haka ta cigaba da takawa zuwa cikin gidan. A hankali ta yi sallama a ƙofar parlourn cike da fatan babu kowa a ciki. Aikuwa babu kowa ɗin a ciki se ta yi saurin shigewa cikin ɗakinsu. Anan ta samu Didi da Ammi suna sallah. Se kawai ta saki hannun Little da sauri ta shige toilet. Se a lokacin ta sauke ajiyar zuciya gami da jingina kanta jikin bangon toilet ɗin tana lumshe idanunta. Wasu irin hawaye masu ɗumi suka zubo a kan kuncinta. Sam ba ta da saurin kuka, ko kuma zuciyarta ta karye da wuri, se ga shi yau ɗin cikin ƙanƙanin lokaci zuciyarta ta karye, ta ka sa mantawa da abin da ya faru a yau ɗin. Daidai lokacin da ta ji ƙarar buɗe ƙofar ɗakin alamar an fita ta fashe da kuka kawai, kukan da ba ta san dalilinsa ba tunda dai Allah ya kuɓutar da ita. Se da ta gama kukan sannan ta ɗauro alwala ta fito bayan ta wanke fuskarta sosai. A ɗakin ta tarar da Little zaune kan gadonsu yana cin abinci, yayin da Didi ke kwance a kan gadon saboda zazzaɓin da har lokacin be gama sauka a jikinta ba. A hankali ta ƙaraso ta ɗauki dadduma ta shimfiɗa, tana gyara zaman hijab ɗin jikinta ta jiyo muryar Didi na faɗin

"Har kin gama kukan?" Se ta dakata da sauri tana kallan Didin da ke lulluɓe da blanket. Kallan Little ta yi da ke cin abincinsa hankali kwance. Ta san idan ya ji maganar Didin ze iya tuna abin da ya faru, hakan ne ya sanyata kallansa tace

"Little.. je ka ci abincin a parlour ka ji?" Babu musu ya miƙe riƙe da ƙaramin plate ɗin da abincin ke ciki ya fice da sauri. Se a lokacin ta kalli Didi a hankali tace bayan ta ɗan yamutse fuska

"Ni fa ba kuka nake yi ba.."

"Uhmm, ya miki kyau.. ban san lokacin da muka fara ɓoyewa juna wani abun ba. Amma ki cigaba." Didi ta faɗa tana gyara kwanciyarta. Shiru ta yi dan ita kanta ta san abin da ta ke ƙoƙarin yi ɗin ba daidai ba ne, kasancewar ba sa taɓa ɓoyewa junansu wani abun. Dan haka gudun ka da ta ja lokaci ya sanyata tayar da Sallah. Se da ta idar sannan ta miƙe ta koma kan gadon, a hankali tace

"Didi.." juyawa Didi ta yi daga ɓangaren da ta ke, ciki ciki tace

"Ka da ki ce min komai malama.."

"Am sorry.." ta yi maganar a narke.

"Ke yanzu fa ba zan ji ba. Duk sanda kika yi niyyar faɗa min kya faɗa min, ae dama na ga take_takenki kwana biyun nan" girgiza kai Lulu ta yi tana faɗin

"Haba mana Didina.."

"Kya ji da shi dai.." Didin ta faɗa tana ture hannunta. Murmushi kawai Lulu ta yi, dama yanzun kwata kwata ba ta son yin zancen nan, dan haka gwara ta bari idan Didin ta sakko se ta ba ta labarin, zuwa lokacin itama ta nutsu.



.. "Ba za ki gane ba ne Jakadiyarmu.. Tsorona Allah tsorona ka da yarinyar nan ta ɗauka maganar nan ta je ta yaɗani a wajen mutane." Tsaki Ladi ta yi tana girgiza kai cike da fusata da zancen Abidar da ya ƙi ci ya ƙi cinyewa.

"Ke ki dakata da min maganar nan na faɗa miki. Ita ɗin banza ta faɗawa wani? Ni nan ni ce fa na faɗa miki ba za ta sanarwa da kowa ba. Ko ba ki yadda da ni ba ne? Idan ba ki yadda ba ki cigaba da damun kanki. Kuma ma dan an sani se mene ne? Kina tunanin duk zuwan da ki ke gidan nan dama babu wanda ya taɓa ganinki? Kin ga kawai ki yi sha'aninki hajjajuna.." Ladi ta faɗa tana gyara zamanta.

"Toh." Abida ta faɗa tana karkatar da kanta lokaci ɗaya tana ɗan taɓe baki kawai.

"Maganar Afaaf?" Kamar wadda Lulun ke gabanta ta saki murmushi hadda lumshe idanunta kafin ta soma faɗin

"Zan ba ta dama ɗaya ne a yanzu haka.. ki sake gwada sa'arki wajen janyo min hankalinta zuwa wajena. Idan kuma taƙi se na chanja wani salon, kin san ance idan dama taƙi se a koma hagu. Naga kan yarinyar na rawa saboda haka zan taka mata birki. Zan saka a wulaƙanta min abin da take taƙama da shi sannan daga ƙarshe dole ta dawo ƙarƙashina a lokacin da rayuwarta za ta koma mara amfani a wajen kowa. Ni kuma a sannan ne zan ci karena babu babbaka. Kin ga ta yi biyu babu kenan.." ta ƙare tana murmushi tana kuma hasaso yanda komai ze tafi. Jinjina kai Abida ta shiga yi bayan gama sauraron maganar Ladin. Tabbas Ladin ta fusata, kuma ba komai ne ya sake ingizata ba se ganin Lulun da ta yi, kuma ba ta sameta ba. Ta riga ta san abin da take faɗa ɗin da gasken za ta aikata, za ma ta iya aikata abin da yafi haka. Dan haka za ta yi ƙoƙari wajen sake janyo ra'ayin Lulun ko dan ka da Ladi ta saka a ɓata mata rayuwa.

"Shi kenan. Zan sake zuwa na lallaɓata. Ki saka a ranki kin gama samun Afaaf." Abida ta faɗa tana murmushi dan ta kwantar da hankalin Ladin. Aikuwa se ta yi murmushi tana faɗin

"Allah ko Abida?"

"Ƙwarai kuwa.." Abida ta faɗa tana sake yin wani murmushin kai ka ce ta ma kawo mata Lulun ne.



.. Baƙuwar motar da ya gani ce a ƙofar gidan ya sanya shi dakatawa. Cike da mamaki ya ke kallan motar ganin da gasken a ƙofar gidan ta tsaya.

"Ɗan uwa zan kiraka zuwa anjima.. pls ka da ka ƙi amsawa.." Kaseem ya faɗa sanda ya hangi Abba. Daga can ɓangaren shiru ne ya ɗan wanzu kamar ba waya ya ke ba, se kuma a hankali na ji an ce

"Oh..k.." daga haka tun kafin Kaseem ɗin ya katse wayar aka datse kiran. Girgiza kai Kaseem ya yi a hankali yana furta

"Wannan baudaɗɗen Areef ɗin halinsa se shi.." Da sauri ya sauka daga motar ya ƙarasa inda Abba yake bayan ya jefa wayarsa a aljihu. Cike da girmamawa ya tsuguna yana faɗin

"Barka da wannan lokaci.."

"Barka dai.." Abba ya faɗa yana riƙe hannun Kaseem suka gaisa sannan ya ɗora da

"Tashi mana" murmushi Kaseem ya yi kana ya miƙe ɗin. Se kuma ya ɗan yi shiru har se da Abba yace

"Se dai kuma ban shaida fuskar ba.."

"Ehh wato dama dai ba ka sanni ba.. amma dai na zo ne a kan Afaaf" ya faɗi sunan kamar yanda Mami ta faɗa masa.

"Toh.. Allah ya sa dai ba laifi ta yi ba" Abba ya faɗa dan har ya fara tunanin ko malaminsu ne ya kawo ƙararta kuma. Da sauri Kaseem ya shiga girgiza kai har lokacin kansa na ƙasa

"A'ah a'ah wallahi, babu abin da ta yi. Kawai dai wata maganar ce daban." Se a lokacin Abba ya ji daɗi dan har se da ya sauke ajiyar zuciya sannan yace

"Toh mu je daga ciki mana.." Cikin jin daɗi Kaseem ɗin ya bi bayan Abba zuwa cikin gidan. A compound ɗin gidan suka zauna kan wasu kujeru masu kyau.

Shiru Abba ya yi sanda ya gama saurarar maganar Kaseem ɗin. Se ya sauke ajiyar zuciya sannan yace

"Gaskiya ka zo da magana me kyau. Kuma zuwa wajena da ka fara yi ya sake tabbatar min da ingancinka. Se dai kuma wani hanzari ba gudu ba.." da sauri Kaseem ya ɗaga kai ya kalli Abba, cike da tsoron abin da ze fito daga bakin nasa.

"Ita dai yarinyar nan yanzu haka a S.S 1 take, yanzu ne suke ƙoƙarin shiga S.S. 2. Saboda haka ko da zan aurar da ita na fi ƙaunar ta gama secondary school, idan ya so se ta cigaba a gidan mijinta. Idan hakan ya yi maka toh babu damuwa se na soma ba ka dama wajen ita yarinyar. Idan har kun daidaita toh se mu san abin yi kuma." Ajiyar zuciya Kaseem ya sauke yana murmushi kamar wanda aka ce an ɗauki Lulun ne ma an ba shi gaba ɗaya.

"Na gode sosai Yallaɓae, Allah ya saka da alkhairi ya ƙara girma. Hakan da ka yi ya yi daidai, kuma nima ya min. Bani da damuwa da gama secondary ɗinta idan dai har ta amince da ni.." ya ƙare maganar ƙasa_ƙasa cikin er jin kunya. Murmushi Abba ya yi dan hankalin yaron ya burge shi yace

"Toh babu damuwa. Allah ya ba da sa'a." A zuciyarsa ya amsa da Ameen ɗin daidai sanda Abba ya miƙe. Ba dan ya so ba shima ɗin ya miƙe yana ta kokawa da zuciyarsa a kan kada ta rinjaye shi ya furta yana son ganin Lulu.

"Zauna.. bari na turo maka ita." Wani irin sanyi ne ya ji ya ratsa shi, har se da ya lumshe idanunsa yana komawa ya zauna kan kujerar. Se kuma ya tuna be cewa Abban komai ba, hakan ne ya sanya shi ɗaga murya wajen faɗin

"Toh Allah ya saka da alkhairi"

A parlour Abba ya sami Ammi, Didi da kuma Lulu zaune suna kallo. Ya kalli Didi da ke kwance yace

"Afrah ya jikin?"

"Da sauƙi Abba"

"Toh Masha Allah, Allah ya ƙara afuwa."

"Ameen Ameen" suka haɗa baki wajen faɗar hakan.

"Sannu da zuwa Abbansu." Ammi ta faɗa.

"Yawwah.. Ke Afaaf.." Abba ya yi maganar lokaci ɗaya.

"Na'am Abba.."

"Tashi ki je waje, kin yi baƙo.." gaba ɗayansu suka ɗaga ido suka kalli Abban cike da mamakin furucinsa.

"Baƙo kuma?" Ammi ta tambaya tana kallan Abban. Se da ya nemi waje ya zauna sannan yace

"Yanzu dai ta fara zuwa ka da a bar ɗan mutane da jira. Ke kuma zauna na faɗa miki yanda a ka yi.." Kallan Abba kawai Lulu har ma da Didi suke yi, jikin kowaccensu a sanyaye, musamman ma Lulu da har jikinta ya soma rawa, idanunta sun tara ruwan hawaye, jin wai ita ce ke da baƙo kamar a film. Toh me aka zo yi wajenta kenan? Me aka zo a ce mata? Ko dai ɗan makarantarsu ne? Kai ta ma fi tunanin hakan, tunda da dai ita a shekarunta yanzun dai ba soyayya take yi ba.

"Daɗina da ke Afaaf shininniƙi. Afrah maza shirya ki rakata. Ba wani abun ba ne ba.." jin abin da Abban ya faɗa ne ya sanya duka suka ji ɗan sauƙi. Duk da har lokacin jikin Didi be gama komawa normal ba, haka ta miƙe dan ba za ta iya barin Lulun ta fita ita kaɗai ba, duk da Abban yace musu babu komai, shi ya sa itama ta gama kawowa ranta ɗan ajinsu ne. Babban hijab kowaccensu ta saka, a haka suka fito daga ɗakinsu, kowaccensu dai har lokacin jikinta a sanyaye kamar waɗanda aka yiwa mutuwa. Bin su da kallo Ammi ta yi se dai ta gaza furta komai. So take kawai su fita ta ji bayani daga bakin Abban. A hankali suke takawa cikin compound ɗin, se baza idanu suke yi, ko da za su ga wani wanda suka sani zaune. Se dai har suka kusa ƙarasowa ba su ga alama ba. Hakan ne ya sanya Didi dakatawa tace

"Kin ga dai wajenki a ka zo, ni dai wallahi komawa zan yi." Kamar za ta yi kuka Lulu tace

"Don Allah Didi ka da ki tafi. Don Allah ka da ki koma kin ji? Wallahi a tsorace na ke, matuƙa tsoro nake ji. Ban san ko ɗan ajinsu waye ba. Ko kuma yayan wata ne a cikin en ajinmu."

"Ehh kuma haka ne" Didi ta faɗa, se kuma ta ɗora da

"Kin ga bari na zauna anan ina hango ku. Zan ƙaraso daga baya."

"Don Allah da gaske?" Lulu ta faɗa

"Ehh wallahi.." Se a lokacin sannan Lulu ta sauke ajiyar zuciya kana ta soma takawa zuwa inda Kaseem ke zaune. Se ta nemi kan kujerar ta zauna tana faɗin

"Ga ni!" Wani murmushi ne ya suɓuce masa sanda ya ɗora idanunsa a kan Lulu. Wani farin ciki na mamaye ilahirin jikinsa. So daga ƙarshe dai ya yi tozali da wannan kyakkyawar fuskar bayan tsawon lokacin da ya ɗauka yana begenta. Ya ɗan lumshe idanunsa kaɗan sannan ya buɗe yace

"Barkanki da fitowa gimbiya." Cikin rashin fahimta ta juya tana kallansa, ba ta san sanda tace

"Gimbiya kuma?" Murmushi ya sake yi kamin yace

"Ƙwarai kuwa.. Na san za ki yi mamakin zuwana, se dai wannan ɗin sam ba abin mamaki ba ne idan muka yi duba da kwanakin da na shafe ina nemanki." Ita duk wannan maganganun nasa ba ganesu take yi ba, ta fi so ta ji ya fito kawai ya faɗa mata shi yayan wance ne ta aiko shi wajenta.

"Wato tun ranar da na soma ganinki za ki shiga islamiyya ke da ɗan uwanki. Allah ya ɗora min ƙaunarki. Na kasa haƙuri har se da na bi ki gidan da ki ka je, ashe gidan Aunt ɗinki ne. In taƙaice miki labari dai ta hanyarta na bi na sameki yau ɗin nan.." ya ƙare yana murmushi, yana sake kallan fuskarta cike da so da ƙauna.

"Da yaro ka ganni a hannuna?" Ta tambaya bayan ta juyo gaba ɗayanta.

"Ehh" ya faɗa da murmushin dai.

"Kuma a dawowa se ka ga na shiga gidan Aunty Sadiya.."

"Exactly.." ya faɗa yana nunata, irin kin gano ɗin nan. Se kawai ta saki murmushi a karo na farko tun bayan fitowarta wajen. Se ya shagala da kallanta yanda ta yi wani shahararren kyau da ta yi murmushin

"Kenan idan haka ne Didina ka gani?"

"Ban.. gane.. ba!" Ya faɗa a ɗan rarrabe yana kallan Lulu. Murmushin dai Lulu ta sake yi ko kunya ba ta ji, bayan da farko ko murmushi ta ƙi yi.

"Twin sister ɗina ce.." Waro idanu Kaseem ya yi cike da mamaki da kuma al'ajabin abin da ke fitowa daga bakin Lulun.

"Twin sister na ki kuma?" Ya tambaya a mamakance, wanda tsananin mamakin se da ya bayyana a kan fuskarsa.

"Ƙwarai kuwa.." Cikin matuƙar mamakin dai ya shiga jinjina kai kafin ya sauke ajiyar zuciya yace

"So ki na nufin ki ce min duk wannan neman da na ke ba ke na ke nema ba? Twin sister ɗinki ce?"

"Ehh.." in ji Lulu.

"Ikon Allah.. ya sunanta?"

"Afrah.." jinjina kai Kaseem ya yi, se kuma ya saki murmushi kafin ya soma faɗin

"Ko daga sunan ma namu ya fi daɗi.." dariyar da ba ta shirya yi ba Lulu ta yi na jin maganar Kaseem ɗin. Mutumin da ko wadda ya ke ƙauna ɗin ya kasa ganewa, wai shi ne me faɗin suna ya fi daɗi.

"Ko ba ka faɗa ba, sunan Didina ya fi daɗi dama ai."

"Uhm humm. Pls kira min ita, wallahi na ƙagu na yi tozali da kyakkyawar fuskar da ta hanani bacci kwana da kwanaki. Tsananin kamannin da kuke yi ne ya sanya na kasa banbance ku." Se ta miƙe kawai lokaci ɗaya tana jinjina kai, kenan me Abbansu ya ke nufi? Aurar da su ze yi a waɗannan shekarun nasu ko kuwa dai me?

"Zo ki ji Didi.." Lulu ta faɗa sanda ta ƙarasa inda take zaune. Miƙewa Didi ta yi dan dama ta gaji da zaman

"Alhamdulillah, mu tafi. Wallahi dama kaina se sara min yake yi."

"Toh Didi wajenki fa ya zo, ya ɗauka ni ce ke.."

"Ni kuma?" Didi ta faɗa tana buɗe ido.

"Ehh fa.."

"Toh waye shi?" Didi ta katseta da faɗin hakan.

"Nima ban sani ba. Amma ki je se ki ji koh?"

"Ni ba inda zan je." Didi ta faɗa tana juyawa dan komawa cikin gida. Da sauri Lulu ta yi maza ta koma gabanta tana faɗin

"A'ah Didi ka da ki yi haka. Kin ga har wajen Abba ya je plss.."

"Toh me zan masa?" Ta yi maganar tana tura ɗan ƙaramin bakinta gaba.

"Toh ki je ki jiyo mana." Ba dan taso ba haka ta soma takawa cike da takun nan nata na nutsuwa zuwa wajen bayan Lulu ta ɗan rakota. Cikin siririyar muryarta ta yi sallama tana neman waje ta zauna. Tunda ta tunkaro shi ya zuba mata idanu. So yake ya gano shin akwai banbanci tsakaninta da wadda ta tafi yanzun ko kuwa da gasken tsananin kamarsu ce ta ruɗa shi har ya kasa tantance wadda ta ruɗa masa