You Cannot Download this book untill you login but you can read it .

---

Login Register

suna kallo, nan Salis yake shaida mata Abba yau ya k'ara aure abin ya girgizata sosai, amman kuma a wani b'angaren ta ta ya Abban farin ciki sabida ta san zaman hak'uri yake da ita.

Talatu kuwa tunda ta koma gidansu ita da yaronta take ta kulla makirci iri-iri tana zuwa tana kai wa mahaifiyar Salis d'in labarai a kan Nihal d'in karuwa ce saboda an rasa waye zai aureta shiyasa a ka mak'alawa Salis aurenta tun Mama bata yarda har ta saka akai mata binkice a kan Nihal d'in aka tabbatar mata da cewa Nihal ta tab'a karuwanci dan saboda haka ne ma a ka yi mata aure, ran Mama ya b'aci sosai nan ta shirya ta nufi gidan Salis tana zuwa gidan ta shiga falon babu ko sallama a zaune ta tarar dasu suna kallo tashi suka yi suna mata sannu da zuwa.

Wata uwar harara ta shiga hurgawa Nihal d'in cikin masifa ta shiga cewa "To munafuka tsohuwar kilaki asirinki ya tonu wato kin je kin gama yawon iskancinki shine zaki zo ki mak'alewa yarona to wallahi ba'a nan gidan ba dan yanzun nan ba sai anjima ba Salis zai sake ki ki je ki cigaba da yawon barikin na ki" tana gama fad'ar haka ta juyo kan Salis tana cewa "ka saketa ko kuma na tsine maka",Salis ya shiga tashin hankali ya shiga kok'arin rarrashin Mama amman sam ta tubure a kan ko ya saketa ko ta tsine masa.

Nihal tana kuka ta kalli Salis tana cewa "Yaya Salis ka bi umarnin da Mama ta ba ka, ba na so na zama silar rabuwarka da mahaifiyarka ka sake ni kawai na sani kana sona sosai nima ina sonka amman ya zama dole mu rabu da juna" Salis ya rintse ido zuciyarsa nayi masa zafi cikin rawar murya ya ce "Nihal ki je gida" Luuuuuu ya fad'i k'asa sumamme Nihal ta saka kuka ta nufeshi amman Mama ta daka mata tsawa tare da cewa "ki tafi gidan ubanki, ba ya buk'atarki" Haka Nihal ta shiga d'aki ta had'a kayanta a akwati ta fito tana jan akwatin gidan Hajiya Mama ta nufa tana kuka, a zaune ta tarar da ita tare da Abbansu da wasu 'yanmata guda biyu a jikin Hajiya Mamar ta fad'a tare da fashewa da kuka tana fad'in.
"Hajiya Mama na shiga uku dan Allah ki taimaka min" Tayi maganar tana k'ara sautin kukanta, Hajiya Mama ta ce "meya faru takwarata","Hajiya ta raba ni da Yaya Salis, Hajiya ta ce sai ya sake ni ba za ta yarda ya kuma zama da ni a matsayin matarsa ba" Kuka take yi sosai har sai da kan ta ya fara sara Mata, Hajiya Mama cike da tashin hankali ta ce "wacece wannan da d'anyen hukunci","Maminsa ce"Nihal ta bata amsa tana cigaba da kuka.

Shuru Hajiya Mama tayi "tabbas abin da ka yi sai anyi wa naka, Jabir ya wulak'anta marainiya gashi ita ma k'anwarsa anyi mata" Tayi maganar cikin zuciyarta, Shi ma Alhaji Mansur Abin da yake fad'a a tasa zuciyar kenan, Hajiya Mama ta d'ago ta dai-dai lokacin Amatullahi ta kai fuskarta kan Nihal d'in a firgice take nuna Nihal tana cewa "ke ce daman" Da sauri Nihal ta juya tana kallon Amatullahi tabbas duk da tana cikin matsanancin tashin hankali Amman ba za ta, tab'a mantawa da wannan fuskar ba ita ma cike da mamaki ta ce "ke ce anan?".

Sai kuma ta tashi ta nufi gurin da su Amatullah da Khadijatullah suke zaune ita ma ta zauna tana fuskantarsu hawaye na zuba daga cikin idanuwanta "ke ce Amaryar Abbanmu ko Kuma ke ce Khadijatullah" Khadijatullah ta kalli Nihal gabanta na fad'uwa "Wacece wannan? A Ina ta san sunana" Tambayar da take yi a zuciyarta kenan ba ta san ta fito fili ba, sai jin Nihal tai tana nuna ta tana cewa "ke ce Khadijatullah?"Kai ta gyad'a Mata alamar "Eh".

Hannunta ta kama sosai ta k'ara fashewa da kuka "Ki yi hak'uri duk da cewa ni ban da laifi, amman nasan alhakinki ne yake ta bibiyata, na san Yaya Jabir bai kyauta miki....................." A zaburai Khadijatullahi ta mik'e dai-dai lokacin Aunty Murja ta fito ta ji duk abin da Nihal ta ce wato hakan na nufin mahaifin Jabir shi ne mijinta, kanta ne yayi matuk'ar sarawa ta shiga maimaita innalillahi wa'inna ilaihi raju'un a fili.

Alhaji Mansur da Hajiya Maama sun yi matuk'ar jirjiga da jin wannan al'amarin "wato daman Khadija ita ce wacce wannan tsohon d'an iskan ya lalata rayuwarta" Hajiya Mama ta fad'a tana cigaba da jinjina lamarin, Khadijatullahi kuwa fita tayi da gudu Aunty Murja ta bi bayanta domin tsayar da ita, Nihal ma bin bayan su tayi ita kuma Amatullahi zama tayi tana cigaba da jin farin ciki domin kuma ta dad'e tana neman hanyar da zata addabawa Jabir sai gashi yau ta samu cikin sauk'i "ai kuwa sai na tabbatar na gasa maka aya a hannunka Jabir" Amatullahi ta fad'a a cikin zuciyarta.

A zaure Aunty Murja ta rik'e Khadijatullahi ta rungume nan suka shiga kuka, Nihal ma zuwa tayi ta rungume su tana ita ma kukan take tana jin sonsu yana ratsa dukkannin zuciyarta, Shahida da Yaya Aliyu ne suka shigo gidan suka tarar da su sun rungume juna suna kuka, da sauri Shahida ta k'arasa kusa da su tana tambayar "meya faru? Ko mutuwa aka yi?" Nihal ce ta fad'a musu duk abin da yake faruwa, nan fa ita ma Shahida ta fashe da kuka har da kururuwa ta rumgumesu suna kukan tare.

Aliyu ne ya shiga rarrashinsu da kalamai masu dad'i har ya samu kayi shuru haka suka koma cikin gidan Shahida da Nihal suna rik'e da hannun Khadijatullahi, zama suka yi jungum-jungum kamar gidan makoki, Amatullahi ce ta shiga jan su da hira domin kuwa ita kad'ai ta san abin da take shiryawa a kan Jabir domin kuwa sai ta tabbatar ta wulak'antasa sai ta saka shi a cikin bala'i da masifa sai ta hanashi kwanciyar hankali.

(ni kuwa na ce Jabir ka shiga uku gurin Amatullahi iyayen fitina, ba'a tab'a ma yi take barantana an tab'o bestynta😂😂🥳)

Haka kowa ya sake suka fara tab'a hira sama-sama, suka shiga gyara gidan da yin girke-girke duk da cewa Alhaji Mansur ya saka ayi musu order abincin bikin amman Hajiya Mama ta ce su ma ba za su zauna ba dole su k'ayin wasu abincin, shi kuwa Aliyu idanuwansa suna kan Khadijatullahi duk inda tayi sai ya bi ta da kallo tausayin yarinyar yake matuk'ar ji sosai sai kuma a yau ya k'ara tabbatarwa da cewa Jabir tabbas baya cikin jinsin mutane, sai dai aljanu domin kuwa ko wasu aljanun ma ba zasu iya aikata abin da yayi wa baiwar Allah salihar mace irin Khadijatullahi ba.

Daman duk abin da aka sakawa lokaci dole sai ya zo tun kafin k'arfe 2:00pm 'yan uwa da abokan nan arzik'i suka cika gidan damkam har wajen gidan Teemarh ma ta zo, walimar tayi matuk'ar k'awatarwa domin kaf mutanan da suka cika gidan har da wajen gidan sai da suka samu abin ci wadatatce, shi kuwa Alhaji Mansur gidan ya tafi domin shirya tarbar Amaryarsa bayan sun keb'e shi da mahaifinyarsa sun tattauna a kan yadda zasu shawo kan matsalar Khadijatullahi, haka aka shiga yin walima sai wajen k'arfe 7:00pm sannan kowa ya watse aka shiga kuma shirye-shiryen kai Amarya, Hajiya Mama ta ce ita da kan ta zata kai Aunty Murja gidanta bata buk'atar kowa.

Shahida ta ce "Wallahi daman Hajiya Mama ba na son komawa gidan nan, shiyasa na gudo nan, ba zan koma ba" Nihal ta ce "Hmm ai kuwa dai nima a nan zan zauna ba zan koma ba" Hajiya Mama ta ce "to su Khadija ma sai su zauna tare da ku nima ba zama zan yi ba ina kai ta zan dawo" suka amsa da "to a dawo lafiya" Haka suka fita daga gidan fuskar Aunty Murja a lillib'e take da mayafi, Aliyu yana biye da su domin shi ne zai kai su.

Bud'e musu murfin bayan motar yayi sannan suka shiga ya rufe ya shiga mazaunin driver ya ja motar sai gidansu yana zuwa mai gadi ya wangale masa tafkeken gate d'in gidan ya shiga yayi parking sannan ya fito ya bud'e musu motar suka fito, babban falon gidan suka nufa Teemarh wacce bata dad'e da dawowa daga walimar ba tana ganin shigowar Aunty Murja da Hajiya Mama ta fara yin gud'a wacce hakan ta jawo hankalin Hajiya Asiya da Jabir suka fito ganin Hajiya Mama da wata wacce suke da tabbacin ita ce Amaryar hankalinsu ya tashi zuciyarsu ta shiga harbawa da k'arfi ita kuwa Teemarh gud'ar ta cigaba da yi kamar zata fasa musu dodon kunne, a kan kujera Hajiya Mama ta zaunar da Aunty Murja sannan ita ma ta zauna Aliyu kuwa yana shigowa d'akinsa ya shige tun kafin su Jabir su fito.

Alhaji Mansur ne ya fito daga d'akinsa fuskarsa d'auke da murmushi yana yi musu sannu da zuwa, zama yayi Hajiya Asiya kuwa ta shiga zage-zage tana nuna Hajiya Mama da yatsa tana cewa "ke ce babbar munafukar da ki ka had'a auren nan ko to wallahi............" Ai bata k'arasa fad'ar abin da zata ce ba, sai jin saukar mari tayi a fuskarta Alhaji Mansur ne ya zabga mata mari yana cewa "tabbas yau kin k'ara nuna min cewa ke, babbar jahila ce, dak'ik'iya wacce kwata-kwata ba ta da tarbiyya dabba kawai" Jabir yayi matuk'ar fusata da jin abubuwan da mahaifinsu yayi wa Maminsa cikin hargagi ya fara cewa "Kai Abban nan wane irin mutum ne kwata-kwata zuciyarka kamar ta kare take ya kama......." Wani irin naushi Alhaji Mansur ya kai masa a biki domin cike yake da bakin cikinsa ai kuwa sai ga jini nan ya fara zuba kamar da bakin kwarya wani naushin ya k'ara kai masa a fuska, Hajiya Asiya ganin Alhaji Mansur yana ta yi musu rashin mutunci a gaban Amaryarsa da kuma sirikarta Teemarh Amman Hajiya Mama ba ta ce komai ba nan ta k'ara jin tsanar Hajiya Mama haka ta kama hannun Jabir suka shige d'akinta.

Teemarh kuwa ita ma d'akinta ta shiga tana jin dad'in hukuncin da Abba yayi wa mijinnata da uwarsa, Alhaji Mansur kuwa zama yayi a kan kujera yana huci haka Hajiya Mama tayi musu nasiha a kan zaman aure da kuma yin hak'uri da juna, ta tashi ta fita ado driver ya bud'e mata mota ya shiga mazaunin driver ya ja motar domin ya kai ta gida.

Aunty Murja ta tashi ta nufi gurin mijin nata ta zauna kusa dashi tare da cewa "Yaya ya kamata ka yi hak'uri ka tashi domin mu je mu kwanta nasan ka na jin bacci, b'acin rai bai chanchanta a wannan kyakkyawar fuskar ba" Duk da irin tsananin fushin da yake yi sai da yayi murmushi domin kuwa ko ba komai wannan daren bai kamata ace yana cikin bak'in ciki ba, ya kamata ace yana cikin farin ciki sosai, haka ya tashi suka shige cikin d'aki suka lula duniyar soyayya.

*'BANGAREN HAFSA💓*

Hafsa da Safwan kuwa wata iriyar tsatatatciyar soyayya suke yi wa junansu ji suke kamar zasu cinye junansu kullum a rana sai sunyi waya ta kai sau ashirin kuma kullum a gidan yake breakfast idan ya dawo daga office ma sai ya biyo Hafsa ta cika masa ciki da dad'ad'an abincinta sannan yake hucewa gida, Khalid kuwa yanzu sam har baya so ayi masa maganar komawa gurin Mommynsa saboda irin yadda Hafsa take kula dashi kullum suna manne da juna kamar cingum zaune take a kan kujerar d'akinta zuciyarta babu dad'i ganin hoton katin d'aurin auren Aunty Murja da tayi a t.v gashi har gidan su Khadijatullahi ta je amman a rufe yake "yanzu duk yadda muke dasu Khadijatullahi zasu iya ware ni, har ayi bikin Aunty Murja ba su fad'a min ba" Wani irin kuka ne ya zo mata, a haka Safwan ya shigo d'akin nata ya tarar da ita tana kuka da sauri ya zauna kusa da ita yana tambayarta "Amrish me ya faru?","Su Khadijatullahi ne" ta fad'a cikin kuka, a rud'e ya ce "meya samesu?","bakomai Yayana su Khadijatullahi ba su kyauta min ba, har ayi bikin Aunty Murja ba su fad'a min ba, me na yi musu ai ko menayi musu bai kamata ace sunyi min haka ba". Shuru Safwan yayi yana jin wani irin zafi ganin hawaye yana zuba daga fuskar Amrish d'insa nan ya shiga rarrashinta anan ne take fad'a masa sunan mijin Aunty Murjan da taje an fad'a a t.v "Laaa ai nasan gidan Hajiyarsa har gidansa ma na sani, saboda a ma'aikatarsa nake aiki".

"Haba Yayana da gaske ka ke" Ta fad'a tana share hawayen fuskarta, "wallahi da gaske ki bari gobe zan zo da sassafe na kai ki gidan Hajiyarsa ina tunanin suna chan yanzu kin ga dare yayi k'arfe goma na dare babu damar fita" Ba'a san ranta ta yarda ba haka suka yi sallama ya tashi ya fita domin tafiya gida, ita ma Hafsan ta koma kan gadon domin tayi bacci zuciyarta a cunkushe.

*'BANGAREN SALIS😣*

Kwanan Salis uku a asibiti bai san wanda yake kansa ba hankalin Mama yayi matuk'ar tashi, ganin tilon d'an nata cikin yanayin rayuwa ko mutuwa, kuka take yi sosai kamar ranta zai fita ta kama hannun Salis d'in tana cewa "dan Allah tashi duk abin da kake so zan yi maka, kasan kai ne kad'ai yarona kai nake kallo na ji dad'i "Ai baki fara kuka ba, domin kuwa duk halin da Salis yake ciki ke kika jawo masa, ki ka je kika rabasa da matarsa ai gashi nan yanzu sai ki dafasa ki cinyesa" Mahaifin Salis ya fad'a cikin fushi, Mama bata iya tankawa ba, sai kuka shi kuwa takaici ma ya hanasa zama ya fita daga d'akin zuciyarsa cike da bak'in ciki.

*'BANGAREN AMINAN JUNA AMKHAHAF😂💓*

Kamar yadda Safwan ya ce mata zai zo da sassafe ya kai ta gidan Hajiya Mama haka kuwa aka yi yana zuwa ko yarda ya shiga gidan ba ta yi ba, ta taresa a farfagiyar gidan bai musa mata ba ya juya ya nufi motarsa ya bud'e mata gurin mai zaman banza ta shiga ya rufe ya zagaya gurin driver ya shiga ya ja motar ya nufi gidan Hajiya Mama yana zuwa ya nunawa Hafsan gidan ta fita suka yi sallama ya nufi ma'aikatarsu kasancewar su Hafsa yau lahadi babu makaranta.

Ta shiga gidan da sallama a bakinta suna zazzaune a tsakar gida Amatullahi da Khadijatullahi suna ganinta suka tashi da sauri suka nufi gurinta suna murmushi rungumeta zasu yi tayi saurin dakatar da su cikin muryar fushi da cewa.

"Ba na buk'atar jin komai daga bakinku nagode sosai, kun ji nasan irin zaman da zan yi da ku" Tana gama fad'ar haka ta juya zata fita Amatullahi ta rik'eta sosai tana cewa "Wallahi ba inda zaki je, nasan a kan bikin Aunty Murja da ba'a fad'a miki ba shiyasa kike fushi, to ki tsaya ki saurareni dan Allah Hafsa wallahi! wallahi!! wallahi!!! Kin ji na rantse miki ko, mu kan mu ba mu san da bikin ba, sai da muka zo gidan Hajiya Mama sannan" Fizge hannun Amatullahi tayi daga jikinta ranta a b'ace ta ce "daman baku yi niyyar na zo ba, tunda ranar ma a school babu yadda ban yi da ku ba, a kan ku shiga mota a kai ku gida ku ka k'i, kuma lokacin da ku ka hau adaidaita Yaya Safwan ya bi hanyar da ku ka bi, sai gani na yi kun bii hanyar gida anan na tabbatar kawai daman bakwa buk'atar cigaba da mu'amalarmu".

Khadijatullahi jikinta yayi sanyi dan kuwa ta san bata kyautawa k'awarta ta ba domin ita ce da laifi Amatullahi babu ruwanta nan, rik'e hannun Hafsan tayi lokacin da ta juya zata fita, ta juyo da niyyar fizgewa sai ta ga Khadijatullahi ce kuma tana tsoron karta fizge ta je ta fad'i tunda cikinta yanzu ya tsufa sosai ya kai wata takwas, "me zaki ce min ke kuma?" Hafsa ta fad'a cike da masifa, "ki yi hak'uri dan Allah wallahi ba wai da niyya mu ka yi miki haka ba, kuma Amatullahi kwata-kwata ba ta da laifi ni ce nake da laifin dan mana k'aunar abin da zai sake had'a ni da wani namijin na tsane su, ba na son ganinsu, amman bikin Aunty Murja wallahi kamar yadda besty ta ce ba mu san dashi ba mu ma sai da muka zo ake fad'a mana, kuma lokacin ya ri ga ya k'ure shiyasa ki yi hak'uri".

Hafsa tayi shuru tabbas ita ma ranar sai da ta raya wannan abin a zuciyarta cewa Khadijatullahi ba ta son ganin maza shiyasa ta k'i shiga motar "Shikenan ya huce" Hafsa ta fad'a tana murmushi, murmushin su ma suka yi gaba d'ayansu.

Aliyu ne ya shigo gidan idanuwansa a kan Khadijatullahi duk ya ji abin da suka fad'a zuciyarsa ta shiga bugawa magana Khadijatullahi ta girgiza shi ba ma shi kad'ai ba har da su Hajiya Mama domin kuwa sun san Jabir shi ne silar da yasa Khadijatullahi ta tsani maza, "Assalamu alaikum" Ya fad'a har lokacin idanuwansa na kan Khadijatullahi, amman ita tun da ya shigo ta kawar da kanta domin kuwa wata iriyar muguwar tsanar Aliyun take ji saboda tsananin kamannin Jabir da take gani a fuskar Aliyun ji take kamar Jabir d'in ne.

Suka amsa masa sallamar amman ban da Khadijatullahi d'akin Hajiya Maman ta shige tayi kwanciyarta, "ko me ya kawo shi nan, banza kawai" Tayi maganar zuciyarta kamar zata fashe saboda tsanar maza da tayi mata katutu a cikinta.

Hafsa da Amatullahi kuwa k'arasa suka yi suka zauna Hafsa ta gaisar da Hajiya Mama cike da girmamawa Aliyu ma ya gaishe da ita ya zauna kusa da ita suna yin hirarsu irinta jika da kaka, Hafsa kuwa hira suka shiga yi su da Shahida,Nihal da Amatullahi, zuciyar Amatullahi ta karkata a kan ta je ta ga wace wainar ake toyawa a gidansu domin kuwa ba ta k'aunar ace Lado da Inna Larai sun shirya, tashi tayi tana cewa "Sisters zan je na dawo yanzun nan","ina zaki je besty" Hafsa ta tambayeta.

"Ginin da na fara yi ne nake tsoron kada ya ruguje" Hafsa ta gane abin da Amatullahi take nufi dan haka ta fashe da dariya tana fad'i "gaskiya ne besty, gwanda ki je ki duba shi kar ya ruguje duk aikinki ya dawo baya" Khadijatullahi da take cikin d'aki tana jin su ita ma dariyar take yi sosai har suna iya jin dariyar Hafsa ta ce "Ahhh besty ke ma dole ki yi dariya, tana tsoron kar ya ruguje aikinta ya dawo ba, kin san fa besty akwai ta da iya tsara gini mai kyau","Ai kuwa dai kam" cewar Khadijatullahi.

Wannan maganar ta su ta saka su Hajiya Mama a rud'ani har Amatullahi tayi musu sallama ta fita, da Hajiya Mama ta gaji ta tambayi Hafsa "me take nufi da kar gininta ya ruguje?" Nan Hafsa ta fad'a musu abin da take nufi da hakan, Nihal da Shahida dariya suka saka sosai har da hawaye "Ai daman na fuskanci sister ba k'aramar 'yar drama ba ce" Shahida ta fad'a "wallahi kuwa other half" Hajiya Mama dai girgiza kai kawai tayi Aliyu kuwa yana son yin dariya ya basar, suka cigaba da yin hirar ta su.

*'BANGAREN INNA LARAI,LADO DA KUMA AMATULLAH*

Cikin sauri sauri ta k'arasa gidan tana saka kanta a sauron gidan ta ji muryar Inna Larai tana cewa "dan Allah kayi hak'uri mana Lado tunda ya ce a wannan satin zai turo kud'in sai ka tsaya satin idan ya huce ka ga bai turo ba, sai ka fad'i duk abin da zaka ce, tunda dai kasan k'aryar da nayi masa cewar ginin d'akina ne ya fad'i na gyara ban bada kud'in ba, kai ma kasan zai turo kud'i" Amatullahi tayi wani irin murmushi "lallai kam da ace ban dawo ba, da tuni ginina zai ruguje, amman yanzu na dawo zan d'ora daga inda na tsaya" Tayi magana a zuciyarta.

Shiga gidan tayi ko kad'an ba ta nuna ta ji abin da suke fad'a ba, ta saki wani irin murmushi tare da cewa "sannunku da hutawa Inna, my love nayi missing d'inka" Tayi maganar tana kallon Lado fuskarta tana nuna alamun tsantsar damuwa.

Lado ya k'ak'alo murmushin dole ya wanzar a kan fuskarsa "nima haka my love" Ya fad'a tare da mikewa tsayi yana cewa "zan fita waje na d'an sha iska my love ki kula da kanki" Yana gama fad'ar haka ya fita ransa a b'ace shi sam baya k'aunar yi wa Amatullahi magana kuma duk Inna ce ta jaaa masa gashi ta zamar masa k'arfen k'afa.

Ita kuwa Amatullahi d'akinta ta shiga tayi wanka, sannan ta fito wata doguwar ce a jikinta blue tayi mata matuk'ar kyau tamkar dan ita aka yi rigar, fita tayi daga gidan ta nufi gurin mai kiran waya ta biya shi kud'in sannan ya bata wayar ta saka number babanta sannan ta matsa chan nesa da mai kiran wayar domin kar ya ji abin da zata ce, ring d'aya biyu ya d'aga tare da yin sallama "Assalamu alaikum" ta amsa masa sallamar "Wa'alaikumussalam Babana Amatullahi ce","Allah sarki yarinyata nasan kinyi kewar babanki ko?" Yayi maganar cike da jin dad'in kiran da tayi masa "Eh babana nayi kewarka sosai da sosai kullum sai na ji dama nima ace na dawo gurinka mu dinga yin aikin tare","Allah sarki yarinyata karki damu na kusan dawowa insha Allahu na zo na ganki" Amatullahi ta ce "to Baba Allah ya dawo da kai lafiya","Aamin ya Allah" Sai kuma Amatullahi ta numfasa ta fara kora masa jawabi "Babana na ji wai Inna ta kira ka a kan cewa ginin d'akinta ya ruguje, ta kirawo mai gyara an gyara bata bada kud'in gyaran ba","Eh wallahi gobe ma nake shirin turo mata da kud'in dan ta biya shi kud'insa" Amatullahi ta ce "to wallahi Baba k'arya Inna take babu wani ginin da ya ruguje, so take ta damfare ka, kuma idan ka na tunanin ba gaskiya nake fad'a ba zaka iya zuwa ka duba ka gani da kanka" Shuru Malam Shu'aibu yayi domin a duniya babu abin da ya tsana irin kayi masa k'arya, gwanda ka fito fili ka fad'a masa gaskiyarka "Kin tabbatar babu ginin da ya ruguje","wallahi Baba da gaske nake yi maka" Amatullahi ta fad'a cikin fara'a, kashe wayar Malam Shu'aibu yayi ransa duk a b'ace kuma ya k'uduri niyyar ba zai bata kud'in ba kuma ko ta kirasa ba zai d'auka ba, Amatullahi kuwa mayarwa da kiran wayar tayi da wayarsa sannan ta shiga adaidaita ta nufi gidan Hajiya Mama.

*'BANGAREN SAFNA*

Tun ranar da ta ji labarin cewar Safwan da Hafsa sun shirya kuma yanzu soyayya suke yi, kuma ta fuskanci duk irin abubuwan da take yi a gidan dan ta kuntatawa Safwan d'in sam bai dameshi ba, nuna mata ma yake yi kamar bai san tana yi ba, hankalinta ya tashi zuciyarta ta shiga yi mata zafi, ta shiga neman hanyar da zata bi ta mallake Safwan d'in ita kad'ai kuma ta cusa masa tsanar Hafsa a cikin zuciyarsa amman kwata-kwata ta gaza samun hanyar, kullum cikin kuka gashi kuma kamar k'ara ruru mata wutar son Safwan d'in ake yi a zuciyarta, yau ma kamar kullum tana zaune a falo tana shan kukanta.

Safwan ya shigo falon domin ya manta wata takardar wad'anda suka siya kaya kuma ake binsu bashi, kallon Safna yayi cike da tausayi tabbas shi kansa ya san Safna tana sonshi sosai, amman kuma Hafsa ita ma tana matuk'ar son shi bai san a cikinsu waya fi son shi ba wannan Allah ne kad'ai yasan hakan, har ya huce sai kuma ya dawo domin bai zai iya barinta cikin yanayin da take ciki ba a yanzu.

Zama yayi a kusa da ita tare da kama hannunta yana murzawa, kamar jira take ta fad'a jikinsa tare da fashewa da wani irin kuka ta k'ank'ameshi kamar wanda aka ce mata idan ta cika shi guduwa zai yi, shi kuwa Safwan shafa gashin kanta ya shiga yi a hankali yana bubbuga bayanta "Yi shuru babyna ba na son kina yin wannan kukan, yana ta da min da hankali sosai","Ba ka so na yanzu, ka fi son Hafsa duk irin abin da nake maka baya burgeka shi ne zaka k'ara aure" Tayi maganar cikin kuka "Wa ya gaya miki cewar ba na