You Cannot Download this book untill you login but you can read it .

---

Login Register

je kuwa ko karatun bai tsaya ya dauka ba sai da ya fayyacewa Malam komai akan halinda Sajida take aikatawa a cikin gida. Ya fada ne dan tausayin Malam Yakubu ya na qoqarin yin tarbiyya amma ana ruguza masa.
Yadda ya ga hankalin Malam ya tashi sai Bakura ya shi ga lallashi akan ya kwantar da hankalinsa ya bi abin a hankali. Ya qara saka ido kuma yayi mata nasiha da addua .
Malam ya amsawa Bakura da "insha Allah ba zai aikata wani abu marar dadi cikin fushi ba, zai bi abin a hankali."
Anan suka yi sallama Bakura ya juya ya tafi gida.


*** *** ****
Malam ya shigo cikin gida ya iske Umma Furera da yaranta su na zaune a tsakar gida. Bayan ya yi sallama bai ce komai ba, sai kawai su ka ga ya tunkari Sajida ya zakulo wata qatuwar bulala dorina mai baki biyu daga cikin aljihunsa ya fara shadada mata a doron bayanta.
Ta na ihu saboda azaba, amma ta kasa gudu a sanadiyar cukuikuye kanta da ya yi a cikin burgujejen hijabin da ta zunbula.
Umma Furera ta zaburo da gudu za ta kwace ta sai ta ga alamunsa ya na niyyar zanbada ma ta, idan ta kuskure ta qaraso inda yake.
Sai ta daka tsalle gefe ta na kwakwazo ta na cewa
"Malam me ta yi maka? Kar ka kashe ta fa."
Malam ya daki Sajida har ya gaji liqis yayin da ya tabbatar ya farfasa ma ta baya, sannan ya rabu da ita.
Tun muryar Sajida na fitowa ta na ihu har sai da ta dishashe kamar mai mura. Ta fadi a q qasa ta yi shame-shame ta na nishi mai hade da kuka.
Yahuza kuwa tuni ya arta waje da gudu a tunaninsa dukan kan mai uwa da wabi ake yi duk wanda aka samu zaa daka.
Malam ya dubi Umma Furera ya juya ya dubi Sajida ya ce "Wannan somun tabi ne, kadan ku ka gani. Ni da ku mu zuba a cikin gidan nan. Ni da Abdulmajid zan ga wa za ku zaba, idan na jinyata ki ko na tsiyaye miki ido ai kun ga Abdulmajid zai guje ki don daman ba son Allah ya ke yi miki ba.
"Umma Furera ta zabura ta ce,"Wanne rin Abdulmajid kuma? Tsohon zance, yaushe rabon Sajida da maganar wani Abdulmajid? Ai tunda ka kwace wayarta zance ya wuce."
Malam ya daka mata tsawa ya ce "rufe min baki maci amana, ba a gabanki take hawa katanga ta ke karbar aron waya ta na yi wa dan iskan yaron nan
Abdulmajid waya ba. To zamanku ku dukka ya kusa qarewa a gidan nan, don wallahi idan na sake jin wata magana game da Abdulmajid sai na kore ku daga gidana, sai dai ku koma gidan Abdulmajid din."
Ya fice qofar gida a fusace ya na huci.
Umma Furera ta qaraso wajen Sajida a guje, ta tashe ta zaune gami da yaye hijabin da ke jikinta ta wurgar gefe. Ta kwaye rigar don ta ga irin raunin da ya ji mata a bayanta, sai ga shatin bulala sharba-sharba fatar duk ta farfashe ga jini.
Umma Furera ta dau kukan mutuwa ta na cewa
"na shiga uku, wannan wacce irin kiyayya Malam ya ke yi wa Abdulmajid haka ne. Akan Abdulmajid ya na qoqarin ya kashe 'yarsa ta cikinsa. Wannan wanne munafukin ne ya ke bibiyarmu, duk abin da mu ka yi akan idonsa ya kwashe ya fadawa Malam?"
Cikin sheshsheqar kuka Sajida ta ce, "na san Yahuza ne, gashi nan ya ruga da gudu daga gani an fara dukana."
Umma Furera ta ce, wallahi kuwa shi ne zai fada masa. Idan ba shi ba to waye a cikin gidan nan? Lallai yau Yahuza sai ya yabawa aya zaqinta, sai ya gwammace bai barka ni ya fito daga cikin cikina ba, domin ni ba zan haifi dan da zai jawo a tozarta ni a duniya ba.
Tozartawa mana idan muka sake Malam ya kore mu daga gidan nan, sai dai mu koma ruga mu yi tallar nono mu da muka saba zama a burni. Mu sha lafiyayyan kunu, ga dan wake har da albasa da salad, tuwan masara da na dawa sai wanda muka zaba. A sati mu ci shinkafa sau biyu. Naira biyar dinka ta isa ka sha pure water mai sanyi. A ruga a ina za mu ga firji?"
Wani qululun bakin ciki ne ya tokare wuyan Sajida game da maganganun mahaifiyarta.
Ta fada a fusace
"Umma ke ta ruwan sanyi da shinkafa kike, ni ta Abdulmajid nake. Yanzu duk motsin da na yi tare da Abdulmajid sai an fadawa Baba ya dake ni. Ba ni da wata hanya da zan ji muryar Abdulmajid kuma a rayuwata bayan haramta min ganinsa da aka yi kwata-kwata. Wallahi ba zai yiwu ba, sai dai Baba ya kore mu ai gara mu koma rugar kin ga Abdulmajid zai dinga zuwa ya na ganina, idan aka daura mana aure sai in tafi da ku gidana shi kenan mu rabu da Baba."
Umma Furera ta daka tsalle ta dafe kirji da hannu biyu ta zazzare ido ta ce, "rufa ni ki saya ni 'yar nan, kar ki min sakiyar da babu ruwa. Yaushe za a yi wannan danyen aikin da ni? Ai kuwa in ba ki rabu da Abdulmajid ba za mu raba hanya. Yaron mayaudari. Aka ce miki aurenki zai yi? Ai ni tunda na rabu da ruga fulani insha Allah ko gawata anan birni za a bunne ni. Wannan wasiya ce na bar miki. Haka idan Malam ya shigo zan bar ma sa wannan wasiyyar. Kuma zan shiga maqwabtan idan Malam baya nan, sai na ja kunnen Iyayye da take miqo miki aron waya in kada ta sake baki. Ahirr dinta kar in ji kar in gani. Ko Abdulmajid din ne ya bugo ya ce a baki ta ce
mahaifinki ya hana ku yi magana. Ke in ki na da zuciya ma har za ki tsaya ki na shan duka akan dan iskan nan Abdulmajid, yaron da ya ke shigowa har zaure ya na zagin mu ya na kiranmu mutsiyata. Idan da gaske yake son naki ba lalata yake nema ba, ai ko boye zai ringa ambulo miki kudi, amma ni dai ko sisinsa ban taba ci ba sai alewa cakulet mai zaqi da askirim babu abin da su ke qara min illa su sagar min da hakora. Ni ba atamfa ko leshi yake aiko min ba. Idan ya yi tafiya ne yake ciko leda da riga da skirt da wanduna ya ce ga nawa ga naki. Dan iskanci ya dube ni ya aiko min da jeans da T-shirt. Har da suyo tafka-tafka wanduna wato daidai jikina in tsuke in fita qofar gida cikin almajirai mu yi wakar Micheal Jackson kenan, ko mu yi rawar nanaye."
Sajida ta fusata ta miqe da sauri ta na buga qafa, ta shiga cikin daki ta na cewa "To wallahi tunda takura min za'a yi, cikin dare zan hada kayana a neme ni a rasa tunda abin haka ne."
Umma Furera ma ta na ta babbamin fadanta a gindin murhu inda ta kunna itace ta dora ruwan zafi cikin qatuwar tukunya don gasawa Sajida jikinta don duk ya farfashe.
Bayan Umma Furera ta gamawa Sajida gashin baya da tsumma da ruwan dumi, ta umarci Sajida ta daure ta shiga bandaki ta yi wanka da zazzafan ruwa, saboda ciwon jiki. Bayan Sajida fito daga wanka suka dasa kujerar zama su na jiran shigowar Yahuza, domin su dauki fansa akan masifar da ya jawo mu su a sanadiyyar gulma, munafunci da tsegumi dukka ya iya.
Shiru-shiru Yahuza bai shigo gidan ba, dare ya fara nutsawa, goma tayi har Malam ya shigo ya shiga daki ya kwanta babu Yahuza, babu dalilinsa. Daga nan su ka gasgata zargin da suke yi wa Yahuza cewar shi ya aikata, don haka ya qi dawowa. Ba su damu su dauki gyalensu su fita nemansa ba, haka ba su damu su fadawa Malam cewar har yanzu Yahuza bai shigo gida ba. Daman ya saba idan ya ga dama ya kwana a qofar gida cikin almajirai. Idan ya so ya kwana da almajiran zaure, haka idan ya so ya shigo cikin dakinsa ya kwana. Daman ba rufe gida ake yi ba qofar daki ake sakayawa. Don haka Yahuza bai dawo ba su ka gaji da jira sai suka yankewa kansu shawara su tafi su kwanta.Allah ya kai su gobe ai dole zai shigo da safe daukar kayan makaranta a dakinsa, to anan sai su yi caraf su damke shi. Umma Furera ta shiga dakinta, Sajida ma ta shiga na ta akurkin. Kowa ya jawo bushashshen katakon da aka laqabawa da suna qofa ya rufc. Sabanin Umma Furera Wacce tana shiga daki minti biyar ya yi yawa ka fara jin jiniyar munsharinta na tashi, amma Sajida fiye da awa biyar bacci ya yi wa idanuwanta yajin aiki. Juyi take akan 'yar kațifarta yaloluwa irin ta 'yan makaranta, ta kasa bacci saboda tsananin takaici da tashin hankali. Sai a lokacin ne ma ta yi kukan dukan da aka yi mata, don dazu azaba ta hana ta kuka. Sheshsheqa take tana ajiyar zuciya, fadi take bayyane.
"Wayyo Majid dina."
Kaico! Soyayya gamon jini, ko shi Abdulmaji din da ake yi dominsa a wanne hali yake a daidai wannan lokaci? Ohoooooo!!! Asubah ta gari SajiMajid.

*** *** ***
Washe gari da sassafe Sajida ta fito tsakar gida tana mika game da doguwar hamma, ta cije baki ta matsa gabobin hannayenta ta danna doron bayanta, saboda ciwon da suke yi mata a sanadiyyar bugun da ta sha.jiya. Umma Furera kuwa tunda Asuba kiran fari ta hau hidimar dora ruwan koko da wainar geron da take yi da safe ta siyarwa, dan haka tana gindi murhu a tsakar gida.
Malam kuwa tun kafin kiran fari na asuba ya yi alwala ya fice, sai kuma da hantsi zai shigo gida.
Yahuza ne ya shigo cikin gida cike da fara'a da farin ciki. Wata qaramar baqar leda ce a hannunsa. Ya dubi mahaifiyarsa ya juya ya dubi Sajida bai kula da kibiyoyin harare-hararen da suke harbo masa ba.
Yayi dariya ya ce, "Kun san meye a cikin ledar nan kuwa? Soyayyan dankalin turawa ne da kwai, na bi almajirai bara cikin Badawa layout gidan da Abashe yake aiki aka ba mu sadaka. Ashe almajiran nan dadi suke ci. Nima daga yau idan zasu je sai na bi su. Wallahi attajirai nan wayo suke yi mana dadi suke ci. Idan Baba baya nan almajiran nan zan dinga bi bara. Haka jiya shinkafa da kaji muka ci a qofar gida. Muzanbilu ne ya samo mana."
Umma Furera ta daka masa tsawa, ta ce "rufe min baki munafuki, kai za ka yi laifi a rufa maka asiri, amma kai ka kwashi maganar da ba a saka a ciki ba ka je ka yi gulma. Yau sai na fasa maka baki. Bari Malam ya shigo, sai na fada masa ashe har yanzu ka na zuwa
bara."
Sajida ta fisgo ledar dankalin da ke hannunsa ta zazzage a cikin bokitin sharar da ke kusa da ita, tasa tsinke ta daddanna ta cakuda da bolar. Yahuza ya ji tamkar 'ya'yan hanjin cikinsa ta yi wa haka. Don a
halin yanzu ya fi son dankalin nan akan rayuwarsa. Ya kwalla wani ihu kai ka ce ransa ake kokarin fitar masa.
Ihu yake ya na kiran
"Wayyo dankalina, na shiga uku na lalace. Wallahi sai na fadawa Baba."
Sajida ta ce, "Ka fadawa Baba ka tonawa kanka asiri, daman ai ya hana ka zuwa bara."
Sajida ta jawo shi ta durkusar a gabanta, sannan ta kwaye masa riga ta bayansa, sai ga doron bayansa muraran ta dauko takalmin danko ta yi ta lafta masa, ya na ihu ya na tambayar abin da ya yi mata. Kamar yadda lokacin da Malam ya dinga nadarta ba ji ba gani, har sai da ya gaji haka ita ma ta lode shi har Sai da ta gaji da kanta, ta sake shi. Bayan da ta tabbatar bayansa ya dau shaida kamar yadda na ta ya dauka, wannan tabon in ba sa'a ta ci ba har mutuwarta ba zai bace ba kuwa.
Umma Furera na can ta na saka gayan koko fadi take, "Bar shi haka, ai ya daku."
Yahuza ya laftu a qasa ya na narkar kuka gami da gungunin da ba a fahimtar abin da yake cewa ba. Amma idan kunnuwansu ba su yi kuskure ji ba sun jiyo musu yana cewa, "Haka kawai dan cin zali ki yi ta dukana babu abin da na yi miki."
Umma Furera ta fada cikin daga murya ta ce, "Ka san abin da ka yi mana. Idan ba ka san abin da ka yi ba yaya za a yi daga fara dukan Sajida za kä arce waje ba ka sake shigo ba sai yau."
Sajida ta zo ta murde masa kunne ta ce, "To bari in karanto maka abin da muke nufi. An yi walkiya mun ganka munafuki asha kai ne ka ke zagayewa ka ke fadawa Baba maganar Abdul majid. Ka dade ka na hada min tuggu, kasa na bata da mutane da yawa, wadanda kake cewa sune suke fadawa Baba in an ganni da Abdul majid. Musamman na rannan da na fita karbo littafi a gidan su Asiya na hadu da Abdulmajid ina dawowa gida Baba ya shigo ya yi min duka har ka ke ce min wani mutum ne ya zo a mota qofar gida shine ya fadawa Baba har da cewa za ka nuna min mutumin.Ashe babu wani mutum kai ne munafukina. Idan rannan ka ce wani mutum ne ya ganni a waje ya zo ya fada, a cikin gidan nan da nake hawa katanga ina karbar aron waya ina kiran Abdulmajid waye ya shigo ya ganni, shi ma munafukin mai motar ne ya zo ya fada?"
Umma Furera ta ce, "Ke kike biye masa ma, kike maganar wani mai mota, wanne mai mota ne ya zo ya fada? Wanne babban mutum ne mai mota wanda ba shi da ailkin yi har zai zo ya ce ya ganki da Abdulmajid? Yaushe wani mai mota ya sanki har ya san gidanku, har ya san a gidanku an raba ki da Abdulmajid kin ki ji?
'Yan unguwar nan ne kawai suka sanki, suka san Malam ya raba ki da Abdulmajid su ne suka sha kawo gulma, kuma babu wani mai mota a cikinsu. In har da gaske ne ka fadi sunan mai motar mana, ai kai ne idon gari babu wanda baka san shi a cikin unguwar Kawon nan ba, har unguwar Giginyu shiga ka ke ka nemo labari."
Sajida ta ce, "Ga gaskiya ma ta fito abu a cikin gida akan katanga har Malam ya sani na san da Iyayye ba za ta fada ba ta ce ita take ba ni aron waya in yi, idan ta fada ma ta tonawa kanta asiri, don sai Malam ya shiga har gida ya zane ta. Babanta ma idan ya ji sai ya kwace wayar. Waye zai fada in ba kai ba"
Yahuza ya zabura ya miqe tsaye cikin kuka yana cewa, "Wallahi ban taba fadawa Baba ki na aron waya ta katanga ki na yi wa Abdulmajid waya ba. Saboda na san irin dukan da yake yi miki. Ni kuma tunda ku ka ce ni na fada masa, Baban ya zo nan gani, ga shi, ga ku a tambaye shi idan na fada masa wata magana. Yaushe ma muke zama da Baba mu yi hira shi da yake da baqi ko da yaushe kora ta yake ko na zauna a cikinsu."
Yahuza ya fice da sauri ya na kuka sharkab. Sajida da Umma Furera suka bi shi su na kwalla kiran sunansa, amma abu ya ci tura. Tuni Yahuza ya keta zaure, ya wuce dandamalin qofar gida, ya tsallake kwata, ya bi ta kan bola ya tunkarí masallaci. Bai dire a ko'ina ba sai a lungun liman a gaban mahaifinsa. Yahuza. magana take amma ba'a fahimtar abin da yake fada wani tsatstsaman kuka da yake tasowa daga can cikin zuciyarsa a inda jiyiyoyin idanuwansa suke zuqo wani ruwa mai dumin gaske su na fesarwa saboda tafarfasar da zuciyarsa ke yi da tsananin quna da soyuwa.
Malam ya dade ya na tambayarsa haka Yahuza ya dade ya na bada amsa, amma ganewa ta ci tura, saboda hayaqin da bakinsa yake na takaici. Malam ya kamo hannun dansa, abin qaunarsa Yahuza ya nufo gida don jin ba'asi.
Sajida tsaye take a tsakar gida ta na kai kawo cikin zulumi da fargabar abin da zai je ya zo.
Fada take, "Umma, kar fa yaron nan ya je ya hada min tuggu, Baba ya zo ya sake yi min duka irin na jiya."
Ta na rufe bakin sai ta ji sallamar mahaifinta ya danno kai cikin gida riqe da hannun Yahuza. Ta zabura ta daka tsalle sai ga ta a bayan Umma Furera ta buya.
Malam ya fada cikin sanyayyiyar murya, "Tsaya daina gudu, ba dukanki zan yi ba. Don me zan dinga dukanki kamar jaka? Ai bambancin dabba da mutum shine hankali shi ne tunani da jin magana. Me yake faruwa ne Yahuza ya je min da kuka?"
Da Yahuza ya ga sun fara hanya-hanya su na qoqarin baudewa su gyara magana, sai ya yi qoqarin kashe gobarar da take ci a makogaransa, don ya ceto muryarsa ta fito radau dan ta cece shi. Ya rangada bayani tas yadda aka yi tun daga farko har karshe. Kan ka ce kwabo idanuwan Malam sun ciko da hawaye, ya dubi Yahuza duba irin na tausayi. Ya sa hannu ya share masa hawaye.
Ya ce, "Allah sarki, sun dauki alhakinka, sun
zarge ka da laifin da ba ka aikata ba. Sun yi kuskure wajen yanke maka hukunci. Idan ba yafe musu ka yi ba, Allah sai ya kama su da hakkin zalumci. Ka je ka saka kayan makarantarka, ka karbi koko ka sha ka zo in raka ka makaranta, saboda sun sa ka makara."
Yahuza ya nufi dakinsa ya na goge hawaye yayin da zafin da ke qona zuciyarsa ya fara hucewa a sanadiyyar haqurin da mahaifinsa ya ba shi.
Malam ya juya ya dubi Sajida da mahaifiyarta wadanda kowannensu ya yi wuqi-wuqi da ido a lungu su na jiran hukunci a game da ta'addancin da su ka aikata da sanyin safiyar nan.
Ya ce, "Kun dauki alhakin yaron nan, ku nemi gatararsa wallahi Yahuza bai taba fada min wata magana game da Abdulmajid ba, sai dai ma ya dinga boye min abin da ke wakana don kada in doke ki. Kin manta irin tashin hanklin da yake shiga tun ya na yaro idan ina dukanki?Kin san dai ba na tsoronki kuma ba na mahaifiyarki, da har zan yi muku rantsuwa Alan dan kar ku qara dukan Yahuza. Ina da ikon da zan saka dokar kada a qara dukan Yahuza har ya girma, kuma dole a bi maganata. Dan haka kar in sake ji ko in gani an bakantawa yaro a bisa laifin da bai ji ba kuma bai gani ba. Ko yau kika kula Abdulmajid a fili ko a waya labari zai ruske ni, zan dauki mataki mafi tsaurin gaske akan ku, ku dukka."
Daidai lokacin Yahuza ya gama shan koko ya dauko jakar makarantarsa, Malam ya kama hannunsa suka fice ya raka shi har cikin Giginyu Primary.
Sajida ta sulale ta zaune gami da jan wata
doguwar ajiyar zuciya mai dauke da jimami hade da rudani. Haka Umma Furera ta shiga irin wannan hali ba shiri ta lalubo 'yar kujerarta ta zauna ta doka tagumi.
Lokaci mai tsawo aka dauka aka rasa wanda zai fara magana a junansu. Ba tare da Sajida ta yi niyyar furtawa ba bakinta ya yi caraf ya fitar da tambayoyin da suka addabi zuciyarta.
"Wannan wanne munafikin ne yake bibiyata akan Abdulmajid? Wallahi sai na gano munafukin nan da yake so ya raba ni da Abdulmajid, ko waye ko kuma ko wacece, duk tsufanta ko kuma duk tsufansa ko da
gemunsa ya na ja da qasa, sai na ci mutucinsa na tozarta su ko da yin haka zai jawo a raba ni da numfashina a duniya."
Umma Furera ta ce, "hakika na yarda ba Yahuza ba ne ya fada, don da Malam ba zai boye ba. Kuma duk abin da Malam ya yi rantsuwa gaskiyar ta kai gaskiya. Daman Yahuza ban san shi da gulma ba, shi dai a bar shi da kwadayi da roqo. Kash na dau alhakin d'ana."


*** **** ****
Da daddare misalin qarfe goma, bayan Zahra ta yi sallama da mahaifanta t shiga kwanciyar barci. Ta cikin falonta ta wuce kai tsaye zuwa dakin da gadonta yake. Shigarta ke da wuya sai ta zarce bandaki don ta watsa ruwa. Ta fito ta wuce kai tsaye durowar da ta jera rigunan bacci kawai kala-kala wanda a kalla sun fi kala hamsin. Riga da wando, riga da siket, doguwar riga ba masu santsi da masu laushi (cotton). Ta zabi wata 'Yar yaloluwar riga iya gwiwa ta saka, ta zo ta shiga bargo. Bayan ta gama addu'o'in kwanciya barci ta shafe jikinta tun daga kanta har kafafunta. Ta lumshe ido yayin da sanyin split A.C da ke kunne a dakin yake bi sanka-sanka