You Cannot Download this book untill you login but you can read it .

---

Login Register

gida ya juya da kan motar shi ya fita a layin, lallai akwai wani abu a tattare da yarinyar amma ko meye zai yi ƙoƙari ya gano shi.

Nusram kuwa tana shiga gidan ta tarar Sahurar na jiran ta, dan haka ruwan dake saman murhun su ta juyo, yayin da Nusram ta shiga ɗaki ta ɗauko haɗin man da take wanke kai.

Sai da ta fara shafa mata haɗin Kanumfari da Kaltufah, ta saka leda ta rufe sannan ta ɗauko abin lallen ta fara kwaɓawa, sai da kan yayi tsayin minti goma sha biyar sannan ta buɗe kan, ta ƙara tajewa kafin suka je bakin famfo ta wanke mata.

Kan yayi kyau sosai dan babu laifi Sahurar ta ɗan kwaso dangin mahaifin nasu, Ameera ta Kalli Aziza ganin yadda kan yayi kyau yake kuma sheƙi.

Sai da ta tsane kan gaba ɗaya sannan ta ɗauko haɗin mayukan musulunci, Man zaitun, man hulba, man habbatus-saudaa, man maciji da kuma ɗigon man ayu, ta ware mata kan tana shafawa tana tajewa haka tayi har kan ya saki sannan ta naɗe mata gashin inda take so ko'ina man ya shiga, idan kaga gashin Sahura a lokacin zaka ɗauka taje wajen masu wanke kai ne.

Ita kanta sai da ta kasa yin shiru tace; "Nusram Allah kuwa da zaki buɗe wajen gyaran kai da jiki ko ba ƙaramin ciniki zaki yi ba", Nusram tayi murmushi kawai ba tare da tace komai ba.

Jan lalle ta fara tsantsara mata, sannan ta ɗora mata baƙi a sama, kan wani lokaci ta gama zana mata lallen, sannan ta ɗauko kibiya ta hau yi mata kitson.

Mama Jummai dai sunyi sa'a dan ko kallon inda suke bata yi ba, aikin gaban ta take yi wato ƙoƙarin ɗora abincin siyarwar ta kenan take yi domin rana ta fara yi.

Ƙananan kitso Nusram ɗin ta yarfawa Sahurar wanda yayi kyau sosai, kan wani lokaci sun gama domin kuwa Nusram ɗin tana da sauri akan ayyukan nata.

Tashi tayi taje tayi Alwala sannan ta shige ɗaki inda ta bar Sahura a zaune domin barin ƙunshin nata ya ƙara ja, koda Nusram ta idar da sallah sannan ta ɗebi abinci.

Tana ci tana yiwa Kubra wasa wacce itama kwanon abincin ke gaban ta, duk ta watsa shinkafar a ƙasa.

Ummi ta kalli Nusram sannan tace; "ina so ki faɗa mini gaskiya Nusram shin kina son wannan auren da mahaifinku zai muku?".

Nusram tayi murmushi tace; "Ummi me kika gani?, nifa wannan be dame ni ba kuma ina farin ciki ko babu komai zan bar gidan nan sannan ƴar uwa ta ma Allah ya cika mata burin ta wato zamu yi aure lokaci ɗaya".

Ummi ta kuma cewa; "amma ai ya kamata ki tabbatar da cewa kina son shi kafin auren bana so kiyi abinda zaki yi nadama sannan bana so ki fuskanci matsala a gidan auren ki".

"Insha Allah Ummi ba zan fuskanci wannan matsalar ba, zan yi farin ciki kamar yadda kike mini burin yi", abinda Nusram ɗin ta bawa Ummi amsa kenan.

Ummi tace; "shikenan tunda haka kika ce Allah ya baku zaman lafiya, amma ki sani shi aure ba abin wasa bane idan har kun haɗu kinji bakya son shi to ki sanar dani ni kuma zan yi iya ƙoƙari na wajen ganin ba'a ɗaura wannan auren ba".

Nusram ta riƙo hannun Ummi tace; "kada ki damu kanki Ummi, Insha Allahu zan so shi kamar yadda kowacce mata ke son mijin ta", ba don Ummi ta yarda da abinda Nusram ta faɗa ba ta ƙyale ta.

Sai wajen biyu sannan Nusram ɗin taja ruwa a rijiya inda ita kuma Sahura ta miƙe taje wajen ta, Nusram da kanta ta wankewa Sahurar lallen sannan ta shafa mata muhallabiyya aikuwa yayi kyau sai shinning yake yi.

Sahura sai washe baki take yi ganin yadda tayi kyau sosai ga wani ƙamshi da tafin hannun nata yake yi, domin dai kowa ya san ƙamshin muhallabiyya akwai daɗi sosai.

Koda ta shiga ɗakin su da murnar ta ta nunawa Mama Jummai, Mama Jummai tace; "na fani yayi kyau sai dai ki cirewa ranki komawa gidan Idris".

Sahura ta turo baki gaba kafin tace; "amma ai Baba ya yarda ko?", Mama Jummai taja tsaki tace; "ai ya yarda ne saboda kada ya dinga cefane dake, yau Alhajin da zai auri Nusram zai zo don haka ina so ki san yadda zaki yi ki ɗauke hankalin shi daga kanta".

Sahura ta kalli Mama Jumman sheƙeƙe sannan tace; "Mama ke kina ganin muna da kyawun da zan iya karawa da Nusram ɗin?, to wallahi bana dashi sannan kuma ba zan taɓa aikata mata haka ba kuma ni Mama miji na ya maida ni dan haka ba zan yi aure kan aure ba, gidan miji na zan koma yau ko ki so ko kada kiso".

Mama Jummai cikin hargagi tace; "Sahura ni kike faɗawa haka, to wallahi kinyi kaɗan kuma baki isaba zanga ta yadda zaki fita kibi mijin naki", ba tare da damuwa ba Sahurar tace; "za kuwa ki gani".

Mama Jummai cikin ranta tace; "ina dole na sake dabara idan ba haka ba wanki hula zai kaini dare", tana gama faɗar haka ta ɗauki hijab ta fice.

Nusram tana ƙoƙarin ɗora girki Nusreen tayi sallama ta shigo hannun ta ɗauke da kaya, Nusram ɗin da kanta ta miƙe ta taro ƴar uwar tata.

Ɗaki suka shiga dashi, Nusram cikin farin ciki tace; "wa'innan fa daga ina?", Nusreen tace; "wallahi Auntyn Tudu tace na taho dashi zata zo sati me zuwa kin san bikin Ya Sulaiman wai sati uku suka saka".

Nusram ta ƙara washe baki tana faɗin; "ah lallai kace Yaya Sulaiman ɗin ango yake, ya akayi to?", Nusreen ta tabe baki sannan tace; "ashe ma wai ya san Shureim ɗin baki ga yadda suka dinga fira ba, amma duk da haka yace zai ƙara bincike akan shi, wai daman Maman Shureim ɗin a wajen Ya Sulaiman ɗin ma take siyayya".

Nusram tace; "shikenan ma ashe abin yazo da sauƙi", Nusreen ta cire hijab ɗin jikin ta sannan tace; "na bashi labarin naki angon baki ga yadda ya dinga faɗa ba, yace ma zai zo koda zuwa sati me zuwa ne ko kuma gobe".

Nusram ta harari Nusreen ɗin tace; "to waye yace ki ɗin ki faɗa mishi?", Nusreen tayi dariya sannan ta juya wajen Ummi tace; "gashi nan inji Aunty tace zuwa gobe ko kuma sati me zuwa zata zo wai sai kuyi magana".

Ummi tace; "Allah ya kaimu", suka amsa da ameen, Nusreen ta kwanta yayin da Nusram ta koma wajen girkin ta don so take taci ƙarfin girkin kafin lokacin da zasu tafi makarantar.

Ƙarfe huɗu sun idar da sallah inda suka saka atamfa duka a jikin su riga da zani sannan suka ɗora hijab wanda ya kasance na makaranta sannan suka yiwa Ummi sallama suka tafi.

Nusreen ta kalli ƴar uwar tata sannan tace; "Ramluv kin san me?, yanzu tunani na shine anya kuwa Baba zai yi mana kayan ɗaki masu kyau?".

Nusram tace; "ke kuma abinda ya dame ki kenan kai Rim Allah ya shirye ki, abinda nake so ki gane shine duk abinda Allah ya hore mishi wannan zai yi mana dan haka kada ki damu ga kuma kuɗin da muka tara a wajen Auntyn Tudu na san sati me zuwa zata zo dasu a shiga kasuwa sai a siyo koda kayan kitchen ne tunda a ƙalla zai kai dubu ɗari da saba'in sannan akwai wa'inda muke tarawa a gida kinga duk Allah zai rufa asiri dai, ni dai burina yanzu shine na bar gidan kawai".

Nusreen tace; "hakane kuma, kai amma sana'a tana da rufin asiri yanzu fa kinga da bamu yi da shikenan", Nusram ta harare ta tace; "kamar wata gwanar sana'ar ai zan bawa Shureim shawara kawai ya buɗe miki boutique ne kada ya tsaya ɓata kuɗin shi".

Nusreen tace; "nifa gidan radio zan yi aiki na", Nusram tace; "da auren naki ko?", eh mana me za'a fasa", Nusram tace; "Allah ya baki sa'a to", ta amsa da ameen, haka suka cigaba da firar tasu har suka isa makarantar.

Koda suka taso, sauri kawai suke tayi domin su ƙaraso gida dan basa so ayi kiran sallar Magrib suna kan hanya.

A.ƙofar gida suka tarar da Idris, cikin girmamawa ya gaishe dasu, suma suka amsa sannan suka shiga ciki.

"ni Sahura ban isa na faɗa miki magana kiji ba kenan?, Sahura dani kike ja ko, ki koma babu inda zaki je", maganar Mama Jummai kenan wacce ta iso kunnen su.

Su ka kai duba, zuwa inda take ta kama Sahurar ta cukuikuye ita kuma Sahurar tana ƙoƙarin fizgewa, idan kaga yadda suke sai abin ya baka dariya.

Nusreen data kasa riƙe dariyar ta nan ta hau yin ta babu ƙauƙƙautawa, Mama Jummai ta jefo musu harara tace; "shegu mayu, wallahi Allah ya isa tsakani na daku".

Nusreen ta ƙara kwashewa da dariya harda shewa, wanda hakan ba ƙaramumin ƙular da Mama Jummai ɗin yayi ba, itacen dake cikin wuta ta ɗauko ta nufo Nusreen ɗin gadan-gadan sai dai ganin yadda Nusram ta haɗe rai take kuma kallon ta yasa ta kasa ƙarasawa kusa da Nusreen ɗin, tana haki ta nuna Nusreen ɗin tace; "zamu haɗu ne shegu sunƙi aure".

Baba yayi sallama ya shigo, inda ya samu Mama Jumman ta sake cukuikuye Sahurar tana ƙoƙarin tura ta ɗaki, Baba yace; "yanzu dan Allah meye haka?".

Mama Jummai tace; "yauwa gwara daka zo, nice nan nace babu inda zata je, wai amma yarinyar nan sai ƙoƙarin ja dani take yi a gidan nan tana tona mini asiri, kuma wa'incan ƴaƴan mayun sune suke ƙara zugata".

Baba yace; "to ke meye na hana ta tafiya ki barta taje mana, bafa na son rigima", cikin hayagaga tace; "au haka ma zaka ce Abdullahi?, to wallahi ba zai saɓu ba".

Baba yasa hannu ya rabata da Sahurar sannan yace; "ke wuce kibi mijin ki", Sahurar kuwa ta nufi hanyar fita tana murna inda take ɗagawa Nusram hannu, Nusram ta mayar mata sannan ta wuce nasu ɗakin.

Suna idar da sallah Ummi tace; "Nusreen ke ba zaki dena ɗauko mini magana ba a gidan nan ko?", Nusreen ta cuno baki tace; "yanzu me nayi ko dariya ma ta zama rigima a gidan nan kenan bamu da ƴancin muyi dariya kenan?", Ummi ta kai mata duka Nusreen ta fice da gudu.

Nusram kuwa tabarma ta shinfiɗa musu a ƙofar ɗaki sannan ta zubo musu abinci, Nusreen ta ɗauko Kubra ta fito da ita, Nusram kuma ta ɗauko babbar roba sannan ta saka hijab tace; "bari naje na siyo mana ƙanƙara", daga haka ta fice.

Kasancewar gidan babu nisa da nasu yasa bata wani jima ba ta siyo sannan ta nufo hanyar gida, a ɗan lungun kusa da gidan su ta hangi mota, bata kawo komai ba ta shiga lungun.

Ganin shi sai da gaban ta ya faɗi, Babban mutum ne sanye da fararen kaya, hannun shi riƙe da waya yana dannawa, hasken wayar shiya haska mata fuskar shi ina da a take a lokacin ta gane ko waye.

Tana daf da shiga gida ya ɗago sannan yace: "amm ji mana", cak Nusram ta tsaya gabanta na faɗuwa, "idan kin shiga kice ana sallama da Nusram dan Allah", ji tayi kamar ta dawo ta kwaɗa mishi mari amma haka ta daure ta shige gidan kawai.

Koda ta shiga bata kuma bi ta kanshi ba, wajen randar su ta nufa ta ciko jug da ruwa ta buɗe tiyara ta zazzage a ciki ta juya sannan ta sassaka ƙanƙarar ta kawo ta ajiye musu.

Kusa da Nusreen ta je ta zauna amma ta kasa cin abincin har sai da Nusreen tace: "Ramluv, kin ƙi cin abincin?", da sauri ta jefa hannun ta sai dai tana kai lomar bakin ta yaro yana rangaɗa sallama.

Mama jummai dake nata ƙofar ɗakin ta amsa mishi domin yawanci su kan shigo domin yaranta ko kuma siyayya, yaro yace; "wai ana sallama da Nusram", Mama Jummai taja tsaki.

Nusram kuwa abincin da bata kai ga haɗiyewa ba shine ya dawo ya shaƙe ta inda gaba ɗaya ya haddasa mata tari me ƙarfi, Nusreen ta miƙo mata ruwa ta sha.

Yaron ya kuma maimaitawa, Mama Jummai cikin fushi tace; "dallah fita ka bawa mutane waje ai mun ji ko?", Nusreen tace; "kaje kace tana zuwa".

Tana zaune tana ƙoƙarin dai-daita nutsuwar ta taji sallamar Baba inda ya hau surfa mata faɗa akan ta bar mutum a tsaye, dole hakan tasa ta miƙe tayi cikin ɗaki.

"au ɗaki kika shige ba zaki fito ba sai na biyo ki ciki?", Ummi tace; "amma ai ka bari ta shirya ko?", rufe mini baki ɓammbaƙar munafika duk waye ya ɓata yaran idan bake ba", hakan yasa Ummi taja baki tayi shiru.

Nusram dake ɗaki ta fashe da matsanancin kuka, ita tunda take bata taɓa ganin uban da yake yiwa ƴaƴan shi abinda Baban nasu yake yi musu ba, haka bata taɓa ganin mijin da yake yiwa matar shi abinda Baban nasu yake yiwa maman nasu ba.

#LIKE
#SHARE
#COMMENT

*Babyn Abdul, Maman Meenal, Elham da Farouk*.


*ƳAR MUTAN ZAZZAU*.



♠♠♠♠♠♠♠♠♠♠♠
*RAYUWAR ABDUS-SAMAD*
♠♠♠♠♠♠♠♠♠♠♠


https://www.facebook.com/groups/1569379426621615/


*~✍🏽✍🏽GOLDEN PEN WRITERS ASSOCIATION✍🏽✍🏽~*




*~We are bearer's of so golden pen🖊~*

*~we write assidiously perceive no pain~.*

*~So magical,Our creative golden pen✍,behold our words.~*

*~A product of our pen🖊,savour our words, for it will cause you no pain.~*







*_daga alƙalamin ✍_*


*ƴar mutan zazzau*
*(one love)*

*sadaukarwa gare ku*


*Bashier Sufyan(Sardaunan gauraye)*

*Ibraheem Aliyu (Jikan Nufawa)*

*Heart you so much*


*Note:-* masu cewa basu gane rayuwar waye ake so a nuna ba an ce rayuwar Abdus-samad amma kuma ana kawo rayuwar Nusram, kada ku dama idan har kuka ƙara haƙuri zaku fahimci ina littafin ya dosa amma be kamata tun a yanzu ku yanke hukunci ba ya kamata ku haƙura har zuwa lokacin da littafin yayi zurfi sosai kada ku manta fa ko pages talatin ba'a yi ba kuma tun farko na faɗa muku littafin nada tsayi why d eager??.

Sannan ga masu son shiga whatsapp group na Rayuwar Abdus-samad kuyi searching Aishatu Babayo sai ku tura mata da number ɗin ku ta pc zata saka ku a ciki amma dan Allah iya mata kawai banda maza, Na gode sosai ga masu complain suna duba whattpad amma basa gani kuyi haƙuri wallahi ko ƙareenateey na kasa ƙarasa balle na fara saka wannan amma zan dage kan azumi na saka su duka acan ɗin tnxs for ur love😘.


📖📖27-28📖📖


Jiyo muryar Baba yana ƙara wage baki yana ƙwala mata kira yasa Nusram saurin goge hawayen fuskar ta, sai da ta ɗan gyara fuskar dan bata so kowa ya gane halin da take ciki.

Tana fitowa Baba ya kai mata ranƙwashi tsakiyar kai yace; "shegiya me baƙin hali irin na uwar ta, ko kare be taɓa zuwa ƙofar gidan nan da sunan yana son ki ba shine kinyi sa'a yanzu Alhaji Baballe zai rufa mana asiri ya rufa miki kema shine kika tsaya nurƙufanci ko?", Nusram bata iya cewa komai ba ta gifta mahaifin nata cikin baƙin ciki da damuwa.

A inda ta bar shi a nan ta dawo ta same shi, yana hango ta ya hau washe baki, Nusram kuwa cikin mutunci ta gaishe dashi.

Ya amsa yana ƙara washe bakin shi, "kinga dai yadda Allah yake ikon shi ko, wato dalilin da yasa kenan ko Sauro be taɓa zuwa ƙofar gidan nan da sunan yazo wajen ki ba ashe ke ɗin rabona ce".

Nusram ta haɗiye wani abu me ɗaci daya tsaya mata a maƙogoro, wato har labari ma Baba ya bashi kenan, bata iya cewa komai ba banda "Um ko u'um", yayin da shi kuma ya dinga yi mata surutu.

"abu na gaba da ya kamata ki sanu shine mata na guda biyu, yarana Ashirin da ɗaya cif, amarya nada goma uwargida nada sha ɗaya, kinga ke idan kika zo sai kiyo dozin".

Nusram ta kalle shi ta kauda kai, wai dozin lallai ma, suna nan tsaye Isa ya dawo, fuska a murtuke ya kalli Alhajin sannan ya shige gida.

Nusram ta ajiye ɓoyayyiyar ajiyar zuciya, shi kuwa Alhajin da yake be san me take ciki ba be wani damu ba, sai ƙarfe tara da rabi da ƴan mintuna sannan yayi mata sallama ya tafi.

Nusram kuwa har wata iska me daɗi taji tana kaɗata domin dai Allah ya gani ji take da atakure take, tana shiga zaure ta tarar da Isa a tsaye yana jiran shigowar ta.

Yana ganin ta ya nufo ta sannan ya ɗaga hannu hannu ya sharara mata mari, cikin masifa yace; "ni ina can na shanya baki ina jiran ki ashe ke kina nan kina taɗi da wani ƙato ko, to wallahi ko kina sona ko bakya so na baki da miji sai ni", yana ajiye aya Nusram ta raɓa ta wuce.

Ya fizgo ta ya haɗa da jikin bango sannan yace; "wallahi kina wasa dani da yawa ko, matuƙar naga zaki kuɓuce mini sai na raba ki da budurcin naki naga uban me mijin naki zai samu".

Gaban Nusram ya yanke ya faɗi, cikin sanyi tace; "Dan Allah ka sake ni na tafi mana", ya ture ta har sai da ta kusa faɗuwa sannan ya fice ya barta.

Nusram ta tsuguna a wajen ta saka kanta tsakanin ƙafafun ta sannan ta fashe da kuka, ita kaɗai ta san ya take ji a cikin zuciyar ta.

Ta daɗe a wajen dan sai da taji alamun Baba zai shigo sannan ta miƙe cikin sauri ta shige gida, a bakin ƙofa ta tsaya ta gyara kwalliyar ta sannan ta shiga.

Nusreen dake tsaye da hijab a hannu da Ummi dake kan abin sallah suka bita da kallo, Nusram tace; "ke kuma lafiya na ganki tsaye da hijab?", Nusreen tace; "Allah dama naga kin daɗe ne shine wai zan biki naga ina kika tsaya ne ko lafiya", Nusram tayi murmushi sannan ta juya tace da Ummi; "har ya tafi bari naje na kwanta, Rim muje ciki na san dai Shureim ba zai zo ba tunda tara ta wuce", Nusreen kam kai kawai ta ɗaga.

Sai da suka gama shirin barcin su sannan Ummi ta shigo, ta kalli Nusram tace; "Nusram ki faɗa mini tsakanin ki da Allah kina son wannan alhajin?", Nusram babu ko ɗar ta ɗagawa Ummi kai, Ummi tayi ajiyar zuciya sannan tace; "shikenan tunda haka kika ce, ku kwanta kawai amma ki sani matuƙar bakya son shi to ki sanar dani domin rayuwar aure ba ɗaya take data gida ba", tana faɗin haka ta fice.

Nusram ta saki ajiyar zuciya sannan ta kwanta, Nusreen ma haka sai data jima sannan ta sami damar cewa; "wai Ramlove da gaske ne kina son Alhaji Baballe?".

Nusram tace; "sosai ma kuwa, mutumin nan babu ruwan shi gashi da sauƙin hali ga barkwanci baki ga yadda ya dinga saka ni ina dariya ba, ni dai gaskiya yana birge ni sannan ina jin daɗin mu'amalata tare dashi", Nusreen tace; "amma fa kin sani Nusram Alhaji Baballe tsoho ne sannan baya da mutunci akan kuɗi a gaban ki fa Baba yake zagin shi akan baya da mutunci yanzun ma idan kika bibiya kuɗi ne ya haɗa su ake so a saka ki a tsakiya".

Nusram tace; "bana jin abinda Baba yake faɗa akan shi gaskiya ne kin dai san halin baba, sannan maganar kuɗi kuma zato kike yi dan haka kada ki tada hankalin ki akan hakan", Nusreen tace; "amma dai ni ƴar uwar ki ce ko, dan haka ba zan taɓa so wani abu ya cutar dake ba kamar yarda kike ƙoƙari wajen ganin kin bani farin ciki kin kuma kare ni daga duk wani abun cutarwa Nusram kece fa kawai wacce nake da ita, ƴar uwa ta rabin jiki".

Nusram ta balla mata hararar wasa sannan tace; "ina kika bar Kubra, Sahura dasu Ameera kiji mini yarinya".

Nusreen tayi dariya tace; "Allah da gaske basu kai mini ke ba, Nusram tare fa muka kwanta a cikin mahaifiyar mu tsayin wata tara abincin da zamu ci yana haɗe dana juna, muka fito tsayin shekara biyu mahaifiyar mu na ciyar damu da abinci kala ɗaya wanda har kika sha ki saki na kama kema kuma na kan sha na saki ki kama tun lokacin da muka fara wayo har tana Pant kala ɗaya muke sakawa kuma bamu taɓa raba wajen kwana ba, taya zan haɗaki da wasu, ke ɗin *Bloody*😭 na ce".

Ummi ta katse zancen ta hanyar cewa; "tabbas abinda Nusreen ta faɗa gaskiya ne, kunfi kusanci da juna sama da duk sauran ƴan uwanku Kamar yadda bakya son wani abu ya same ta haka itama bata so wani abu ya same ki, dukkanku kuna son junan ku sai dai ba zai taɓa kaiwa koda rabin son da nake yi muku ba, nice mahaifiyar ku na ɗauki wahalar ku tun daga lokacin da kuke ciki na, a cikin abincin da naci a ciki kuke samu kuma kuci, lokacin da cikin ku ya kai wata takwas bana iya barci kwata kwata sai da rana da ranan ma a zaune, nazo naƙudar ku haka nasha wahala kamar zan mutu, bayan na haifo ku nayi tunanin wahala ta ƙare ashe yanzu wata sabuwa zan ɗora domin kuwa da ɗaya ta fara kuka ɗayar zata ɗauka, haka zan ta rarrashin ku, kuyi barci da rana ni kuma da daddare ku hana ni yin barcin amma duk da haka banji a raina cewa wai bana son ku ba, naci fitsarin ku naci kashin ku, naci tunɓuɗin ku amma duk da haka ban gaza, daga baya nauyin kula daku ya dawo kaina haka kuma nake ta haƙuri, ki sani Nusram shekarun dana ɗauka ina wahala dake ba zai saka nace na gaji dake idan ma kina tunanin dan ki kauce mini da wahalar da nake ba to ki sani koda zaki ƙara shekara ashirin ko sama da haka matuƙar ina da rai ba zan taɓa gajiya dake ba", Nusram cikin kuka ta haɗa su duka ta rungume.

"tawa ƙaddarar kenan ba zan taɓa samun farin ciki ba a rayuwa ta, kuma tabbas aure ya zamar mini dole ko dan gudun samun matsala da kuma ɗaukewar farin ciki a rayuwar