You Cannot Download this book untill you login but you can read it .

---

Login Register

tayi sannan tayi wanka taci abinci.

Kayan siyarwa da Ummi take siyarwa ta tayata suka ƙulla na ƙullawa sannan ta tashi ta wanko hannun ta.

Tana tsaye a tsakar gida, Atika tayi sallama ta shigo, Nusram ta kalle ta, itama ɗin ita ta kalla fuska ɗauke da murmushin mugunta.

Wani rantsattsen lace ne a jikin, kalar ash da orange, yayi kyau sosai, ita kanta Atikar tayi ƙiba tayi freah, Nusran ta kauda kai daga kallon ta.

Atika tayi shewa tayi juyi sannan ta nufi hanyar ɗakin mahaifiyar ta, bata jima da shiga ba aka fara shigo da buhunan abinci.

Shinkafa buhu biyu, taliya kwali uku, buhun semonvita guda ɗaya, ƙaramin buhun gishiri, sai sugar itama ƙaramin buhu, man ja da man gyaɗa duka galan ɗaya, sai tarkacen maggi.

Nusram kuwa ɗaki ta shige dan wannan dama basu bane a gabanta, ko Ummi bata bawa labari ba, tana daga cikin ɗaki ta jiyo sallamar Habiba, nan suka hau murna suna shewa a tsakar gida.

Ummi ta kalli Nusram, Nusram kuwa hankalin ta naga wayar Abdus-samad tana dubawa kamar wacce ta san kanta, Ummi tace; "bafa kiyi mini bayani akan wayar hannun ki ba".

Nusram tace; "Hajiyar Shureim fa ta bani haɗe da kayan nan", Ummi tace; "aikuwa an gode sosai, amma da kin sani baki amso duka ba, kayan sun yi yawa".

"nima sai da nace mata ba zan amsa ba ta tilasta, shiyasa na amsa ɗin dan kada nayi jayayya da ita", Ummi bata kuma cewa komai ba.

Suna jiyo lokacin da suke ta hidimar su akan kayan da Atikar ta kawo, babu wanda yace wani abu, Nusram ma cikin ɗaki kawai ta shige.

Tun ranar data dawo da kayan ta ajiye a kullum tana son ɗauka amma hakan ya gagara saboda gani take idan ta ɗauka ɓacewa zata yi.

🤣🤣🤣🤣🤣 Nusram baki ɓace ba da kika dauki wayar shi sai kayan daya siya miki a boutique?.

Kwanciya tayi, tana tunanin rayuwar ta har barci ya ɗauke ta, sai lokacin da zata ɗora girkin rana sannan ta farka.

Ta fito ta haɗa wuta inda ta ɗora abinci, Sahura ta fito da sauri, Nusram ta kalle ta tayi murmushi, suka gaisa cikin mutunci.

"ina mijin naki?", tace; "yana gida yace a gaida ke", Nusram tayi ajiyar zuciya tace; "ina amsawa", sun ɗan taɓa fira kaɗan kafin Sahurar ta tafi.

Nusram na gama abinda zata yi ta shige ɗaki, tare da Ummi suka ci abincin, daga nan suna juyo abubuwan dake waka na a tsakar gidan.

Nusram ta taɓe baki kawai tana cigaba da abinda yake gabanta, Ummi ma bata ce komai ba.

"ayyiririririiiiiiiii, gaka inda aka iya haihuwa, ni Jummai waya ganni a saudia", faɗar Mama Jummai kenan kafin kuma suka hau tiƙar rawa ita da Ameera da Habiba, Atika na musu kiɗa.

Sai da suka gama cashewar su sannan Mama Jummai ta kuma cewa; "kai haihuwa me daɗi, ai dama haihuwa suna ta tara mu dai tamu kam sam barka".

Duk da Nusram da Ummi suna jiyo su amma babu wanda ya tanka musu, haka suka gama shewar su da habaice-habaucen su.

Koda yamma da Baba ya dawo, ana nuna mishi kayan da wai Alhajin ya bada a kawo ya hau murna.

"Maimuna ina kike?", ya hau ƙwalawa Ummi kira, ta fito Nusram ma ta biyo bayanta.

"ki kalli inda ake abin arziƙi, kin gani ko wannan shine haihuwar da ake so ba kalar taki ba ƴaƴa sun zama kamar masu farar ƙafa babu ɗaya ƙwakkwara na kamawa".

Ummi tace; "an gode Allah ya saka da alkhairi", Baba da Mama Jummai suka ce Ameen, inda da gaske kike", Ummi tayi murmushi kawai kafin ta juya.

"haba me ake da yaran da basu san su kyautatawa iyayen su ba, ita waccen shegiyar har yanzu ko gidan bata leƙo ba", tsaf Ummi ta san da Nusreen yake amma bata tanka mishi ba.

Sai bayan sun shiga ɗaki sannan ta sami damar share hawayen daya zubo mata, Nusram ita kanta jikinta yayi sanyi, ta miƙe ta shiga ɗaki hijab kawai ta ɗauko kafin tazo ta fice.

Ba tare da sanin inda ta nufa ba, wani lungu tabi sannan ta tsaya tana maida numfashi, lallai ya kamata tayi wani abin kodan ragewa Ummi damuwar da take ciki, to amma yanzu me zata yi?.

Tana nan tana saƙe-saƙe aka fara kiraye-kirayen sallah, ta miƙe sannan ta fara takawa cikin natsuwa.

Masallacin da ta san mahaifinta baya zuwa haka ma Isa nan taje ta laɓe, tana kallon yadda mutane ke hada-hadar su na ƙoƙarin yin alwala.

Wanda ta hango a can gefe idan zata iya canka zai kasance shine liman, tana kallo yana alwala sai da ta tabbatar mutane sun yi alwala sun shige masallaci sannan ta sami damar ƙarasa gaban shi.

Tayi mishi sallama ya amsa, yana cigaba da alwalar shi ta tsaya har sai da ya ƙarasa sannan ta gaishe dashi, ya amsa yana bin ta da kallo.

Tace; "dama.......dama mijin.........dama mijin aure ......nake nema shine ........shine nace bari ......nazo nan masallacin idan dame buƙatar ƙara mata sai yaje ya sami......sami mahaifina", ta ƙarasa muryarta na rawa tana wasa da yatsun hannunta.

Limamin yayi ɗan jimm kan yace; "to shikenan ki jira mu nan waje, amma kamar ƴar gidan Malam Abdullahi", cikin ladabi tace; "eh nice", ya jinjina kai sannan yace; "ki jira bari na shiga muyi sallah tukunna Allah yasa a dace.

Wani gida dake kusa da masallacin nan ta shiga ta rakuɓe, addu'ar da take yi Allah yasa a dace ta sami mijin aure ko ta bar gidan nasu mahahifiyar ta, ta sami kwanciyar hankali.

Tana jiyo lokacin da suka idar da Sallah, liman ɗin yayi sanarwa, bata da tabbacin me suke bada amsa, amma liman ɗin ya sanar musu sannan ya faɗa musu ƴar gidan ko waye yace; "idan dame buƙata sai ya nemi mahaifin nata", daga haka yayi addu'a aka watse.

Daga inda Nusram take tana jiyo wasu samari suna faɗin; "kai haba dai waye zai kai kanshi wajen yarinyar da a ranar da aka kaita gidan miji aka kamata da kwarto".

Ɗayan yace; "kai da ka gane kenan Auwalu, kwananta goma sha biyu fa a gidan kaso", Auwalu yace; "kai Idi a dai wajen ƴan sanda ba gidan kaso ba, shima kuma kwana takwas ne ba goma sha biyu ba".

Ɗayan yace; "ni naji ance ma wai da saurayin suka haɗa baki, suka gudu sai da ya ɗirka mata ciki sannan ya dawo da ita, Mahaifiyar ta itace take goyan bayan duk abinda take aikatawa, sunje zubar da cikin aka sami matsala sai aka kwantar dasu a asibitin kwanan su shida sannan aka sallamo su".

Idi yace; "ai zasu aikata wallahi, kana ganin mahaifiyar nan tasu a haka sumimi kasai, kamar wata mumina da gaske, ta ganku tana wani sunkuyar da kai kamar sabuwar tunkiya, amma ita take tura yaranta karuwanci".

Auwalu yace; "kai raba kanka da irin wa'innan matan yasin, bar ganin ta a haka da zumbulelen hijab waye ya san ita me take aikatawa, shi kanshi mijin nata ai asiri tayi mishi to ance fa ya sake ta amma taƙi barin gidan yanzu haka ma kuɗin da suka yi karuwanci dashi suke ciyar da kansu".

Nusram ta tsugunna a wajen ta fashe da kuka, wato kallon da ake yi musu kenan, lallai rayuwa kenan, sai da gari yayi duhu sosai sannan ta sami damar barin wajen.

Har lokacin kuma basu bar firar su ba, taja hijab ɗin ta rufe rabin fuskar ta sannan ta tafi.

Koda ta isa gida Ummi bata ce mata ina taje ba haka itama bata cewa Ummi ga inda taje ba,

Koda tazo kwanciya sai da tasha kukanta ma'ishi kafin barci ya ɗauke ta


************* *************

Khausar dake kwance saman couch ɗin ɗakin ta wanda yaji kayan more rayuwa.

tana sanye da riga doguwa iya gwiwa, kwananta biyu kenan babu inda taje, Mahaifiyar ta harta gaji da buga mata ƙofa akan ta buɗe amma taƙi.

Yanzun ma Hajiya Salma dake tsaye bakin ƙofar ta kuma bubbugawa tace; "wai Khausar ba zaki buɗe ƙofar nan ba", shiru babu amsa.

Khausar kuwa dake ciki tayi juyi tana jan tsaki, wai me yasa ƴan gidan nan basa ganewa ne itafa Abdus-samad kawai zasu nemo mata shine samun kwanciyar hankalin ta.

Alhaji Mustapha dake zaune saman dinning ya buga uban tagumi, lokaci zuwa lokaci ya kan share zufar da take tsattsafo mishi.

Brr Jabeer yayi sallama ya shigo, cikin sauri Alhaji Mustafa ya miƙe ya isa wajen shi, saman kujera duka suka zauna.

Alhaji Mustapha yayi ƙasa da murya yace; "Brr ina cikin tashin hankali, ƴata Khausar tace babu wanda take so sai ɗan uwan ta Abdus-samad".

Brr Jabeer ya zaro idanu waje yace; "taya suka haɗu a ina kuma ta san shi, shin ko dai ta san sirrin da kake ɓoyewa ne", Alhaji Mustapha yace; "ko Mahaifiyar ta bata sani ba balle ita".

"tun da suka haɗu a wajen siyayya shikenan ta maƙale, yau kwanan ta biyu kenan ta rufe kanta a ɗaki babu ci babu sha wai shi take son gani".

Brr Jabeer yayi shiru tsayin wani lokaci kafin yace; "ni ina ganin kawai abinda za'a yi shine ka nemo shi, kga daga nan zaka sami hanyar da zaka ja sha jikin ka".

Alhaji Mustapha yace; "hakane kuma, amma kai kanka Brr kasan wacece Brr Farida ba sai na faɗa maka komai ba, idan har na sake nayi wani motsi a kai to zata kaini kotu kuma ka san cewa kaini kotu dai-dai yake da tonon asiri na".

Brr Jabeer yace; "kuma hakane tabbas, to amma yin shirun kana ganin shi yafi", Alhaji Mustapha ya jinjina kai yace; "tabbas kuwa shi yafi, idan ta gaji da kanta zata buɗe ƙofar", Brr Jabeer yace; "shikenan".

Tare suka miƙe da Alhaji Mustaphan, inda Hajiya Salma ke tsaye tana fama da Khausar akan ta buɗe ƙofa suka je.

Brr Jabeer yace; "Khausar ki buɗe ƙofar nan ni kuma nayi miki alƙawarin baki number ɗin shi", Khausar jin hakan yasa ta diro daga saman couch ɗin tazo ta buɗe.

Hajiya Salma da Alhaji Mustapha kuwa gaban su ya faɗi, Hajiya Salma abinda take gudu shine alaƙa ta shiga tsakanin su bata fatan abinda zai kawo Abdus-samad ɗin cikin rayuwar su wancan ma tsautsayi ne.

Alhaji Mustapha kuwa tsoron shi shine be san ta yadda zai kare kanshi ba idan har asirin shi ya tonu.

Khausar ta kalli brr, shi kuma yayi mata murmushi sannan yace; "idan kika kashe kanki a ɗaki Khausar taya zaki iya zuwa wajen Abdus-samad ɗin ko kin haƙura dashi ne?", ta girgiza kai.

Ya riƙo hannun ta yace; "idan mutum yana son abu ba wai shiga ɗaki yake yi ya rufe kanshi ba a'a zai iya iyakar yin shi nr ganin wannan abin yazo gare shi, wannan shine abinda ya dace kiyi, kinji ƴar Baba".

Khausar tayi murmushi tana sauke kanta ƙasa, Brr Jabeer kuwa murmushi yayi kafin yayi musu sallama ya fice daga gidan.

Alhaji Mustafa ya kalli ƴar tashi yace da ita; "haba Khausar yanzu kina ganin abinda kika yi kinyi dai-dai kenan".

"kayi haƙuri Daddy ba zan kuma ba", ta faɗa cikin sanyin murya, zai kuma magana Hajiya Salma ta dakatar dashi tace; "Khausar wuce kije kici abinci".

Sai da ta bar wajen sannan Alhaji Mustafa yace; "wai me yasa bakya son na yiwa yaran nan faɗa ne?".

"to Alhaji wane irin faɗa kuma bayan ta riga ta fito daga ɗakin ai shikenan dai ko, ni zan wuce wajen aiki", ta ƙarasa tana tafiya.

Alhaji Mustapha ya bita da kallo har ta fice sannan yayi ajiyar zuciya kafin ya ciro waya ya hau kiran Alhaji Sa'eed.

"Alhaji ina cikin tashin hankali", abinda Alhaji Mustapha ya faɗa kenan bayan Alhaji Sa'eed ya ɗaga wayar.

Alhaji Sa'eed yace; "innalillahi, ka bari anjima mu haɗu a guest house ɗin ka dake by pass", Alhaji Mustapha yayi ajiyar zuciya yace; "to", daga haka suka katse wayar.

Ya nemi waje ya zauna ya dafe kanshi, idan har yayi wasa tofa wanki hula zai kaishi dare, dole ya san abinda ya kamata yayi, be shirya zuwa gidan yari yanzu ba.

******** ***********

Abdus-samad ke gaba yayin da Fadila da Brr Farida suke bayan shi, yana sanye da ƙananan kaya, jar riga da kuma baƙin wando as usual shigar ƙananan kaya.

Brr Farida tace; "yauwa kije insha Allahu nan da sati ɗaya zamu zo kuma za'a yi maganar auren ku, kinji ko".

Fadila ta sunne kai tana murmushi, Brr Farida itama tayi murmushi sannan ta kalli Abdul tace; "Baby ka tafi da ita a hankali banda gudu ka san amarya tsautsayi gare ta".

Sameer da Tameer dake tsaye a wajen parking lot ɗin suka kalli juna suka kwashe da dariya.

Abdus-samad ya shagwaɓe fuska yace; "kai First Love ni na lura yanzu ma ba wani sona kike yi ba ta wannan me kan gwandar kike".

Brr Farida ta riƙo hannun shi tace; "idan banda abinka, ai kai ne na gaban goshi, ita kuma a ƙeya take", wannan yasa suka kuma dariya.

Sameer yace; "mu dai ka wuce ka kaita zamu jira ka a office idan kayi latti kuma zaka amsa query", Abdus-samad ya murguɗa mishi baki.

Sameer zai kuma magana Brr Farida ta dakatar dashi tace; "dan Allah ka bari su tafi kawai".

Dr Abubakar da ya fito cikin shirin tafiya wajen aiki yace; "au har yanzu baku tafi ba kun tsaya wasa ko".

Brr Farida ta ƙarasa wajen mijinta tace; "nima abinda nake faɗa musu kenan, su tafi kawai Baby kuje Allah ya kiyaye hanya idan Ka kaita ka wuce company zaka sami Daddyn ku yana zaman jiran ka", Abdus-samad ya amsa da to.

Suna tsaye suna ɗaga musu hannu har suka fice daga gidan, kafin kowa kuma ya shiga tashi motar ya bar gidan, domin tafiya wajen aiki.

Kamar yadda Mahaifiyar tashi ta umarce shi a hankali yake tuƙin, Fadila ta kalle shi tayi murmushi.

Shima murmushin yayi sannan yace; "kin san umarnin uwa dole na cika shi", Fadila tace; "ni ina tsoro sai nake gani kamar Hajja ba zata amince da wannan auren ba".

Abdul cikin halin ko in kula yace; "to kada ta amince mana, ai ba ita keda iko da ke ba", Fadila kai tsaye tace; "amma ai tana da iko da iyayen mu ko".

Bece komai ba banda hankalin shi daya mayar kan tuƙin shi, dai-dai kwanar layin nasu yabi da kallo, tuno yadda suka yi kwanaki yasa yayi murmushi kawai.

Har ƙofar appartment ɗin su Hajjan ya kaita, Fadila ta buɗe ƙofa sannan ta waigo tace; "na gode sosai Allah ya saka da alkhairi, ga wannan dan Allah kada ka manta ka taho mini dashi".

Ya amshi ƴar paper ɗin, rubutu ne wanda shi ba zai tantance meye a jiki ba, ya kalle ta yace; "meye wannan", ta ɗan kauda kai tace; "abin amfani ne kai dai kawai ka siyo mini", ya balla mata harara yace; "wato har kin fara aike na kenan".

Tayi dariya tana ficewa daga cikin motar, shi kuma ya girgiza kai kan ya ja motar ya tafi, ya san ko yace zai shiga su gaisa ran shi ne kawai zai ɓace, gashi zuwa yanzu ya san Fadil baya gida yana wajen aiki.

Hanyar Companyn kawai ya ɗauke, gudu yake shararawa sosai domin kuwa ya san yayi latti gashi zuwa yanzu ya san Mahaifin nashi yana can yana zaman jiran shi.

*FARIDA AND SONS NIG LMTD*, sunan companyn nasu kenan, wanda kusan yayyin shi ke jan ragamar companyn, yana parking ma'aikatan suka fara gaishe dashi, ya tsaya suka gaisa cikin mutunci da girmama juna.

Kai tsaye ya wuce office ɗin CEO ɗin, inda a can ya sami Dr Abubakar na zaman jiran shi, koda ya shiga basu wani jima ba.

Dr Abubakar ya kalli Sameer wanda ya kasance shine CEO a wajen yace; "ga ɗan uwan ka nan zamu je yanzu mu dawo sai ka nuna mishi nashi office ɗin".

Sameer yace; "to", daga haka ya juya ya fice Abdus-samad ɗin na bin shi a baya, motar Dr Abubakar ɗin suka shiga dukan su.

Suna tafiya ya juyo ya kalli Abdus-samad yace; "abinda yasa zaka yi aiki a wancan companyn shine dan ka matsa kana so ka fara aiki amma yanzu zamu je inda nake company ɗin yake ana ta aikin shine amma insha Allahu nan bada jimawa ba za'a gama sai ka koma can", Abdul ya amsa da to.

Da ɗan tazara tsakanin wancan Companyn da wanda suka.je yanzu, a girma da faɗi wanda suka baro yafi wannan sai dai yadda tsarin wannan yake ya bambamta da wancan.

Dr Abubakar yace; "wannan shine Compnyn ka shiga kaga yadda tsarin shi yake ni zan wuce wajen aiki ne, idan naje zan saka driver ya kawo maka mota sai ka koma wajen naka aikin", Abdus-samad yace; "to".

Dr Abubakar ya tafi yayin da Abdus-samad ahi kuma ya shiga ciki domin ganin yadda tsarin companyn yake da duk yadda masu ginin ke aikin nasu.

********* ************

Nusram ke tsaye bakin titin da zai sadaka da Unguwar tasu, fuskarta tayi ja tsabar kukan da taci, yau shine cikar kwanakin da aka ɗibar mata gashi har zuwa lokacin bata sami wani wanda ya amsa zai aure ta ba.

akai-akai takan saka hannu ta share hawayen da yake zubo mata, kasancewar hanyace babba wacce mutane kan gifta suna hada-hadar su kowa yazo wucewa sai ya bita da kallo.

Ita kuwa duk ta ruɗe duk yadda ta dauki abin ya wuce haka, ta kalli samarin dake tahowa, baya ta koma kaɗan ta jingina da ginin dake kusa da ita.

Koda suka ƙaraso gare ta, tayi musu sallama, duk suka kalle ta, cikin rawar murya tace; "dan Allah mijin aure nake nema", wannan maganar ta basu dariya suka kuwa dara.

Nusram ta share hawayen daya zubo mata tace; "auren mahaifiyata Babana ya ɗora akan nawa yace idan ban fito da miji nayi aure ba a bakin auren ta, dan Allah ku taimake ni".

Suka yi shiru suna kallon ta, dan kyau akwai kyau, hijab pink ta saka dogo har ƙasa hakan ya hana ni ganin wane kalar kaya ne a jikin ta, ta janyo hijab ɗin ya rufe rabin fuskar ta wanda sai ka natsu sosai zaka iya fahimtar wacece.

Ɗaya ya kalli ɗaya yace; "Bello ko zaka shiga daga ciki ne, ni dai ka san yanzu ba zai yiwu na ɗaɗɗako aure ba ko?".

Wanda aka kira da Bello yace; "kai Aminu rabani da kyawawan matan nan, nifa gwara na nemi dai-dai ni na aure, kaga kalar wa'innan kayi shiru kawai, waye ya san me take aikatawa da mahaifin nata ya koro ta, ni dai kam ba zan iya ba kai dai idan zaka aure ta to bismillah sai muje a toshe ƙofar naka ɗakin a maida shi ta cikin gida".

Aminu yace; "bakada hankali ne yanzu ina naga kuɗin aure, sadaki akwati, waye yace maka mace kamar wannan zata iya zama a irin gidan mu, ɗaki ciki ɗaya".

Jikin Nusram har rawa yake yi wajen durƙusawa ƙasa tace; "wallahi zan zauna, ni dai dan Allah ku taimaka mini", suka kalli juna kafin Bellon yace; "kai anya kuwa wannan mutum ce Aminu yau munyi gamo", da sauri suka fara tafiya.

Nusram ta bisu kamar sabuwar mahaukaciya tana kuka tana roƙon su, ganin hakan yasa suka zuba a guje kowa na ƙoƙarin ceton ranshi.

Nusram kuwa ganin sun gudu yasa ta tsaya tana share hawayen da ya zubo mata, bata taɓa ɗauka matsalarta zata girma ta kai hakan ba.

Duk masallatai da kuma ƴan layin su kowa gudun ta yake yi, yanzu gashi tazo inda ba'a santa ba nan ma kallon aljana suke mata.

Tun safe take garari a hanya tana neman me auren ta amma ta rasa kowa ya kalleta sai yace tafi ƙarfin shi, ko kuma be san me take aikatawa wasu ma kallon zararriya suke yi mata.

Jin an fara kiran sallar Magrib yasa ta matsa can jikin wani masallaci ta zauna dole ta sake tunani, ta jima zaune tana kuka tare da tunanin halin da zata shiga ta kuma jefa auren mahaifiyar ta a ciki, kafin ta miƙe ta fara tafiya cikin galabaita.

Har ta ƙaraso gida babu wanda ya yarda da buƙatar ta, tana shigowa zaure Isa na fitowa ganin yadda tayi.wujiga-wujiga yasa ya kwashe da dariya yace; "lallai na ciri tuta ai dama na faɗa miki baki da miji sai ni", bata kula shi ba shi kuma be fasa faɗan abinda ya ke son faɗa ba.

"ki shiga ciki Baba na zaman jiran ki ai", jin hakan yasa gaban Nusram faɗuwa, cikin sanɗa ta leƙa tsakar gidan, Baba ne kuwa zaune saman tabarma yana faman masifa.

Ta jima tsaye tana tararrabin ta shiga ko kada ta shiga, a ƙarshe dai haka ta yanke shawarar shiga cikin gidan.

"eh da yake ni an raina ni.wato ke kaɗai zaki je Saudiar to naga wanda zai barki kije ɗin" maganar da Baban keyi kenan wacce ta daki kunnuwan Nusram ɗin.

Nusram tayi sallama ta shiga, Baba yace; "yauwa an dawo daga yawon barikin, zo nan", jikin Nusram ya kama rawa.

Ta tsuguna tace; "Baba gani", Baba yace; "ke wato dai sai kin kashe ni sannan hankalin ki zai kwanto ko", Nusram ta girgiza kai.

"to wallahi baƙin cikinki ba zai kashe ni ba, kinfi ƙarfin kowa yanzu