You Cannot Download this book untill you login but you can read it .

---

Login Register

mu jin naku ra'ayin ba, idan mun gama sanar daku Abunda muka tattauna da shi Alhaji gashi nan" ya faɗa yana mai nuna farin tsohon da yake zaune bisa kujera irin ta alfarma yana ta faman murmusawa da kallon jikokin nashi har ma da surukkan nashi guda biyu watau Hajiya Kubra da Mama Zainab dake zaune ɓangare guda, duk da kasancewar Mama Zainab ɗin babba ga hajiya Kubran, Amman kai kace ita ce babba, saboda jin daɗin da gogewar kai harma da suturar ba ɗaya ba.

"kai Aliyu, munsan buƙatar ka na anema maka auren Khadeeja, wanda mun yanke hukuncin nan ba da jimawa ba zamu je a nema maka auren" ya faɗa yana mai kallon babban ɗanɗan nashi namiji da ya sunkuyar da kai yana ɗan murmusawa, Yaya Auwalun ne ya cigaba da faɗin "sannan ku kuma Saudatu, da Nihal sai Hafsat (Ɗiya ga yaya Auwalun ta uku domin ta biyun mai suna Amina itama tayi aure har ma da ƴaƴan ta guda biyu, kuma itama tana zaune ne a wurin) kuma muna da buƙatar ku turo mana da manema aurenku zuwa gobe ko jibi domin mu tattauna dasu kuma mu basu izini" gabaki ɗaya sunkuyar da kai sukayi yayin da saudat ta zumɓuro baki ita fa bata shirya yin aure yanzu ba, dama Nihal ɗince mai saurayi, sannan ita hafsat dama tana da maneman ta masha Allah kasancewar ta nutsattsiyar yarinya ga kunya da girmama na gaba da ita, kyakkyawa ce masha Allah, domin su Nihal ɗin babu abin da zasu nuna mata.

Dakatawa yayi yana murmusawa tare da cewa idan Alhaji mustapha yana da magana yayi yana sauraren shi, to shi ɗinma cewa yayi babu sauran wani abu sai dai ko a cikin yayyen nasu mata idan da mai magana.

Goggo Aisha ce ta shigo da buƙatar tallafin karatun ƴaƴan nata maza da suka gama makarantar secondry yayin da Goggo Fatima tace ita kam babu abin da take buƙata, duk buƙatocin nata ƙannen nata sun gama mata komai sai Sam barka, tau suma ɗin dai haka Aunty Hassan a da hussainar babu abin da suka buƙata, sai godiya da suka shiga yi.

Yayin da aka tambayi su Hajiya Kubran dake Zaune gefe, Hajiya Zainab dai cewa tayi babu komai, yayin da Hajiya Kubra ta buɗe baki cikin isa, ta shiga faɗin "Maganar Al'ameen fa? Banji kunce komai ba dangane dashi, shima ya kamata ya fiddo mata cikin wannan lokacin, in ba haka ba zan zaɓo mashi da kaina cikin family ɗin ƴan uwa na ko kuma cikin ƴaƴan ƙawaye na" Alhaji mustapha ne ya shiga kallon ta cikin ɗaure fuska yayin da Yaya Auwalun ya shiga girgiza kai a hankali yana ɗan murmushi, kasancewar duk sun san halin ta ne ya sanya abun bai basu mamaki ba.

Shi kau Ya Ameen bazan iya fasalta yana yin da ya shiga ba, "wai me yasanya Mahaifiyar tashi take haka ne? Me yasanya idan zata yi abu bata tinani akai? Me yasanya, me ya sanya?" haka ya shiga furta wa cikin zuciyar shi da take ta kai komo, bugun zuciyar shi ya ƙaru, idan ko haka ne zai rufe bakin ta, zai bata mamaki, yana so ya cenza mata tinani, yana so ya cenza mata kallon da take yi ma kowa na bai isa ba sai ita kawai, yana son Mahaifiyar shi, ba zai so yana kallon ta tana tafiya bisa turbar da ba ita bace kuma ya sanya mata idanu ba.

Hajiya zuwaira ce ta sanya baki a karo na farko, tin zaman da aka fara kusan awa guda kenan da suka shuɗe, ita ɗin ma murmusawa tayi, yayin da ta kalli Hajiya Kubran ta shiga faɗin "Ke kau Kubura me yasanya kika sanya ma wannan mijin nawa ido ne wai? Mai mata kaman ni har a ce ya fiddo da aboki yar rayuwa, ko ba haka ba ma ai shi Ameenun baki ga yanda yake ba, wannan ma mai tsoron matan? Ina ce ma ni ban taɓa ganin ya tsaya kula ƴan mata ba ko jin labari" kowa sai da ya murmusa banda Hajiya Kubran da take zaune hakim ce gefe guda yayin da Hajiya Zainab mata ga yaya Auwalun ta ɗora da faɗin " wannan gaskiya ne Mama, kamata yayi a bashi lokaci ya fiddo a tsanake, kaman yanda Aleeyu yayi, gashinan abokanan shi har da masu mata biyu Amman shi sai yanzu ya samu ya lalubo, zaɓen aboki yar rayuwa ai abune mai wahala sai an bincika sosai.

Kowa yayi na'am da wannan maganar yayin da Hajiya Kubran ta Sake ɗaure fuska tana faɗin "Akwai ɗiyar Abokin wasa na Sen. Abubakar ɗan Malam, yarinya ce mai natsuwa, duk abin da ake buƙata mace da shi itama tana dashi, ta fito daga babban gida babban Family na yardar mashi yaje ya neme ta ni zan shige mashi gaba wajen aiwatar da komai" toh fa, Hajiya Kubra kenan, ita a ganin ta dukiyar ta arziƙin ta ya kai ta aiwatar da duk abin da take so, ta manta itama a ƙarƙashin wani take.

Wannan karon cikin ɗan zafin rai Alhaji Mustapha ya shiga faɗin "Babu wanda zai sanya in ma yaro na auren haɗi, bamu taso munga ana yi mana shi ba anan gidan, kuma duk mu muka zaɓo ku, haka su Yaya Aisha duk su suka kawo mazajen aure, in ma haɗin ne ai muna da yaran da suka taso gaban mu a cikin family ɗin gasu nan duk sun isa aure, Meyasa bamu ce ya zaɓa a ciki ba?"

Yaya Auwalu ne ya kamo hannun shi ganin abun na neman kwaɓewa, bai kamata a samu irin wannan saɓanin ba gaban yara, shi kau gogan naku, zaune yake kaman mutum mutumi, me yasa Mahaifiyar tashi take haka ne, mahaifan shi ke saɓani akan shi? Lallai babu wadda tayi mashi, baya kuma jin zai iya auren yarinyar da take nufi, kai shi Sam ma tarbiyyar ta bata yi mashi ba, dama ya kula da yanda take shisshige mashi idan yaje gidan, ashe da biyu ma Mahaifiyar tashi ke aikenshi gidan, itama yarinyar dalilin da yasa take mashi wasu abubuwan kenan? Sai yanzu ma zuciyar shi ta shiga hararo mashi wasu abubuwan, yayi nisa a cikin tunanin yayin da idanu wan shi suke rufe ya tsinkayo maganar wan Mahaifin nashi yana cewa "ya isa Mustapha, Ya isa su ai mata ne, tinanin su ragagge ne, kuma duk wannan abun dake faruwa shi yaron ai gashi gaban ku zaune, har yanzu bai tanka ba, bama mu sani ba shin ko akwai wadda tayi mashi cikin rai? Ko akwai wadda suke tare? A bari aji ta bakinshi tukunna" yayin da ya maida kallon shi ga Al'ameen ɗin sannan ya cigaba da faɗin
"Shin Kai Al'ameen a cikin ranka akwai wadda kake so kuka yi maganar aure da ita? Ko akwai wadda ka yima Alƙawarin aure ne?

Falon yayi tsit, baka jin komai sai ƙarar ac da take ta aikin ta ahankali ahankali, kowa ya maida hankalin shi da natsuwar tashi akan Yaya Al'ameen ɗin, yayin da kanshi yake ƙasa, da yawa daga cikin ƴan matan da suke falon suna so ace sune ya zaɓa a matsayin aboki yar Rayuwar shi, Al'ameen ɗin ɗaya ne tamkar da dubu, komai ya haɗa, kyau, natsuwa, ilimi, gayu, ga uwa uba naira, runtse idanu shi ya sake yi gam, yayin da yake jinjina girman maganar da zata fito daga bakin shi, ahankali ya buɗe idanun nashi ya fara ɗora wa akan kakan nashi, Alhaji Isuhu da shima kaf natsuwar shi na akan jikan nashi, kaka zuwaira ya kalla ta sakar mashi murmushi irin nasu na dattawan da suke cike da natsuwa da kuma dace da ƴaƴa nagari, sannan ya ɗauke kallon shi kacokam ya ɗora shi akan Mahaifiyar tashi da ta cika fam, uwa zata fashe, dan dai wayewa da kuma halin tarin rai irin nata, Sam bata kawo ma ranta cewa yaron nata zai bijire ma buƙata tata ba, na amsar tayin ƴar ɗan uwanta da tayi mashi ba gaban kowa, bata yi tinanin zai watsa mata ƙasa a ido ba.

Kallon shi ya maida kan iyayen nashi maza biyu da suke zaman jiran cewa shi, sake ajiyar zuciya yayi ahankali, yayin da ya gyara zaman shi kan lallausan carpet ɗin da ya malale ilahirin falon, sannan ya nisa ya cigaba da faɗin " Eh ABBA, Akwai wadda muka yi Alƙawarin Aure, sai dai kuyi haƙuri jin ko wacece, Nidai ita nake so, kuma itama tana so na, kuma ina mai roƙon alfarmar da aura man ita, ita na zaɓa a matsayin abokiyar rayuwa ta, uwar ƴaƴa na, tarbiyyar ta tayi mun, komai nata yayi mun, kuma, kuma ina mai roƙon ta yi maku kaman yanda tayi mun"

Ya faɗa cikin salon maganar shi mai kama da ta saraki, sannan ya ƙara she yana duƙar da kai alamar roƙo da girmamawa ga iyayen nashi har dama kakannin nashi da suke zaune a wajen.

Murmushi Alhaji Isuhun ya sake cikin halin dattako ya shiga faɗin " Alhamdulillahi Faɗi kanka tsaye Ameenullah, nan kowa jiran yaji taka zaɓen yake yi, in da hali sai a haɗa da na shi Aleeyu baki ɗaya ma a wuce wurin.

Toh fa! kan kowa da yake zaune a falon ya ƙulle, har da mahaifan shi Al'ameen ɗin watau Hajiya Kubran da Alhaji Mustaphan, Aunty Feena ce ta kalli ƙanen nata cikin wasiwasi da tarabbabi, kada ya janyo masu wani abun kuma, ita ta san bayada wata budurwa da yake so, kuma ta san babu wacce yayi ma Alƙawarin aure, toh fa! Kaman zata ce wani abu sai kuma tayi shiru, ganin Al'ameen ɗin ya fara magana

"Abba Hauwa'u ce ta gidan mu watau Suhaann.. ɗiyar Ma.. Ma Maryama ta ɓangare masu aiki"

Salati Hajiya Kubra ta sake tana mai miƙewa tsaye tana taɓa hannuwa kaman wata sakarai, jin maganar tayi kaman saukar aradu, sakin baki tayi, yayin da su kuma su Nihal suka ƙwalalo idanu, ba su ba har Aunty feenar ma ta shiga komar mamaki, Afnan kuwa murna da farin ciki ne suka mamaye ranta, Aunty Suhan fa! Ko dai kunnen ta ne ke gaya mata ba daidai ba? Nihal ce ta shiga zumɓuro baki tana faɗin wallahi yaya a'a mai aikin mu ce fa?

Murmushi Alhaji Mustaphan yayi, ko babu komai ya san dalilin yaron nashi na yin hakan, tabbas ya jinjina ma yaron nashi, yayi na'am kuma da buƙatar tashi, sannan kuma ya bashi goyon baya ɗari bisa ɗari, jinjina kai ya shiga yi yana faɗin "Masha Allah, haka ake so Al'ameen yarinya tayi, kuma ina tare da kai, insha Allah zan shige maka gaba wajen ganin komai ya daidaita" yayin da Hajiya Kubran ta koma ta zauna bisa kujera inda ta tashi tana faɗin "kai shashasha ne Ameenu? Ashe baka da hankali? Me zaka ci da wannan yarinyar? To bari kaji ban yadda ba ka auri yarinyar da bata da asali koda kuwa ace mata sun ƙare ne a duniya, Ban yadda ba Sam, idan ba haka ba kuwa zaka gamu da fushi na, au ashe dama munafintata kake yi? Kana cen kana soyayya da wannan ƴar jariri yar abun? Sam ban lamunta ba, Alhaji har kana faɗin ka yarda, tau bari kuji ni Sam ban yarda Bako sama da ƙasa zasu haɗe bazan lamunci wannan auren ba"

Alhaji Auwalu ne ya shiga kwantar mata da hankali yana faɗin "Kai Mustaphan bamu gane yarinyar da yake faɗi ba, kar dai ace yarinyar da aka zo da ita a goye gidan ka, ɗiyar wannan mai aikin?"

Jinjina mashi kai Alhaji Mustaphan yayi cikin son bashi tabbaci, yaya Auwalun ne ya shiga faɗin ai ko hajiya ta yadda mu ba zamu yadda da wannan abun ba har sai an nemo asalin ita yarinyar, kai Ameenu ka bamu lokaci zamuyi ƙwaƙƙwaran bincike akai, kuma bamu ce ka cigaba da neman yarinyar ba har sai mun samu cikakke bayani akan ta,

Alhaji Mustaphan ne ya shiga faɗin hakan yayi daidai, zamu bincika bayan wannan yarinyar bata da wani abun da za'a ce an kasa auren ta, kasancewar ta ɗiyar mai aiki, wannan ba hujja bace, ni na yarda da yarinyar da kuma tarbiyyar ta, Allah yayi maka albarka Al'ameen kayi Abunda ake so, ina alfahari da kai da wannan tausayi da jin ƙai da kake tare dashi, Allah ya ƙara ma Rayuwar ka Albarka duniya da lahira"

Da ameen kowa ya amsa, yayin da Hajiya Kubra ta miƙe ta fice daga falon kaman zata fashe, da kallo kowa ya bita yayin da wasu suka shiga jinjina kai, shi kau Al'ameen ɗin duƙar da kanshi ya sake yi ya maida idanu shi ya kulle, me ya sanya shi yin hakan? Me ya janyo mashi? Yana so ne Mahaifiyar tashi ta canza halin ta akan masu aiki, yana so ne ta gane mecece duniya da Abunda ke cikin ta, Suhan ɗin alkhairi ce duk da kasancewar irin taƙaddamar dake cikin auren, ba soyayya tsakanin shi da yarinya Sam, bata ma san wainar da ake toyawa ba, kuma da wanne ido ma zai kalle ta yace mata ita ce ya zaɓa a matsayin wadda zai aura? Ta yaya zata kalli abun? Ta yaya ummanta zata fassara abun? Baya tinanin idan har umman bata yadda ba ko ta bada goyon baya ba abun idan zai yuwu.

*Wacece Suhan ɗin???*

Tambayar da ya shiga yi ma kanshi kenan

Nisawa yayi yana mai sakin ajiyar zuciya ahankali ahankali, yayin da ya kai kallon shi kan sauran ƴan uwa nashi, tashin hankali da ƙyara ƙarara ya hango cikin idanu saudat da Nihal ɗin tau sai dai shi ba tasu yaje yi ba, yana hango Abunda zai faru ne nan gaba, da irin ƙalubalen da zai fuskanta nan gaba wajen Mahaifiyar tashi, gashi har ta fusata ma tabar falon, dama ya san hakan ce zata kasance, kuma shi baya jin idan zai iya janye maganar shi, hakan ma wata dama ce da yarinyar zata iya tantance wacece ita.

Alhaji Auwalun ne ya shiga kwantar mashi da hankali, yana faɗin ba zamu ƙi amince maka ba, muddin muka ga babu abun ƙi tattare da asalin yarinyar, sannan muna mai baka shawara ka koma ku sasanta da Mahaifiyar ka, saboda abun yayi maka albarka, idan babu mai magana zamu rufe taro da addu'a da kuma sanya ran cewa manema auren saudat da Nihal ɗin zasu zo gobe idan Allah ya kai mu.

Babu wanda yace komai, kowa da Abunda yake saƙawa acikin ran ta, abie ma ba zamu iya tantance halin da yake ciki ba, mutum ne mai zurfi ciki, kusan ma yaso yafi Al'ameen ɗin, tau sai dai shi ɗan ɓangare Hajiya Kubran ne, sai abin da tace, ko ta zartar, saɓanin Al'ameen ɗin da komin yake biyayya yaga za'a kauce ma gaskiya baya bin wannan ayarin.

A haka aka kulle taro da addu'a yayin da iyayen nasu maza suka cigaba da zama wannan karon har da mama zuwaira ɗin domin su ƙara tattaunawa


Kowa ɓangare shi ya wuce, wannan ce ta sanya suma su Nihal ɗin komawa cikin nasu sashen inda suka tarar da hajiya Kubran zaune tana ta faman cika, zaman jiran Alhaji ya shigo domin ita ba da Al'ameen ɗin zata yi ba da wanda ya ɗaure mashi gindin yin abun zata yi, zata ji dalili, kuma tabbas zaman munafukar matar cen ya ƙare a gidana tinda so ake a mallake man ɗanɗa na. Abunda take ta faɗa kenan yayin da ta miƙe ta shiga safa da marwa, su dai aunty Feena da afnan ɗaki suka shige yayin da su saudat suka zauna suna ta ƙara yi mata famfo da ingiza mai kantu akan al'amari, muddin aka ce yarinyar cen ta auri yayan nasu ai sun kaɗe, yarinyar da babu irin wulaƙanci da tozarcin da basu yi mata ba, Amman ace wai zata zama aunty su, tabɗijam "lallai Mom baki ga ta zama ba" cewar Saudat ɗin

°°°°°°°°°°°°°°°°°°


Kai tsaye ɗaki shi ya wuce, kayan shi kawai ya cire ya faɗa toilet ɗin ya sakar ma kanshi shower, ko sauraren Bilal ɗin baiyi ba, da yake ta mashi magana, shi ɗin ma ya san halin ƴan kayanshi, ba zai samu amsa ba, balle ma ya lura da condition ɗin abokin nashi, anya kuwa wani abu bai faru ba a zaman taron na family ɗin? Yana cikin tinani Al'ameen ɗin ya fito daga toilet, ƙugunshi ɗaure da fari ƙar ɗin towel, yana ɗauke da ɗan ƙarami yana tsane kanshi, jikin shi ko ina gargasa ce kwance luf, baƙa siɗik, abun ka da farar fata, sai tayi mashii gwanin kyau, ko kaya bai tsay Sanyawa ba, balle ya cire towel ɗin ya faɗa kan gadon yayi rigingine fuskar shi na kallon cilling.

Kafaɗarshi Bilal ɗin ya dafa yana daga kwance "Man me ya faru ne? Ka gaya man na lura baka cikin natsuwa" kaman yana jiran cewar Bilal ɗin ya shiga faɗin "Friend na yanke ɗanye hukunci, ba tare da nayi tinani ba, Friend why? Me yasa nayi haka? Anya kuwa ban sha wani abu ba? Friend gaya man" ya faɗa yana mai tashi zaune ya juyo sosai busa gadon yana fuskantar abokin nashi, idanu shi sun kaɗa sunyi jajur dasu

"Yarinyar tausayin su kawai nake yi, babu soyayyar ta ko ɗigo cikin raina game da ita, me yasa haka? Na jawo ma kaina raini, duk dan in faɗa kar da mahaifiya ta akan illar tsanar mutum haka kawai, yaya Mahaifiyar ta zata kalli abun, miƙewa yayi yana mai gyara zaman to wel ɗin a jikin shi, ya shiga taka wa a hankali cikin ɗakin, kai komo ya shiga yi cikin ɗakin kaman yana neman wani abu.

Miƙewa Bilal ɗin shima yayi yana mai kamo hannun abokin nashi, tabbas ya san duk lokacin da yaga abokin nashi cikin irin wannan halin yana buƙata neman taimako ne.

Zaunar dashi yayi bisa sofar dake ɗakin mai zaman mutum biyu, "Cool down Friend, ka natsu ka gaya man meke faruwa ne?" kaman yana jiran shi ya ɗan zabura ya zamo daga bisa kujerar kaman zai zauna ƙasa, yayin da ya kama hannun Bilal ɗin ya runtse shi sosai, kaman zai tsinke hannun "Friend ni na zaɓe ta da kaina, ni na amince ma auren ta da kaina, yarinyar da ka gani jiya a gidanmu, na amince zan aure ta, Friend ka bani shawara, how am i going to do? Wannan ƴar yarinyar Friend, ko aure zanyi Ai tayi man kaɗan, Amman nine da bakina nace su Abba su nema man auren ta Friend ya zanyi? Bata san meke faruwa ba, bata san zan iya yanke wannan ɗanyen hukunci a kanmu ba, zata so ni? Zata yarda dani? Mahaifiyarta zata amince mani? Ya faɗa yana miƙewa tsaye, shima ɗin dai Bilal ɗin a kiɗime ya miƙe jin abin da abokin nashi yake faɗa mai kama da almara, mai kama da tatsuniya.

*"WHAT"*

*Al'ameen Are U In Your Sense?*

Bilal ɗin ya shiga faɗi a kiɗime cikin ɗaga murya, yana fatan kunnen shi basu ji mashi daidai ba, yana fatan ace mafarki yake yi, ina Al'ameen ɗin ina ƴar aiki, marar galihu, jiya jiya nan fa da daddare Al'ameen ɗin ke ce mashi ba'a san asalin yarinyar ba, inko haka ne me ya ja ma abokin nashi? Me ya shiga kanshi, saɓanin abin da yake son yaji ne ya shiga faruwa, lallai Al'ameen ɗinne ya shiga gƴaɗa mashi kai cikin tabbatas wa, da kuma neman mafita.


~Oum-Deedat ce~
[8/5, 8:25 PM] Aminatu Hassan: 🌹*_BAN FI K'ARFINTA BA_*🌹

🌺🌺🌺🌺🌺

https://www.facebook.com/groups/1569379426621615/
*~✍🏽✍🏽GOLDEN PEN WRITERS ASSOCIATION✍🏽✍🏽~*


*~❄We beare's of soon golden We writer's assiduously percieven No pain so Magical Our creative golden pen Be hold our worlds A production of our pen savour Our worlds for it cause u np pain✍🏽~*

*Rubutawa*--- Amina Hassan (Oum-Deedat)

*Hakk'in Mallaka*---(Oum-Deedat)

*Sadaukarwa*--- Ga Hauwau Hassan (jiddon dady😘) Amarya ta ango babu wanda zai iya fasalta k'auna ta gareki, k'anwa daya tamkar da dubu Allah ya barmu tare.


*Page ~15~*


°^^^^^^^^^^^^^^^^^^^^^^^^^^^^^°

"Hajiya Laila kina jina ko? Ki bani way out please ƙawata, ɗan cikina ne zai auri ƴar talaka? Talakan na ma'aikaciyar gida na? Wadda bata da komai, bata da asalin kirki ma? Kai ina ba zai taɓa yiwuwa ba sam wallahi"

Hajiya kubra ce riƙe da waya a hannun ta da alama waya take yi tin bayan shigar ta sashen nasu, ko zama t akasa yi sai kai kawo take yi a tsakanin tanƙamemen falon nasu da yaji kayan alatu kaman ba za'a mutu ba

"ina jin ki Hajiya Kubra" daga ɗaya ɓangaren aka bata amsa cikin isa da izza ga dukkan alamu dai ƙawarta ce.

"Ba kina jina zaki ce ba Hajiya Laila, mafita nake nema, kin dai sanni, kinsan buri na, kin kuma san yanda nake ƙaunar Al'ameen a duk cikin ƴaƴa na"

Ta tari numfashin Hajiya Laila cikin sauri

"Gaskiya ne Hajiya ta, ai wannan maganar ba ta waya bace, anya ma kuwa ba asiri sukayi mashi ba? Kin san fa tin lokacin da kika kula da shisshige masun da yake yi ya kamata ace kin taka ma abun burki, Amman son da kike mashi ya hana"

"Hajiya Laila wallahi nayi ƙoƙarin hakan tin lokacin, Amman ɗan banzan yaron nan yaƙi bani haɗin kai, kin dai sanshi da shegen zurfi ciki, da kuma miskilanci, ni kaina rasa gane kanshi nake yi"

Hajiya Laila ce ta tari numfashin hajiya kubran da cewa, "ba kince su keyi maku girki ba?". "Eh kwarai kuwa hajiya, in ba girkin su ba baya cin na kowa wlh" humm, Hajiya laila ta numfasa gami da sakin wani ɗan guntun murmushi ta cen ɓangaren, sannan ta ɗora da faɗin

"To wallahi ina mai tabbatar maki a nan suka samu, suka samu abin da suka barbaɗa mashi yaci, yanzu abin da nake so dake ki kwantar da hankalin ki, abun zai zo mana da sauƙi, kedai kiyi ƙoƙarin dawowa akan lokaci"

Nisawa Hajiya Kubra tayi cikin ƙunar zuciya da tsanani ɓacin rai, kaman zata haɗiyi zuciya ta mutu, sannan ta cigaba da cewa

"Shikenan Hajiya Laila, ina so please kiyi tinanin neman mafita, saboda ni duka ma kaina ya ƙulle wallahi, gabaki ɗaya yaron nan so yake ya birki ta mani lissafi, na yarda dake ne, insha Allahu kuma zanyi ƙoƙarin ganin na dawo akan lokaci, yanzu ma zuwan maneman su suhan ne kawai zai tsaida ni"

"Is OK Hajiya Kubra, baki da damuwa ki kwantas da hankalin ki, ina mai tabbatar maki da maganar nan zata sha ruwa, ko shi Alhajin da ya goya mashi baya, ba zai ma ƙara tada maganar ba, balle wani Alhaji Auwalu cen, da zaki ɗaga hankalin ki aka shi;To ko Isuhun ma bai isa ba balle ƴaƴanshi"😒

Hajiya Kubran ce ta murmusa mai cike da yaƙe, "Humm Hajiya Laila kenan, baki da dama, haka nake so, Shiyasa nake son ki nafi yadda dake akan kowa cikin ƙawaye na, na mayar dake aminiyata ta hannun dama ta, wuƙa da nama na hannun ki, a fara komai kafin in dawo, zan tura maki duk abin da za'a buƙata"

"Ba damuwa Hajiya Laila, ke dai sai kin dawo dai, ƙibar komai a hannuna, sai mun yi magana"

"OK shikenan a huta lafiya Hajiya Laila, sai Naji daga gare ki" ta faɗa tana mai datse kiran gami da zama cikin ɗan samun sassauci, saboda sanin halin hatsabibancin ƙawar tata, komai take so mai sauƙi samu ne, indai tabi ta hannun amini yar tata.


**************

"Look Friend kayi gaggawar yanke hukunci, aure ba abu bane da akeyi mashi hawan ƙawara, yarinya r zaka iya taimako ta, ba sai ka aure ta ba, ina so ka sani aure babu soyayya ba abu ne da ke ɗorewa ba, masalan yanda zaka yi manage na zama da ita, a yanda na san ka yarinyar bata yi daidai da ra'ayin ka ba, beside ma mahaifiyar ka...... "

Dakatar dashi Al'ameen ɗin yayi, ta hanyar ɗaga mashi hannu," Bilal! Please mubar maganar haka, kayi man addu'a kawai" abin da ya faɗa kenan, ya miƙe a hankali ya zura kayanshi, gami da zarar