You Cannot Download this book untill you login but you can read it .

---

Login Register

magana biyu ba, kuma ma banda abun ka, ai ba mace ke bada aure ba ko?"

" Ammi ki roƙe su su koma, ina cikin wani hali please Umma, Suhan ita kaɗai ce zata iya gyara mani gida na, da tsaftar ta, da kawaicin ta, da biyayyr ta, da haƙurin ta, Ammi ki taimaka mani don Allah"

Ya faɗa cike da kaɗuwa, yana kuma ƙoƙarin sake miƙewa.

Amman Ammin tashi ta damƙe hannun nashi kam, ta yanda ba zai iya kuma miƙewa ba.

"Nima Salim naso ka da yarinyar nan, na maka sha'awar ta, tarbiyyar ta, da hankali da natsuwar ta ta burge ni, saidai har yanzu ban fidda ran bazaka same ta ba, ban kuma fidda maka ran ko ka rasa ta, ba zaka samu wadda ta fiye maka ita ba, ina maka addu'a Salim, kuma zan cigaba da yi maka Addu'a, Allah ya shirya maka matar ka, sannan ya baka wadda zata kawo kwanciyar hankali a cikin gidan naka. Wanna shi e fatana a gareka a kida yaushe."

Ta ƙarashe maganar tata itama cikin ƙunar zuciya.

Har ga Allah bata ji haushin Umman a Suhan ba, saboda ita uwa ce, har kida yaushe zataso ta Aurar da ɗiyar ta ga wanda take so, to saidai itama kanta ƙarƙashin wani take, dole ne tayi biyayya, komin yanda take son abun, addu'a ita kawai zasuci gaba da bin yaran nasu da ita.

Rabon ko da taga Salim ɗin yayi hawaye an daɗe, duk yanda yake shan wahala da azabe zama da Ma'un baya damun kanshi har haka, Salim mai barkwanci, Salim mai yawan fara'a, Salim bai fidda wasu daga damuwa da zaulayar shi, tau sai ga Salim na hawaye gaban Ammin shi.

Guiwoyin shi duka ya sauke ƙasa, har yanzu hannayen shi na cikin na Ammin nashi, Tunowa yakeyi da wayar su ta ƙarshe da ita, Tunowa yakeyi da kallon shi da ita na ƙarshe, Tunowa da Kunyar ta, da yawan son karatun ta, yanzu shikenan ta tashi ba'a mallakin shi ba? Anya kuwa zai iya haƙura kaman yanda iyayen nashi suka buƙata?

A sanyaye ya miƙe tsaye, yana mai faɗin "Ammi zanje gida in kwanta, kaina yana yi mani ciwo"

"Ba inda zaka Salim, shiga ɗaki na ka kwanta, zuwa anjima sai ka tafi."

Ba musu ya fara taka matattakalar upstairs ɗin, yana mai jin kanshi yana wani mugun sara mashi.

Wanene wannan? Wanene wannan mai sa'ar da har zai iya mallakar yarinyar daya ƙwalkafa rai a kanta? Yarinyar da ya tsara yanda zaman gidan nashi zai kasance da ita? Shin tana ma son shi kuwa? Zata yarda da auren itama kuwa? Saidai yasanta, yarinya ce mai kawaici da biyayya, ba zata taɓa bijire wa umurnin iyayen nata ba.

Koda ya isa ɗakin, ciki ya tadda yaran nashi, suna ta faman wasan su, hankalin su kwance, ga kayan ciye ciye daya kawo masu, sun baje bisa gadon kakar tasu Ammi, sai cin abun su suke suna wasa.

Haka suka sake hawa kanshi, kowa da abunda yake faɗa, kowa ƙoƙarin bashi biscuit yakeyi yaci, hakan na burge shi da yaran, Amman sai gashi yau yana ture su, yana faɗin suje ƙasa suyi wasa kanshi ke ciwo.....




Hhhhmmmmmmmm







~Oum-Deedat ce~
https://www.facebook.com/groups/1569379426621615/


🌹 *BAN FI ƘARFIN TA BA* 🌹

🌺🌺🌺🌺🌺


*~✍🏽✍🏽GOLDEN PEN WRITERS ASSOCIATION✍🏽✍🏽~*

*~We are bearer's of so golden pen🖊~*
*~we write assidiously perceive no pain~.*
*~So magical,Our creative golden pen✍,behold our words.~*
*~A product of our pen🖊,savour our words, for it will cause you no pain.~*

>>>>>>>>>>>>>>>>>>>>>>>>>

*Rubutawa*--- _Amina Hassan (Oum-Deedat)_

*Hakk'in Mallaka*--- _(Oum-Deedat)_

*Sadaukarwa*--- _Ga Hauwau Hassan (jiddon dady😘) Amarya ta ango babu wanda zai iya fasalta k'auna ta gareki, k'anwa daya tamkar da dubu Allah ya barmu tare._


*Page ~49~*


°^^^^^^^^^^^^^^^^^^^^^^^^^^^^^°


Tin dai da naga text ɗinshi da daddare, sai na kawo ma raina ba zai kirani ba sai zuwa safe.

Hakan ce ta sanya, banyi gigin kiran shi ba, har kusan ƙarfe goman safiya.

Ya kamata ace ya kirani, ko don inji yanda akayi da maneman auren suka je.

Ban dai kira ba, amman zuciya ta na ta saƙa man in kira shi inji halin da ake ciki.

Har yanzu gabana bai bar duka ba, sai kuma hankalina ya fara tashi, gashi munyi waya da Umma da safe itama bata ce man ga yanda ake ciki ba.

Hakan ce ta sanya ni kiran Hafsat, saidai muka gama gaisawar da ita Amman itama bata ce man komai ba.

Ban iya tambayar ta ba dai, kunya nake ji sosai, tun da dama nasan ita bata ra'ayin abun a cikin ranta, ɗan uwanta kawai take so.

Haka nayi shahadar kiran Sir Salim ɗin.

Kira na sau biyu amman ba'a ɗaga ba.

Kasaƙe nayi da waya riƙe a hannu, ga su khadee suna ta tambaya ta wai ko an sanya bikin ne?

Rasa abunda zance masu nayi, saidai na miƙe tsaye ina mai ficewa daga ɗakin, wayata riƙe a hannu.

Sake jaraba kiran nashi nayi, wannan karon ma ta shiga, saidai tana fara ringing aka katse.

A'ah me ke faruwa ne?

Sake kira nayi, amman sai ba'a katse ba, aka barta ta cigaba da ringing, har said ata gaji ta katse don kanta.

Gashi dai ina jin kunya, bana iya kiran Ammi, hakan ce ta sanya dole na koma ɗaki na kwanta, nan na tarar su Raihana sun tafi lecture.

************

Baya jin zai iya ɗaga kiran nata a daidai wannan lokacin, hakan zai iya ƙara karya mashi guiwa.

Muryar ta kaɗai yake da muradin ji, Amman idan ya tuna da hakan ba zai wani amfane shi ba, mallakn wani ce, sai ya runtse idon shi ya sake buɗewa, har yanzu dai wannan abun da ya tattaru ya dunƙule mashi a maƙoshi ya kasa wucewa.

Har Ammi ta gama tattara yaran nashi ta shirya masu zuwa makaranta, driver ya ɗauke su, yana nan kwance bisa gadon nata, shi ba bacci ba, shi ba ido biyu ba.

Babu sauran kuzari ko walwala tattare dashi, yana tuno farko haɗuwar shi da ita.

Sanyin ta, tarbiyyar ta, duk waɗannan abubuwan idan ya tuna wai ya rasa su, sai yaji kanshi ya ƙara yi mashi nauyi.

A haka Ammi ta shigo ɗakin ta same shi.

Bakin gado ta kai zaune cikin sanyin jiki itama, ƙura ma yaron nata ido tayi, har yanzu tana iya hango irin Abunda take gani a cikin idanun shi, aduk lokacin da ya nemi wani abu ya rasa, tin yana yaro, saidai da yake shi ɗin mai haƙuri ne, tasan zata iya shawo kanshi da izinin Allah.

"Salim" ta faɗa a hankali.

Ganin hakan da yayi ne ya sanya shi tashi zaune, yana ƙure Ammin tashi da kallo irin na ban tausayi.

A take tausayin yaron nata ya kuma tsira mata.

Duka hannuwan shi ta kamo.

"Salim Abban" sunan da take yawan kiran shi kenan duk lokacin da rashin irin wannan ya same shi.

Da gefen baki ya ɗan murmusa mata, irin yadda shima ya kan yi mata.

Hakan ne ya ƙara mata ƙwarin guiwar ci gaba da abunda take da niyyar faɗa.

"Nasan ba daɗi Salim, to saidai bamu da yanda zamuyi, dole ne kuyi biyayya ga iyayen ku, masalan ma ita da take mace, ba ita zata aurad da kanta ba, wannan yasa nake matuƙar so ka taimaka mata wajen yin biyayyr ga iyayen nata. Ba zan ji daɗi ace ka koma mata ba a yanzu, inaso ka sanar da ita dukkan abunda ke faruwa, sannan ka yanke duk wata alaƙa ta soyayya dake tsakanin ka da ita, ina maka addu'ar Allah ya baka wadda ta fita"

Da idanun shi da suka cenza kala yake daɗa bin Ammin tashi da kallo.

"Ammi ina son Suhan matuƙa, nayi rashi Ammi, ya zanyi? Naso ta shigo gidana, ko da hakan zai zama silar samuwar haske a cikin gidan nawa, nima in zama mai gida kaman yanda sauran maza keyi, Ammi ita kaɗai ce zata iya..."

Girgiza mashi kai ta shiga yi.

"Salim kada ka sare, da izinin Allah zaka samu wadda ko bata fita ba, itama ba abunda zaka nema a wajen ta ka rasa, insha Allah"

Sauke ƙwayar idanun shi yayi ƙasa, ji yake kaman ya saki kuka, ko ya samu maƙoƙon da ya tokare mashi ya wuce.

A hankali yake haɗiye wasu irin miyau masu zafin gaske.

"shikenan Ammi, ki cigaba da taya ni addu'a, nagode ƙwarai, ina alfahari da samun uwa ta gari, nagartatta kaman ki, ki faɗama su Abba cewa *Na janye kaman yanda suka buƙata* Allah ya zaɓa mana Abunda yafi zama alkhairi, ya sanya hakan shine alkhairi gare mu baki ɗaya"

Cikin tausayawa take bin shi da kallo, ita kanta tasan tayi rashin suruka ta gari.

"Ba komai Son, Insha Allahu zan cigaba da yi maka addu'a, ita kuma Ma'u Allah ya shirya mana ita, ya sanya ta gane gaskiya, kuma ya bata ikon yin aiki da ita, ko yanzu ka kawo wadda kake so, a shirye nake da na mara maka baya ka same ta Salim, sannan inaso idan kaje makarantar ka haɗa ni da Suhan ɗin zamuyi magana"

Jinjina mata kai ya shiga yi, ko ba komai ya ɗan samu relief, wani sashe na zuciyar shi yayi sanyi, Ammin tashi mace ce wadda ba kowa Allah yaba irin ta ba, a matsayin Uwa, samun ta kaɗai a rayuwa ya gamsar dashi. Shiyasa a kullum yake daɗa alfahari da ita a rayuwar shi.

Zuro ƙafafu shi yayi daga bisa gadon a hankali yana mai miƙewa, sannan ya maida kallon shi kan Ammin tashi, da ta riga da ta saki hannun nashi.

"Ammi Abban fa? Bamu gaisa ba, gashi ina so in wuce, ban ɗauki excuse ba"

"Ayya, Gashi kuma tin safe ya wuce majalisa (Senate) saidai ko ka kira shi, yace ne suna da muhimmin Meeting ta yanda za'a shawo kan matsalar wannan ƙarin harajin da gwamnati tayi, sannan da rufe boder"

Ɗaga mata kai yayi alamun gamsuwa, sannan ya fara takawa zuwa sauka down stair.

A baya ta biyo shi har suka sauko tana mai ƙara yi mashi nasiha akan yadda da ƙaddara.

A bakin ƙofa ya tsaya, yana mai kamo Ammin ya manna mata peck a goshi, sannan ya fice tana mashi fatan Allah ya kiyaye hanya.

Ba Abunda zai koma gidan yayi, hakan ce ta sanya shi ɗaukar hanyar zariyar kai tsaye ba tare da ya kuma bi ta kan Ma'un ba.


********

Sanye yake cikin dakakkiyar shadda, ruwan bula, sai hula daya aza bisa kan nashi itama bula ce.

A hankali yake takawa zuwa sashen amaryar tashi.

Ƴan aiki sai kallon shi suke yi, suna kuma gaida shi, haɗi da jinjina irin jajircewar Alhajin ta fannin tsaya ma gidan nashi, gashi dai kowa yayi tunanin wata fitinr zata ɓullo ta fannin Hajiya Kubra, Amman ga mamakin su, duk sai suka ji shiru kuma, kaman ma babu abunda ya faru a cikin gidan.

Ba kowa a falon, sai kayan kallo da suke ta aikin yi, da kallo yabi sashen, ko ina tsaf-tsaf, ga ƙamshin girki da yake tashi, wanda ya haɗe da na room freshner da ta fesa a ɗakin ta Naseem.

Duka ɗakunan ya leƙa bata ciki, hakan ce ta sanya shi nufar kitchen.

Ta gama soya dankalin ta lafiyayye, ta haɗa coleslow da ƴar stew ta anta da kwai, sai tea data haɗa wanda ya sha lemon grass da kayan ƙamshi.

Ta juye kenan zata fito sukayi kiciɓis.

Da murmushi a saman fuskar ta, sai kuma ƴar Kunyar shi da har yanzu bata gama sakin ta ba.

A hankali taja baya tana mai gaida shi.

Cikin murmushi ya sanya hannu ya amshi plate ɗin, ita kuma sai ta koma ta ɗauko Mug ɗin tea ɗin da wani fork.

Gaba ya shiga tana bin shi a baya, har bisa dining table ɗin.

Kujara yaja ya zauna, itama tana mai zama, ƙara gaida shi ta yi, ya amsa cikin sakin fuska da walwala irin ta dattawn arziƙi.

"Alhaji bismilla mana, ka karya don nasan dai da wuya idan kaci wani abu, don naga ka fito da wuri yau"

Ta faɗa a kunyace irin tasu ta manya.

Da kallo yake binta, tayi kyau, duk ta cenza abun ta, kaman wadda ta shekaru a cikin hutu.

Atamfa ce jikin ta, an mata ɗinkin zamani mai kyau, sai yake ganin kaman ma bata taɓa haihuwa ba, balle ace ta ajiye kaman Suhan.

"Kin bani ne? To wa zai bani idan ba ke ba?"

Ya faɗa cikin zaulaya.

Itama dariya tayi a hankali, tana mai tura mashi Mug ɗin tea ɗin gaban shi.

"Afuwa Alhaji, to gashi, ai bansan yanda tsarin yake ba, naga duk tare kuke cin abinci ne cikin gidan, Shiyasa nayi tunanin ko ka karya"

Bai ce ƙala ba, in banda murmushi da yake yi, yaja cup ɗin gaban shi, yana mai ɗaukar cokalin ya fara cin abincin.

Ba sabon abu bane a wurin shi, cin abincin nata, to saidai yau yake jin kaman abincin nata ya ƙara daɗi, gashi dai ba wani tarkace a ciki, Amman ɗanɗanon yayi mashi daɗi a baki.

"Magana nazo muyi dake Umman Suhan, to Amman dai kafin nan kije ki haɗo naki tea ɗin, tinda na ƙwace maki wannan"

Itama murmushi ta sake saki, tana mai tura kujerar baya, sannan ta miƙe ta nufi kitchen ɗin.

Da kallon jin daɗi ya bita, yana ayyanawa a ran shi, yanzu ne aure ya tabbata a gareshi, ko bayan hakan ya samu natsuwa da kulawr da yake da muradin samu a wurin Umman, wanda tun tuni yake fatan ya samu, masalan idan yaga yanda matan abokan shi ke ba mazajen nasu kulawa, kai ko Alhaji Auwalu da ya fishi manyanta, kuma itama Hajiya Zainab ɗin tafi hajiya Kubran Manyanta, Amman kulawar da suke samu Sam bama a haɗawa.

Bata daɗe ba sai gata ta fito, hannun ta ɗauke da madaidaici Mug ɗin itama.

Zama tayi, tana mai sake sakin murmushi, sannan ta sauke kanta ƙasa, suka ci gaba da karyawar, duk da dai a matuƙar takure take.

Ta riga Alhajin ajiye cokalin ta, sai bayan da ya gama ne shima ya tattara dukkanin hankalin shi a kanta.

"Maryam Magana nake so muyi dake ta fahimta, ina fatan kuma zaki bani dukkanin goyon bayan ki, a matsayi na na wanda yanzu na tashi daga mutumen da kuke ma aiki, na koma mijinki mai gidan ki, ina fatan kin fahimta?"

Gyaɗa mashi kai ta shiga yi, cikin girmamawa da mutuntawa.

Hakan ne ya sanya shi jin daɗi, gyara zaman nashi yayi bisa kujerar yana mai fuskantar ta, da yanda zata so maganar ko kuma yanda zata fahimce shi, har ta ɗauki al'amarin.

"Maganar Auren Suhana dai ce, jiya maneman aure sun zo daga Adamawa, kaman yanda kika sani, to saidai ban samu sanar dake yanda mukayi dasu ba, saboda muna shawara wani al'amari ne da yaya Auwalun tin jiyn. Amman alal haƙiƙa bamu amsa masu ba, daga ni har Alhaji Auwalun, dalili kuwa shine, yaron ki Al'ameen tin farko tin kafin ma ta shiga makarantar da suka haɗu da shi wancen yaro, shi Muhammadun shine ya fara zo mana da buƙatar auren Suhanan, to Amman saboda wasu dalilai acen baya, ya sanya muka dakatar dashi, sannan muka hana shi bayyana maku, har sai lokaci yayi, to kafin lokacin ne duk Abunda ya faru, ya faru. Saboda haka, inaso ki bani damar ba Muhammadu izinin neman ita Suhan ɗin, idan Allah yasa sun daidaita kansu, tana sonshi to falillahil hamdu, kinga ai gida batanƙoshi ba ba'a kaiwa dawa. Har ga Allah ni dai na yarda, kuma na amince da tarbiyyar da kika bata, hakan ce ta sanya kuma bana tunanin har zaki iya bijire wa wannan buƙatar tawa, nasan zaki ce Hajiya Kubra ita mahaifiyar Muhammadun, to inaso ki sani, ke babu ruwanki a wannan maganar, ki bar komai a hannu na, yanzu dai amincewar ki muke buƙata"

Da tsananin kallo take bin Alhaji Mustapha ɗin, saidai kwarjini, girma haiba tashi, ba zasu iya barin ta bijire wa buƙatar tashi ba, kaman yanda ya furta.

Ƙasa ta sake yi da kanta, tana mai jinjina wannan al'amarin, anya kuwa hakan zata yuwu? Ko ba hajiya Kubra ba, ai duniya sai ta zage su, sai ace son abun duniyar nasu yayi yawa, gashi dama har yanzu ta kasa fita waje balle su haɗu da su Mama talatun.

"Ko in baki lokaci ne kiyi shawara?" Alhaji Mustaphan ya faɗa cikin son jin ba'asi.

Tabbas Al'ameen yaro ne nutsattse, duk wani abu da ake buƙata wajen ɗa namiji ya tattara su, kusan ma zamu iya cewa idan ana zartarwa to shi fa ya zarta, Amman Hajiya Kubra ba lafiya bace...


Miƙewa Alhaji Mustaphan yayi, har yanzu da sauran murmushi a kan fuskar tashi, Allah sarki, dattijon arziƙi kenan.

"To shikenan ni zan fita, muna da Meeting da shugaban ƙasa, kiyi shawara da zuciyar ki, Amman inaso ki sani *Ni Alhaji Mustapha Yusuf Dambulan, ina nema ma yaro na Muhammadu Al'ameen Mustapha Dambulan, auren yarinyar ki Suhan* da fatan za'a amshi ƙoƙon barar namu da hannu bibbiyu."

Yana gama faɗar haka ya sanya kai ya wuce, yana mai faɗar "Nagode da abinci, lallai yau kada ki sanya in ta bacci a office ɗin shugaban ƙasa"

Miƙewa tayi itama, tana mai sakin fara'a, raka shi tayi har bakin ƙofar fita daga sashen nata, daga nan ta tsaya tana mashi a dawo lafiya hannun ta ɗauke da briefcase ɗin tashi tana miƙa mashi.

Amsa yayi yana mai sanya mata albarka, har ya juya zuwa ga motar tashi, sai ga mota ta shigo cikin harabar gidan.

Ɗan dakatawa yayi da shiga motar da driver ɗin nashi ya buɗe mashi ƙofa, domin ganin ko su wanene.

Hajiya Zainab ce ta fito daga cikin motar, Sanye take da tsadadden lace, hannun ta ɗauke da jikkar ta, cikin mutun ta juna ta isa ga motar ƙanin mijin nata, yayin da shima ya fasa shiga motar ya nufe ta suka shiga gaisawa.

Sai bayan da suka gama gaisawar ne sannan ta nufi sashen Umma dake tsaye tana iya hangen su.

Ɗan runguma juna sukayi, alamun gaisawa sannan suka rankaya cikin falon gabaki ɗaya, yayin da motar alhaji Mustaphan ƙirar Range Rover 2019 fara ƙar ta sanya kai ta fice daga cikin tanƙamemen gidan.

Hajiya Kubra da take tsaye jikin window ɗinta ta ɗaki daga upstair ta saki labule tana mai komawa baya, cikin ƙutawa take faɗin "ayi dai mu gani maciya amana"

Bayan ƴan gaishe gaishe irin na mata, Umman tawa ta buƙaci ta kawo ma Hajiya Zainab ɗin kayan breakfast, Amman sai tace a'a wlh sauri takeyi zata wuce ne. Dama akwai Abunda ya kawo ta ma yanzu.

Cikin kulawa Umman tawa take kallon ta.

"Umman Suhan, akan maganar yaran nan ne, ina roƙon ki da girman Allah ki amince masu su auri junan su, shi Al'ameen ɗin yaje mani da maganar wai kin hana, saboda mahaifiyar shi, haba Maryama, mahaifiyar shi ce zata zauna da ita ko shine zai zauna da ita? Ba'a aure ita aka aure ta? Ina ce itama ita taga Alhaji Mustaphan ta nuna tana son shi? Don haka ni banga abun hanawa anan ba, yara dai suna son junan su, ba tin yanzu ba, tin lokacin da aka fara kawo maganar auren su Hafsatu shima yace Suhanan yake so, aka dakatar dashi, wanda tin lokacin ni banji daɗi ba, tinda yaro yace aure yake so, kuma ga wadda yake so ba sai a bashi ba? Ko yarinyar ce tace bata yi?"

Ta ƙarashe da jefa ma umma tambaya.

Ita dariya ma abun ya bata, gaskiya ba abunda zata iya cewa da waɗannan mutanen sai godiya, ƙauna dai sun nuna mata ita, ita da yarinyar ta, har wani lokaci ta kan ji babu abunda zasu iya nema a wurin ta, ta kasa basu.

"To Alhaji Auwalu ne ya turo ni, yace inzo da kaina, kuma saƙo ne, muna neman auren Suhanan, don Allah ki bamu asamu ayi a wuce wurin, duk abunda zai biyo baya a shirye muke da mu ɗauka, indai mun samu anba yaron namu"


Da murmushi Umman ke kallon ta, sai kuma ta shiga cewa "A hajiya Zainab ya da haka kuma? Ba komai Allah ya shige mana gaba, Allah kuma ya zaɓa Abunda yafi zama alkhairi, ai Muhammadu yaron kirki ne, kuma yaro ne nutsattse Sam ba don komai na hana ba, sai don gudun zagin mutane, da kuma siya ma ita Suhanan mutunci, bana so ta sake shiga wani halin ƙunci kuma anan gaba, Shiyasa ma na amsa ma Wancen yaron malamin su, Amman tinda anyi haka Allah muke roƙo da ya shige mana gaba."

Farinciki fal a ran Hajiya Zainab ɗin take cewa" Yo wace irin maganar mutane kuma? Mutanen yanzu da idan kika biye ma faɗar su babu abun ariziƙin da za'a ƙulla, ki ƙyale su duk wanda bai zaga ba, bai shirya bane" sai kuma ta miƙe tana faɗin" yauwa ko ke fa ƙanwata? Allah ya basu zaman lafiya, kar ki wani damu, insha Allahu auren nan alkhairi ne a tattare damu baki ɗaya, nabarki lafiya, bari in leƙa sashen Kubra ɗin sai in wuce"

Itama Umman miƙewa tayi tana faɗin "to ko in raka ki ne?"

"a'a wallahi yi zaman ki, bari inje ai sauri ma nakeyi, itama dai don kar ace nazo gidan ne ban shiga ba mun gaisa"

Duk da haka har saida ta raka ta ƙofar falo, sannan ta koma ciki, yayin da Hajiya Zainab ɗin ta wuce sashen Hajiya Kubra.

Bakin gado ta koma ta zauna, tana tunano halin karamci irin na Ammi, gashi bata da wayar ta balle ta kira ta ta bata haƙurin yanda al'amari ya juye lokaci ɗaya, su duka ta tausaya masu, masalan ma shi Salim ɗin da ta kula yana ƙaunar Suhanan da zuciya ɗaya.

Runtse idanun ta tayi, tana mai kwararo ma Suhanan addu'ar zaɓin Alkhairi a cikin Al'amarin.

Ta daɗe tana sallama a sahen, sai cen ne Afnan ɗin ta fito, ga alamu ma bacci takeyi, don kayan bacci ne a jikin nata.

Cikin fara'a ta ƙara so tana gaida Hajiya Zainab ɗin.

Sai kuma ga Aunt Feena ɗauke da nasreem, jaye da Ayan, itama gaishe ta ta shiga yi cikin girmamawa.

Cikin jin daɗi Afnan ɗin take ce ma hajiya Zainab ɗin, bari taje ta kirawo Mom ɗin tasu.

To tace mata, tana mai zama ta ɗauki Nasreem tana mata wasa, tana ce ma Ayan mijin da babu cefane kyaun shi bola

Cikin fara'a suka shiga ƴar fira da Aunt Feena ɗin, ita mace ce da abubuwan duniya basu cika shan kanta ba, bata cika kula da abubuwa ba, saidai wani lokaci halin Mom ɗin tata kan ɗanyi tasiri a kanta, shima ba wai yarda takeyi ba duka, saidai halin ɗa da mahaifi, wasu abubuwan idan Mom ɗin ta cika faɗa kan yi mata zafi, duk da itama wani lokaci bata mara wa Mom ɗin tata baya.

Afnan ce ta sauko tana mai faɗin "Tace tana zuwa"

Da to Hajiya Zainab ɗin ta bita, itama zama tayi suna ɗan fira, har ake zancen Hafsat, suna so ne zasu je gidan nata kafin su wuce.

Har kusan rabin awa, Hajiya Kubran bata sauko ba, har Hajiya Zainab ɗin ta miƙe cikin ƙunar zuciya, tana mai cewa su gaida Mom ɗin tasu idan ta sauko, sai kuma gata, cikin takun ta na isassu take saukowa daga bisa matattakalar.

Bisa wata kujera mai cin mutum ɗaya tayi ma kanta mazauni.

Hajiya Zainab ɗince ta fara gaida ta cikin sakewa.

Cikin shan ƙamshi take amsawa kaman wadda akayi ma dole.

Sai kuma ta maida kallon ta kan su Aunt Feena ɗin da suke zaune, alamun su bata wuri.

Cikin mutuwar jiki su duka suka miƙe suna mai ficewa harabar gidan, basa so Mom ɗin tasu ne ta yima