You Cannot Download this book untill you login but you can read it .

---

Login Register

ƙara so wajen da Al'ameen ɗin ke tsaye yana faɗin

"Ran ango ya daɗe"

Ya faɗa yana mashi alamar jinjina haka cikin wasa.

Ɗan tamke fuska Al'ameen yayi, yana mashi alamun to ya tona masu asiri, ɗan waiwayawa Bilal ɗin yayi bayan su, yaga babu mai kallon su, sai kuma ya saki dariya mai sauti yana faɗin "Shegen gora, wannan kyau haka kaman yau ne ɗaurin auren?"

Sai a lokacin ya saki ɗan murmushi yana faɗin

"bana cike da iskancin ka Friend, bakaji yanda gabana ke ta faman faɗuwa ba, gashi ina ta kiran ka baka ɗaga ba"

"Ai ina ganin kiran, to na riga na kusa ƙarasowa shine nace bari kawai in bari in iso, sai inji menene?"

Sashen Alhaji Mustapha suka ranka ya, sun tadda ya shirya cikin shadda skyblue mai babbar riga, shima yayi kyau ainun, dama Alhaji Mustapha ba dai kyau ba.

A tare suka fito, mudi suka sanya ya fiddo masu wata mota mai ƙirar jeep da tun jiya Al'ameen ɗin ya sanya shi wanke ta.

Bilal ne ya shiga mazaunin driver sai Al'ameen a gefen shi, yayin da Alhaji Mustapha ya shiga baya, suka nufi gidan Alhaji Auwalun.

Shima sun tadda ya shirya, ba ɓata lokaci suka ɗauki hanya, yayin da Alhaji Mustaphan da yayan nashi suke ta firar su daga cen baya, shi kuma gogan naka ya luluƙa duniyar tunani.


**************************


Nasha baccin ƙalula yau, ba tashi da wuri tinda ba'a makaranta nake ba balle ince lecture, kafin in tashi Hajjo da ummata sun gama komai, yau tea muka sha da bredi harda wainar kwai, bayan na gama karyawa ne na fita na share tsakar gida, haɗi da gyara ɗakin namu.

Ruwa Hajjo zata je ɗebowa, hakan ce ta sanya ni ce mata ta bari idan na kammala komai nayi wanka zanje in ɗebo mana, tinda na aikin gida ne, kuma naga da ɗan saura.

Sai kuma muka zauna muna ƴar fira haka da hajjon, ummata na sanya mana baki jefi jefi, sai kuma ta miƙe haɗi da yin wanka, a tare muka fita da ita wajejen azahar zata je gidan ƴan uwan hajjon yi masu gaisuwa da yake an yi masu rashi kwanaki, shine zata koma yi masu gaisuwa, hajjon ce ta zauna gida haɗi da ɗora girki.

Muna tafe muna ƴar firar mu, har zuwa inda zamu rabu da umman tawa.

Ko da na isa rafin, na ɗebo ruwa kwatsam ina cikin tafiya, sai na kula kaman ana bina, na ɗan waiwaya sai naga wasu samari su uku, ƙara sauri nayi, sai kuma Naji ana ta faman tsayar dani.

Ware ƙafa nayi zan taka da gudu naga sun sha gabana

"Haba ƴan mata, ya ana ta maki magana kina wani share mutane kaman baki ji ba? Daga zamu taimaka maki? Tinda mun kula kinyi kwantai da sunan kin tafi wai karatu binni, Amman wa ya san abunda kike aikatawa acen ɗin?"

"Hasbunallahu wa ni'imal wakil"

Shi nake ta maimaitawa, domin dai ga dukkan alamu waɗannan ba mutanen arziƙi bane ba, gashi wurin ni kaɗai ce, ga dukkan alamu wulaƙanci suke neman yi mani, gashi su uku ni ɗaya.

Tulun dake bisa kaina na saki, haɗi da tattare zani zan sake kwasawa a guje naji ɗaya daga ciki yaja mani hijab ta baya.

"Malam Lafiya? Wai minene haka ne? In na saurare ku me zance maku?"

Na faɗa ina mai tattare dukkanin dauriya da ƙwarin guiwa ta.


Dariya suka sheƙe da ita, suna mai faɗin

"Tin kwanaki muka ganki a ƙauyen nan kuma muka ji muna sonki, mun bincika sai muka gane ashe ke ƴar wannan matar ce mai nuna ita ta Allah ce, sai kuma gashi ta tura ki bunni neman kuɗi da sunan karatu, muna so dai ki bamu haɗin kai, babu wanda yaji ba wanda ya gani, kinga cen bayan bishiyar cen? Nan zamu ɗan kewaya, mintina ne ƙalilan mun gama, zamu kula dake a ƙauyen nan, duk wani mai neman shiga hurumin ki zamu kare ki"


"Innalillahi wa 'inna ilahi raji' un, la'ilaha illa anta subhanaka inni kuntu minazzalimeen"

Abunda nake maimaitawa kenan, ai tuni hawaye suka shiga zarya akan fuska ta.

"Kuyi haƙuri, ku dubi girman Allah, wallahi ni ba ƴar iska bace ba, wallahi karatu nakeyi a bunni ba iskanci ba, wallahi ban iya ba, kuyi haƙuri don Allah, kada ku keta mani daraja ta"

Na faɗa cikin kuka riris, gashi sun cukuikuye mani hijab ɗita, sai faman kokowa nakeyi da guda ɗaya daga cikin su da yake neman kaini ƙasa.

Kokowa sosai ta ɓarke tsakanin mu dasu, maza ne su ba mata ba, har dai saida sukayi nasarar yada ni ƙasa cikin yashin da yake shinfiɗa ta gefen rafin.


****************************



Baisha wahalar gane gidan ba, sai gasu har ƙofar gidan, su duka babu wanda baiyi mamakin har ta yaya akayi Al'ameen ya iya shigowa nan ba, neman su Suhan ɗin, har kuma ya same su anan ɗin.

To su ta yaya ma tunanin su zai iya basu akwai wani ƙauye nan ciki haka da har mutane ke rayuwa a ciki?

Sallama suka sanya akayo masu a cikin gidan, bayan sun firfito. Shi dai Al'ameen bai san dalilin faɗuwar gaban shi ba, shi kau Bilal sai ƙarema gidan kallo yakeyi yana mai ɗan murmusawa shi kaɗai yana tunanin ƙarfin hali irin na Aminin nashi da har ya iya gano wannan wurin.

Yaron ne ya dawo yace "wai ance ana zuwa"

Alhaji Mustapha ne ya zaro ƴan dubu dubu guda uku ya ba yaron yana faɗin "an gode maza gida kaji kaje ka kaima maman ka"

Cikin su babu wanda yayi mamakin kyautar, saboda sunsan ya saba da irin haka, taimakon marasa shi, shi kau yaron ganin kuɗi masu yawa duk da ba sanin su yayi ba sosai, sai ya ruga da gudun tsiya zuwa gida yana ta murna.

Hajjo ce ta sanya Hijabinta ta leƙo wajen, ganin ƙatuwar mota da manyan mutane tsaye ya sanya idasa fitowa tana gaida su.

Cikin sakin fuska Alhaji Auwalun ya Amsa yana faɗin

"Mu baƙi ne, wajen Maryama muka zo, mune waɗanda ta zauna a gurin mu shekaru da daɗewa"

Sakin fuska sosai hajjon tayi tana masu maraba, sai kuma ta juya zuwa cikin gidan tana mai cewa su shigo.

Da yake rana ta kawo sasai, ɗakin umman ta buɗe tayi masu shinfiɗa ciki, tana mai cewa Aiko gashi Umman taje unguwa, Amman bari ta je ta kira masu ita.

Da to suka bita, cikin su babu wanda baiyi mamakin inda muke rayuwa ba a yanzu, masalan ma Bilal da Alhaji Mustapha, jinjina dalilin da ya sanya suka zaɓi suyi wannan rayuwar suke yi a cikin zuciyar su.

Al'ameen ne yake shaida ma mahaifn nashi cewa zasu koma mota su zauna, basu hana su ba, tinda sunsan a takure suke wajen ga kuma tsananin zafi da ake fama dashi.

Fitowa sukayi, saidai basu shiga motar ba, Al'ameen ke cewa Bilal yazo ya raka shi su zagaya garin suga yanda yake.

Bilal yasha tuƙi ya gaji, ga zafi yanaji, cema Al'ameen ɗin yayi ya tafi shi dai ya gaji dayawa, yana nan cikin mota yana jiran shi.


Ba tare da ya kuma cewa ƙala ba ya juya ya tafi, shi mutum ne da bai san yanda ake magiya ba, hakan ce ta sanya shi ƙyale abokin nashi, ko ba komai yayi mashi uziri, zafin ranar da akeyi kaman ana tafasa ƙwaƙwalwa.

Hannun shi soke cikin aljihun wandon shi yake ratsa ƙauyen, yana ta ƴan kalle kalle, har zuwa ƙasan wasu bishiyoyi da sukayi ma wani wuri ƙawanya, baya kyautata zaton babu ruwa a wurin, hakan ce ta sanya shi taka wa a hankali ya doshi wurin.


A zabure na miƙe, ina mai sake sakin wata razananniyar ƙara da saida wurin gabaki ɗaya ya amsa kuwwa ta.

Kuka nakeyi ina roƙon su, kaman ma ba da mutane nake magana ba, jana suke yi a ƙoƙarin su na kaini bayan bishiyar da suka nuna mani ɗazu.

Cikin sauri ya shiga taka wa har yana ssssarfa, wurin da yake jin ƙarar na fitowa yake nufa, idan ba kunnuwan shi bane keyi mashi gizo ba, sautin muryar mace ne yake ji yana fitowa, ihu takeyi, tana naiman taimako.

Sai ga Al'ameen yana ɗan gudu kaɗan haka, kaman mai four-fourty haka.

Tin daga nesa ya hange su, maza ne zarata har uku, suka rufa akan yarinya ƙwaya ɗaya tallin tal, janta suke ko ina zasu kai ta?


Tin daga nesa yake daka masu tsawa cikin wata irin murya da bansan yana da ita ba.


"Kai kai ku tsaya, ina zaku kai ta? Me zakuyi mata?"

Ya faɗa yana mai ƙarasawa inda suke tsaye, Nidai hijab da ɗan kwali sun rufe mani fuska, ihu kawi nakeyi ina "Ku sake ni ku ƙyale ni, ni ba ƴar iska baceba, kada ku keta mani haddi don Allah"

Tausayin ta ne matuƙa ya kama shi, bai san lokacin da ya kai hannu ba bisa jikin ta, haɗi da fizgota daga hannun su ya maida ta bayan shi, yana mai fuskantar su.

Nikau tinda Naji na tsira daga hannun su, sai na sanya hannu haɗi da ƙwaƙume shi matau, kaman zai tafi ya barni a wurin.

"Kai malam, ƙanwar mu ce fa, kai ina ruwan ka ne?" suka faɗa cikin zaro idanu da matse baki cikin magana irin ta ƙauraye

Daga bayan nashi nake faɗin "Ƙarya suke yi ni ba ƙanwar su baceba, wai sai na basu haɗin kai, na faɗa masu ni ba ƴar iska bace, Allah ne ya kawo mani kai da bansan halin da zasu jefa ni ba" na faɗa ina mai sake ƙwaƙume shi daga baya cikin wani irin tsumammen kuka.

Bai shaida murya ta ba, saboda wani irin ɓacin rai da yake ciki, idanun shi sun kaɗa sunyi jajawur

"Malam Kaga ka miƙo mana ita nan, gida zamu kai ta, guduwa tayi, ƙarya takeyi, kuma kai wanene da zaka zo ka katse mana hanzari?"


"OK kuna son kusan ko ni wanene?" ya faɗa cike da ƙufuluwa

Ganin yana ƙoƙarin zaro wani abu daga cikin aljihu ne ya sanya su ruga wa suna faɗin "zamu haɗu nan gaba ne ai"

Daƙyar ya sanya hannu ya jawo ni daga bayan shi, wanda na rirriƙe shi gam kaman zasu sake ƙwace ni, kuka kawai nakeyi da hamdala da Allah ya kawo mani mai ceto na.


Gaban shi ya maido ni, yana mai sanya hannu ya yaye hijab ɗin da duk ta cukuikuyeni da ɗan kwalin nawa.

A firgice ya ja baya, ganin ko wacece, sai kuma ya sake kulle idon shi ya buɗe ya azasu a bisa kaina.

Nikau kunya da ɗacin rai suka sanya ni durƙushewa a wurin ina mai sakin wani sabon tsumammen kukan.

Jin kukan yakeyi har cikin zuciyar shi, tarin tambayoyi ne kawai a cikin ranshi, Suhan ɗin da take cen makaranta me ya kawo ta nan kuma? Menene haɗin ta da waɗancen ƴan iskan?

Yana tsaye ya tsura mani idanu, sosai kukan nawa yake ratsa mashi zuciya, baya son kukan mace, macen ma wai Suhan.

A hankali ya duƙa haɗi da ɗagoni da dukkanin hannuwan shi, baya jin idan zai iya komawa da ita gidan haka gaban iyayen nashi.

Jana ya shiga yi har bakin wata bishiya da take ɗauke da wani ƙaton dutsi mai faɗi a jikin ta.

Zaunar dani yayi, sannan shima ya koma ya zauna a gefena.

Har yanzu bai ce mani ƙala ba, nima kuma na rage sautin kukan nawa sai shessheka da nake ta faman yi, da sauke ajiyar zuciya a hankali a hankali.

Shiru yayi yana mai nazartar yana yin ta, har yanzu idanun shi jajur suke.

Wani bala'i kishin ta da ƙaunar tane ke taso mashi a cikin rai, wannan ne karo na farko da zai iya aikata wani abu daya san ya saɓa ma addinin nashi, saidai bayada yanda zaiyi.

Hannu ya sanya yana mai ɗan rungumoni zuwa jikin shi ya shiga bubbuga mani baya cikin sigar lallashi, idanun nashi har wani ruwan hawaye suke tarawa saboda tsananin ɓacin rai.


"Me ya kawo ki nan? Bayan kinsan akwai ƴan iska a wurin nan?

Ya jefo mani tambaya cikin salon maganar shi, da kansa inji jinin jikina ya katse ya fara gudu.

A sanyaye cikin dusasshiyar muryar da kuka ya gama cinyewa nace

" Ruwa nazo ɗiba yaya"

"Dole sai ke kaɗai ce zaki zo ɗibar ruwan anan wurin da yake ihunka banza?

Shiru nayi mashi, domin na kula ranshi a matuƙar ɓace yake. Saidai koma minene ni na gode ma Allah daya kawo mani shi a daidai wannan lokacin.

Ɗankwalina ya miƙa mani domin in rufe kaina, gashina duk ya warwatse dama gashi ba kitso a kaina, da kallo ya shiga bina ganin yanda na sanya hannu na tattare gashin duk uban yawan shi da tsawon shi na duƙunƙune shi na cusa cikin ɗan kwalin, ina mai gyara zaman hijab ɗin bisa kaina.

Har yanzu hawaye sun kasa tsayawa a idanuna.

"Yaushe kuka zo yaya?"

Na furta cen ciki, har ina kyautata zaton ma bai ji ba. Sai kuma naji ya amsa mani da cewa

"Yanzun nan, tare muke da su Alhaji da Bilal, Mun tarar umman bata nan sai kuma na shigo zaga gari, ashe ma kin dawo daga makarantar"

Dukkanin maganar da yajeyi har yanzu akwai tsananin ɓacin rai a tare dashi, fuskar nan da take fara ta kaɗa tayi ja sosai.

Duk da yanda nake gani a fuska ta, kaman ya ƙara kyau, sumar nan tashi ta kwanta luf a saman kanshi, ga fatar shi da ta ƙara murjewa kaman ka taɓa jini ya zuba, farar shaddar dake jikin shi ta ƙara fito da ainahin kyawon shi na asali.

Ya Ameen yana da kwarjini da haiba, hakan ce ta sanya ni kasa haɗa ido dashi, cikin sadda kai na shiga cewa

"Zanje na gaida su Dad ɗin"

Da sauri ya kalle ni yana mai nuna ni da yatsa

"A hakan? Ko baki san yanda kike ba? Kalli idanun ki fa"

Ya faɗa cikin wata irin murya dake ƙara sanyawa jikina sanyi matuƙa.

Miƙewa yayi yana faɗin

"Muje ki wanke fuskar ki sana"

Jerawa mukayi har bakin rafin, ta inda tuluna ya fashe muka bi, ina kallon shi yana kallon tulun, saidai bai ce mani ƙala ba, dama na san ba zai tanka ba, yau ma sa'a naci kuma na san harda tausayi na, daya lulluɓe shi.

Shi ya zuƙunna ya sanya hannuwan shi duka biyun yana mai ɗebo mani ruwan rafin ina ɗauraye fuskar tawa.

Har na gama sannan muka miƙe gabaki ɗaya, ya sanya hannu a aljihu ya fiddo hancarchip fari ƙar ya miƙo mani wai in goge fuska ta.

Ba gaddama, na amsa ina mai kai hancarchip ɗin fuska ta, saida naja dogon ajiyar zuciya, yanda ƙamshin turaren shi ɗan asali ya bugi hanci na.

Ban san lokacin da na duƙunƙune shi ba a fuska ta, in mai sake sakin wani kukan, tunowa da Abunda akayi shirin yiman yau a rayuwa ta, ni Suhan da nake daf da aure.

In ce ma Sir Saleem me? Idan duka duniya kunnuwa ne a jikin shi zai taɓa yadda dani? Me yasa wasu mazan basa da adalci ne a rayuwa? Kayi ma mace fyaɗe ko ƙanƙanuwar yarinya kaji daɗin me?


(Matsalar da muke fuskanta kenan a Rayuwar mu ta yanzu, fyaɗe cin zarafi mata, keta ma mata haddi, luwaɗi da yara maza ƙanana, ya zama ruwan dare a faɗin duniyar nan, ko saboda haka Allah ya isa ya kama mu, wallahi mu tuba mu daina, mu koma ma Allah subhanahu wa ta'ala, zamu ci riba a rayuwar mu, zamu rabauta)

Matsowa ya shiga yi a hankali ya sanya dukkanin hannuwan shi yana mai sauke man hannuwana daga saman fuska ta, ya san da ciwo, ya san ba daɗi, ko shi ya shaideta akan ita ɗin yarinya ce nutsattsa ko sutura banza matsattsa bata Sanyawa, yabar hakan a muƙaddari ne, da kuma gurɓacewar matasan yanzu a rayuwa.

Kaina ya aza bisa kafaɗar shi yana mai jijjigawa a hankali kaman wata baby.

Ban san lokacin da na kai hannu na idasa rungume shi ba ina mai sakin wani tsumammen kuka, ya Ameen ɗin Yayana ne, tin da na taso a rayuwa ta nake ganin shi, kallon Yayana nakeyi mashi, shi ɗin daban yake a cikin maza, in wani ne ba zai taɓa fahimta ta ba. Lallashi na ya shiga yi cikin shigar tausayawa yana mai ƙarfafa mani guiwa da umurtata akan in bar maganar anan wurin da gani sai shi sai Allah daya halicce mu, sannan in kiyaye koda nan gaba, tinda na kula akwai ɓata gari a ƙauyen.

Shi ya shiga jan hannuna, kaman makaho da ɗan jagora. Saida mukayi nisa ne sannan ya dakata da tafiyar da yake yi ya juyo ya kalle ni sosai

"Ki daidaita Kanki Suhaaan, bana so kowa ya fahimci komai, akwai maganar da nakeso muyi kafin mu isa gidan"

Dakatawa nayi nima ina mai gyara fuska ta, na goge wasu ƴan matasan hawaye da suke sake gangaro mani.

Sannan nace

"ina jinka yaya"

Juyowa yayi sosai yana fuskanta ta, har saida Naji bugun da zuciya ta takeyi ya kuma lunkuwa, kwarjinin shi da cika idanun shi, su suka taru suka baibayeni.

Hannuna ya cika yana mai yiman kallo na sosai, sannan ya buɗe baki a hankali yana mai cewa


_*"ZAKI AURENI SUHAAN?"*_

a matuƙar firgice haɗi da bugawar zuciya lokaci guda na ɗago da dukkanin fuskanta, idanuna sun kwalalo kaman zasu faɗo ƙasa saboda tsabar firgici nake kallon shi.

Gyaɗa man kai yayi, yana mai lumshe kyawawan idanun shi da suke cike da gashin idanu Zara-Zara alamar tabbacin abunda ya faɗa shi yake nufi.

A hankali na sauke ƙwayar idanuna daga kanshi zuwa ƙasa ina mai........



~Oum-Deedat ce~
https://www.facebook.com/groups/1569379426621615/


🌹 *BAN FI ƘARFIN TA BA* 🌹

🌺🌺🌺🌺🌺


*~✍🏽✍🏽GOLDEN PEN WRITERS ASSOCIATION✍🏽✍🏽~*

*~We are bearer's of so golden pen🖊~*
*~we write assidiously perceive no pain~.*
*~So magical,Our creative golden pen✍,behold our words.~*
*~A product of our pen🖊,savour our words, for it will cause you no pain.~*

>>>>>>>>>>>>>>>>>>>>>>>>>

*Rubutawa*--- _Amina Hassan (Oum-Deedat)_

*Hakk'in Mallaka*--- _(Oum-Deedat)_

*Sadaukarwa*--- _Ga Hauwau Hassan (jiddon dady😘) Amarya ta ango babu wanda zai iya fasalta k'auna ta gareki, k'anwa daya tamkar da dubu Allah ya barmu tare._


*Page ~43~*


°^^^^^^^^^^^^^^^^^^^^^^^^^^^^^°


Haka muka kwana da umma, ba mai umm ba mai un-un

Washe gari tin da safe naga sun tashi ita da hajjo suna ta ƴar hada-hada.

Wajen ƙarfe sha biyu naga an fara fiddo kayan mu zuwa tsakar gida.

Kaina fa ya kulle, da idanu kawai nake binsu, har malam yau yana nan bai fita ba.

Jikin Hajjo da umman tawa yayi sanyi ƙlau, ɗan zaman da aka kuma yi ya sanya shaƙuwa mai tsanani tsakanin Umman tawa da hajjon.

Saidai a cikin zuciyar ta, bata jin zata iya barin wannan damar ta kufce mata, bata jin zata iya ɗaga ƙafa a wannan karon.

Zata ja, zata kara da koma wanene tinda yanzu akwai tsayayye a bayan ta, dama cen rashin galihu da rashin tsayayyen mai ƙarfi ne ya sanya ta ja baya, ya sanya ta yin shiru, kaman marar ƴanci.

Sun duƙar da kai sunyi rayuwar ƙasƙanci, bayan tasan komai, zaman ta a gidan dama da biyu tayi shi, yanzu kuwa bata neman wata ƙarin hujja illa ta ɗaura ɗambar neman abunda yake halalin su.

Azahar nayi naga wata irin hadadɗiyar mota tazo ƙofar gidan mu, sai kuma naji ana cewa mu fito.

Haka muka kwashi ƴan kayan namu da ba wasu masu yawa ba, dreban da kanshi ya shigar mana but, sai kuma Umman tawa ta tsaya yima su Hajjo sallama, sun ɗan daɗe suna tattaunawa, sannan suka rakota bakin mota ita da malam suna mata Allah ya kiyaye hanya.

Nima sallama nayi masu, ba tare da na kawo komai a raina ba, saidai ina tunanin inda zamuje kuma haka daganan.

Tafiya mukayi miƙaƙƙa, saidai mu tsaya salla, abinci ma take away muka tsaya muka amsa.

Hankalina bai tashi tashi ba saida naga mun shiga garin abujan cikin dare, sai kuma naga mun doshi gidan su Ya Ameen ɗin.


Toh fa!

Umman tawa da hankalin ta ta dawo damu cikin gidan nan? Bayan itace da kanta ta sanya mu barin shi da kanta?

Horn driver ɗin yayi mai gadi yazo ya buɗe mana.

A harabar gidan muka tadda Alhaji Mustapha da Ya Ameen suna zaune ga dukkan alama magana suke yi, Amman hankalin Alhaji Mustaphan gaba ɗaya yana kan ƙofar shigowar.

Da mamaki Ya Ameen ya miƙe yana kallon mu, tare suka miƙe da Alhaji Mustaphan yayin da naga ya nufo mu fuskar tashi cike fal da farin ciki.

Gaida Alhaji Mustaphan nayi, ya amsa cikin sakin fuska sosai, Abunda ke ƙara ma Alhajin Daraja kenan a idanun mu.

Sai kuma ya shiga takowa a hankali cikin salon tafiyar shi mai cike da natsuwa.

Yayi masifar kyau cikin hasken fitulun da suka haske ilahirin gidan tar kaman rana.

Daidai inda muke tsaye yaja ya tsaya, sai kuma ya shiga gaida ummata cikin girmamawa, sautin muryar shi na futa a hankali cikin wani irin amo da ya ƙara rikita ni da birkita mani tunani na.

Itama Umman tawa amsawa tayi, saidai wannan karon ba irin amsawar da nasan tana yi ma ya Ameen ba, Amsawa ce mai cike da dakiya irin ta ɗa da uwa.

A'ah

Me yake shirin faruwa ne wai?

Bai ko kalli inda nake tsaye duƙe da kai ba, ya sanya kai ya wuce zuwa sashen nashi.

Da idanu nake bin ilahirin gidan da ya wadatu da shukoki masu ban sha'awa.

Gine ginen ma kusan zamu ce an cenza su, ko ina tsit kake ji ba ƙarar komai sai na kukan tsuntsaye masu daɗin sauraro.

Alhajin ne ya kwala ma Mudi dreba kira, da gudun shi ya taso yana mai faɗin "ranka ya daɗe gani"

Kayan mu da driver ɗinda ya kawo mu mai suna Mahi ya fiddo mana ya shiga nuna mashi da hannu yana mai cewa su kwaso kayan su shigo mana dasu.

Maimakon inga mun nufi sashen masu aiki, sai naga mun nufi wani ɓangare mai kyau, wanda ada sashen Alhaji Mustaphan ne na sani a wurin.

Da makullin da yake hannun shi yayi amfani ya buɗe sashen.


"Masha Allah".

Itace kalmar da na fara furtawa lokacin da na saka ƙafar tawa cikin tanƙamemen falon da ya wadata da kaya masu masifar kyau kalar royal blue da maroon.

Umma ta na biye a bayana, itama ga dukkan alamu sashen nata ya matuƙar burge ta.

Sai a lokacin na fara dawowa hayyacina.


"wai ba dai ummata ce ta auri Alhaji Mustaphan ba" na faɗa a cikin zuciya ta ina mai kai zaune bisa wata luntsumememiyar kujera da ta wadatu da fuloli burjik kaman na gidan sarauta.

Gaba na ne ya shiga faɗuwa, Alhaji Mustaphan ne ya shiga gaba, umman tawa tana biye dashi har ɗan corridor ɗin da yake ɗauke da ɗakunan bacci guda uku.

Na farko ɗakine da yake ɗauke da kaya gwanin ban sha'awa, komai kala ɗaya ne dana falon, sai na biyu kuma shi gabaki ɗaya kalar maroon ɗinne da surkin Ash colour masu matuƙar kyau da ɗaukar hankali.

Na cen ƙurya shine yafi kowanne tsaruwa, kaya ne ƴan uban su, ba kalar na ƙasar tamu bane.

Komai na falon fari ne tas, hatta da kalar fentin upwhite ne. Kuma ko wanne ɗaki da toilet ɗinshi.

Gaskiya sashen yayi ba ƙarya, na biyun shine aka nuna a matsayin nawa, sai na farkon wai na ummata ne ɗana cen ƙurya ɗin.

Da matuƙar mamaki nake binsu da kallo, yau Ummata ita ce a matsayin amaryar Alhaji Mustapha Dambulan???

Falon muka dawo inda muka tadda ƙofofi guda biyu, ɗaya ta balcony ce, yayin da ɗayar take ta makeken kitchen ɗin da yasha carbinet mai masifaffen kyau, ba tarkace a cikin kitchen ɗin, saidai